ހިޔާވެހި ފައިނޭންސިން އަށް ގިނަ ބަޔަކު ޝަރުތު ހަމަނުވާތީ ކުޑޫ, ކަންބޮޑުވުން ފާޅުކުރައްވާ މުއިއްޒަށް ސިޓީއެއް ފޮނުއްވައިފި

ގެދޮރު ބިނާކުރުމަށް ސަރުކާރުން ދޫކުރާ ހިޔާވެހި ފައިނޭންސިން ސްކީމް އަށް ގިނަ ބަޔަކު ޝަރުތު ހަމަނުވާތީ ކަންބޮޑުވުން ފާޅުކުރައްވައި، ގަލޮޅު އުތުރު ދާއިރާގެ އެމްޑީޕީ މެންބަރު މުހައްމަދު އިބްރާހިމް (ކުޑޫ) ރައީސުލްޖުމްހޫރިއްޔާ ޑރ. މުހައްމަދު މުއިއްޒަށް ސިޓީއެއް ފޮނުއްވައިފި އެވެ.

ރައީސް މުޢިޒަށް ކުޑޫ ފޮނުއްވި ސިޓިގައި ވިދާޅުވީ ހިޔާވެހި ސްކީމުން ފައިސާ ދޫކުރުމުގެ އުސޫލުގެ ދަށުން، ބޭންކް އޮފް މޯލްޑިވްސް އިން ކަނޑައަޅާފައިވާ މިންގަނޑުތަކަކީ އާންމު އުސޫލުން ބޭންކުތަކުން ލޯނު ދޫކުރާ މިންގަނޑުތަކަކަށް ވާތީ، އޭގެ ސަބަބުން ގިނަ ބަޔަކު ލޯނަށް ޝަރުތު ހަމަނުވާ ކަމުގެ ޝަކުވާ ލިބެމުންދާ ކަމަށެވެ.

އެގޮތުން އެކަމާ ގުޅިގެން ވިސްނާވަޑައިގެން، ހިޔާވެހި ލޯން ސްކީމަށް ޝަރުތު ހަމަވުމުގައި ލުއި ގޮތެއް ހަދައިދިނުމަށް ކުޑޫގެ ސިޓީގައި ރައީސް މުއިއްޒުގެ އަރިހުން އެދިފައިވެ އެވެ. އަދި މިހާރު ހިންގަމުންދާ އުސޫލުގައިވާ ގޮތުން އާމްދަނީގެ 40 ޕަސަންޓަށްވުރެން ލޯނަށް ދައްކަންޖެހޭ އަދަދު ބޮޑުނަމަ ލޯނަށް ޝަރުތު ހަމަނުވާ ކަމަށް ކުޑޫ ވިދާޅުވި އެވެ. އެގޮތުން ހަ މިލިއަން ރުފިޔާގެ ލޯނެއް ފަސް ޕަސަންޓް އިންޓްރެސްޓުގައި 25 އަހަރުން ދައްކާ ގޮތަށް ނަގާނަމަ މަހަކު 35،000 ރުފިޔާ ލޯނަށް އަނބުރާ ދައްކަން ޖެހޭ ކަމަށް އޭނާ ވިދާޅުވި އެވެ.

މިއަހަރު ހުޅުވާލި ފުރުސަތުގައި ހިޔާވެހި ލޯނަށް އެދުމުގެ މުއްދަތު މިހާރު ވަނީ ހަމަވެފަ އެވެ. އެ ލޯނަށް އެދުނު ގިނަ މީހުންގެ ޝަރުތު ފުރިހަމަ ނުވި ކަމަށް އެނގިފައިވެ އެވެ. ލޯނަށް އެދެންޖެހެނީ ސަރުކާރުގައި ނަމަވެސް ލޯނުގެ ފައިނޭންޝަލް އެލިޖިބިލިޓީ ކަނޑައަޅަނީ ބޭންކުތަކުންނެވެ.