ޕިއްޒާ ބޯނާ އަލްޓިމޭޓް ޗެލެންޖް - ފޯރި ގަދަ، ލިބުނީ ހޫނު ތަރުޙީބެއް

މިހާރު ހުޅުމާލޭ ސެންޓްރަލް ޕާކުގައި ކުރިއަށް ދާ މޯލްޑިވްސް ފުޑް ކާނިވަލްގެ ތެރެއިން ކުރިއަށް ގެންދިޔަ ޕިއްޒާ ބޯނާ އަލްޓިމޭޓް ޗެލްންޖަށް ވަރަށް ހޫނު ތަރުޚީބެއް ލިބުނު ކަމަށް ޕިއްޒާ ބޯނާގެ ފަރާތުން ބުނެފިއެވެ.

ޕިއްޒާ ބޯނާ އަލްޓިމޭޓް ޗެލްންޖުގެ ދެވަނަ އެޑިޝަން ހުކުރު ދުވަހު ބޭއްވިއިރު، މީގެ ފުރަތަމަ އެޑިޝަން ކުރިއަށް ގެންގޮސްފައި ވަނީ މި އަހަރުގެ ޖެނުއަރީ މަހުގެ 25 ގައެވެ. ޕިއްޒާ ބޯނާ އަލްޓިމޭޓް ޗެލެންޖްގެ ދެވަނަ އެޑިޝަނަށް ވެސް ވަރަށް ހޫނު ތަރުޚީބެއް ވަނީ ލިބިގެން ގޮސްފައެވެ.

18 މިނިޓުގެ ދިގުމިނަށް ކުރިއަށް ގެންދިޔަ މި ޕިއްޒާ ޗެލެންޖަކީ އެންމެ އަވަހަށް ޕިއްޒާ ބޯނާގެ އެންމެ ބޮޑު ޕިއްޒާ ހުސްކުރާ މީހަކު ހޮވާ ގޮތަށް ކުރިއަށް ގެންދިޔަ ޗެލެންޖެކެވެ. ރަނގަޅު އިނާމުތަކަކާއި އެކު ކުރިއަށް ގެންދިޔަ އެ ޗެލެންޖުން 1 ވަނަ، 2 ވަނަ އަދި 3 ވަނަ ހޮވާފައި ވެއެވެ.

އެގޮތުން 9 މިނިޓް 07 ސިކުން ޕިއްޒާ އެއް ކާލައިގެން އެއްވަނަ ހާސިލް ކުރީ އަހުމަދު ރަފާހު އެވެ. އެއް ވަނަ އަށް ހޮވުނު ފަރާތަށް 5000 ރުފިޔާގެ ފައިސާގެ އިނާމެއް ވަނީ ލިިބިފަ އެވެ.

10 މިނިޓް 18 ސިކުންތުން ޕިއްޒާ އެއް ހުސްކޮށްގެން ދެ ވަނަ ހާސިލް ކުރި މުޙައްމަދު ރިފްހާން އަށް 2500 ރުފިޔާގެ އިނާމެއް ވަނީ ދީފައެވެ.

ތިން ވަނަ އަށް ދިޔަ މުޙައްމަދު ސަޖާދު އަށް އިނާމެއްގެ ގޮތުން ދީފައި ވަނީ 1000 ރުފިޔާއެވެ. އޭނާ އަށް ތިން ވަނަ ލިބުނީ 14 މިނިޓް 51 ސިކުންތުން ޕިއްޒާ އެއް ހުސްކޮށްގެންނެވެ.

ޕިއްޒާ ބޯނާގެ ޑިރެކްޓަރ ހުސެއިން ހާލީ ވިދާޅުވީ ހުޅުމާލޭގެ ސެލްޓަރަލް ޕާކުގައި ބާއްވާ ފުޑްކާނިވަލް ފަދަ އިވެންޓުތަކާއި ގުޅިގެން ޕިއްޒާ ބޯނާގެ ފަރާތުން ޕިއްޒާ ބޯނާ އަލްޓިމޭޓް ޗެލްންޖު ފަދަ މުބާރާތްތައް ބާއްވަމުން އަންނަ ކަމަށާއި އެފަދަ ހަރަކާތްތައް ބާއްވަނީ ޕިއްޒާ ބޯނާގެ ކަސްޓަމަރުންނަށް ޓަކައި ކަމަށެވެ.

އެގޮތުން ޕިއްޒާ ބޯނާގެ ކަސްޓަމަރުންގެ ފަރާތުން މިފަދަ އިވެންޓް ތަކަށް ވަރަށް ބޮޑު ތަރުހީބެއް ލިބިގެން ދާކަމަށާއި މިހާތަނަށް ބޭއްވި ދެ އެޑިޝަނަށް ވެސް ހީނުކުރާ ވަރުގެ ހޫނު ތަރުހީބެއް ލިބިފައިވާ ކަމަށް ހާލީ ވިދާޅުވިއެވެ. އަދި ޕިއްޒާ ބޯނާގެ މިފަދަ ހަރަކާތްތަކަށް ކަސްޓަމަރުން ދެއްވާ ތަރުހީބަށް ހާލީ ވަނީ ޕިއްޒާބޯނާގެ ނަމުގައި ޝުކުރު ދަންނަވާފައެވެ.

މި ހަރަކާތަށް ހީކުރިވަރަށް ވުރެ ރަނގަޅު ކާމިޔާބެއް ލިބިފައިވާކަން ފާހަގަކޮށް އޭނާ ވަނީ ކުރިއަށް އޮތްތަނުގައި މިފަދަ އިތުރު ބައެއް ތަފާތު ކަންކަން ޕިއްޒާ ބޯނާގެ ކިބައިން ފެނިގެންދާނެކަން ހާމަކޮށްފައެވެ.

މިއަށް ވުރެ ފެންވަރު ރަނގަޅު މުބާރާތެއް ބޭއްވުމަށް އުންމީދުކުރާކަން އޭނާ ވަނީ ފާހަގަކޮށްފައެވެ.