ލޭ ހޯދުމަށް ހުރި ދަތިތައް ހިއްސާކުރުމަށް މެމްބަރު ކުޑޫ އެދޭތާ 4 މަސް - "ޕްރެސެންޓޭޝަނެއް ހުށަހަޅަން ވެސް ފުރުސަތު ނުލިބޭ"
ދުވާލަކު 40 މީހުންގެ ގަޔަށް ލޭ އަޅަން ޖެހޭއިރު އެކަން ކުރަން ޖެހެނީ ސަލާން ޖަހައިގެން
ރައީސް، ނެޝަނަލް ތެލަސީމިއާ ސެންޓަރަށް ޒިޔާރަތް ކުރެއްވުން
ރާއްޖޭގައި ލޭ ހޯދުމަށް ދިމާވެފައިވާ ދަތިތައް މަޖިލީހާއި ހިއްސާކުރުމަށް އެދިވަޑައިގެންނެވި ފަހުން 4 މަސް ވީ އިރު އެ ފުރުސަތު ލިބިފައި ނުވާ ކަމަށް ގަލޮޅު އުތުރު ދާއިރާގެ މެންބަރު މުޙައްމަދު އިބްރާހީމް (ކުޑޫ) ވިދާޅުވެއްޖެއެވެ،
ދިވެހިރާއްޖޭގައި ލޭ ހޯދުމަށް ނުހަނު ދަތިވާކަން ފާހަގަކޮށް، އެ މައްސަލަ ހައްލުކުރުމާމެދު ރައްޔިތުންގެ މަޖިލީހުގެ މެންބަރުން ދެކެވަޑައިގަންނަވާ ގޮތެއް ދެނެގަތުމަށްޓަކައި ކުޑޫ ވަނީ މަޖިލީހަށް ގަރާރެއް ހުށަހަޅުއްވާފައެވެ. ހޯމަ ދުވަހު އެ ގަރާރުގެ އިބްތިދާއީ ބަހުސް ކުރިއަށް ގެންދިޔައެވެ. ދުވާލަކު 40 މީހުންގެ ގަޔަށް ލޭ އަޅަ އިރު އެކަން ވެސް ކުރަން ޖެހެނީ ސަލާން ޖަހައިގެން ކަމަށް އޭނާ ވިދާޅުވިއެވެ. މި ނޫން ގޮތަކަށް މި މައްސަލަ ހައްލުކުރަން ޖެހޭ ކަމަށާއި ތަރައްޤީ އަކީ މިފަދަ މައްސަލަތައް ހައްލުވުން ކަމަށް އޭނާ ވިދާޅުވިއެވެ.
"ޕްރެޒެންޓޭޝަނެއް ހުށަހަޅަން އެދުނިން ފުރުސަތެއް ނުލިބޭ. ލޭ ނުލިބޭ މައްސަލަ އަކީ ދައުލަތުން ހައްލުކޮށްދޭން ޖެހެ ކަމެއް މިއީ އަމިއްލަ އަށް ހައްލުކުރަން ޖެހޭ ކަމެއް ނޫން. މިކަން ނުކޮށް މިއީ ދެން ކީއްކުރާ ރައްޔިތުންގެ މަޖިލީހެއްތޯ؟ މިތަނަށް ހޮވާފަ ތިބީ މިކަންކަން ކުރަން. މިއީ ސަރުކާރުގެ ވެސް ސަރުކާރު މެމްބަރުންގެ ވެސް ޒިންމާ އެއް." ކުޑޫ ވިދާޅުވިއެވެ.
ކުޑޫގެ އިތުރުން އެ ގަރާރަށް ވާހަކަދެއްކެވި އެމްޑީޕީގެ މެމްބަރުން ވެސް ވަނީ ލޭ ލިބުން ދަތިވެ ބަލި މީހުން އުފުލާ ތަކުލީފުތައް މަޖިލީހާއި ހިއްސާ ކުރައްވާފައެވެ. ހަނިމާދޫ ދާއިރާގެ މެމްބަރު ޢަބްދުލްޣަފޫރު މޫސާ ވިދާޅުވީ މިފަދަ އިޖްތިމާއީ ކަންކަމަށް މި ސަރުކާރުން އިޖާބަ ނުދޭ ކަމަށެވެ. ނިޒާމުގެ ކަންކަން ހައްލުކުރަން އެދޭ ކޮންމެ ފަހަރަކު ޒިންމާ ނެގުމުގެ ބަދަލުގައި "ކުރީ ސަރުކާރު"ގެ ބޮލަށް ކަންކަން ޖަހާ އުސޫލު ގެންގުޅޭ ކަމަށް ޢަފޫރު ވަނީ ވިދާޅުވެފައެވެ.
މަޖިލީހުގައި ވާހަކަދައްކަވަމުން ވައިކަރަދޫ ދާއިރާގެ މެމްބަރު ހުސެއިން ޒިޔާދު ވިދާޅުވީ މި ސަރުކާރަކީ 2.0 ނުވަތަ މިހާރުގެ ޒަމާނާއި އެއްގޮތަށް ކަންކަން ކުރާ ސަރުކާރެއް ކަމަށް، ސަރުކާރުން ދައުވާ ކުރަމުންދާ ކަމަށެވެ. ނަމަވެސް ބަލި މީހުންނަށް ބޭނުންވާ ލޭ ހަލާކުވާ ހިސާބަށް މި ވެރިކަމުގައި ކަންކަން ދިއުމުން، މި ސަރުކާރަށް ކަންކަން ނުބެލެހެއްޓޭކަން ހާމަވާ ކަމަށް އޭނާ ވިދާޅުވިއެވެ.
ތޮއްޑޫ ދާއިރާގެ މެމްބަރު ހުސައިން ސަމީރު ވެސް ވަނީ ލޭ ނުލިބިގެން އާއްމުން ސަރުކާރުގެ އިސް ފަރާތްތަކުގެ ކިބައިގައި އާދޭސްކުރާ ހިސާބަށް ކަންކަން ގޯސްވެފައިވާ ކަމަށް ވިދާޅުވެފައެވެ. އަދި ސިއްހީ ނިޒާމް ހަރުދަނާކުރުމުގެ ބަދަލުގައި ކަންކަން އިތުރަށް ގޯސްވާ ކަމަށް އޭނާ ވަނީ ވިދާޅުވެފައެވެ.
މެމްބަރުން ވަނީ ލޭ ނުލިބޭ މައްސަލަ އަށް ސަރުކާރުން ދޭންވާ ސަމާލުކަން ނުދޭކަން ފާހަގަކޮށް އެކަމާއި މެދު ކަންބޮޑުވުން ފާޅުކޮށްފައެވެ. މި ވެރިކަމުގައި ލޭ ލިބުން ދަތިވެ، ލޭ ބެެލެހެއްޓުން ދޯދިޔާ ވުމުން އާއްމުން އެކަމާއި ދެކޮޅަށް ތެލެސީމިއާ ސެންޓަރ އަށް އެއްވެ އަޑު ވެސް އުފުލާފައިވެއެވެ.
