ހުޅުމާލޭގައި ހިނގި އެކްސިޑެންޓުގައި ކާރު ދުއްވަން އިން މީހާގެ ބަންދަށް 7 ދުވަސް ޖަހައިފި
ކާރު ދުއްވަން އިނީ 30 އަހަރުގެ ފިރިހެނެއް
ހުޅުމާލޭގައި ކޮންޓްރޯލް ނުވެ ގޮސް އެކްސިޑެންޓްވި ކާރު
ހުޅުމާލޭގައި ހިނގި ނުރައްކާތެރި އެކްސިޑެންޓުގައި ކާރު ދުއްވަން އިން މީހާގެ ބަންދަށް 7 ދުވަސް ޖަހައިފިއެވެ.
ހޯމަ ދުވަހުގެ ރޭ ހުޅުމާލޭ ސެންޓްރަލް ޕާކު ކައިރިން ބާރު ސްޕީޑުގައި ދުއްވާފައި ދިޔަ ކާރެއް ކޮންޓްރޯލްނުވެ ގޮސް، ތިން ސައިކަލުގައި ޖެހި ނުރައްކާތެރި އެކްސިޑެންޓެއް ހިނގިއެވެ. މި ކާރު ދުއްވަން އިނީ 30 އަހަރުގެ ދިވެހި ފިރިހެނެކެވެ.
މި އެކްސިޑެންޓުގެ މައުލޫމާތު ދެމުން ފުލުހުން ބުނިގޮތުގައި، މި އެކްސިޑެންޓް ހިނގާފައިވަނީ ހޯމަ ދުވަހުގެ ރޭ 7:40 ހާއިރުއެވެ. މި އެކްސިޑެންޓުގައި ތިން ސައިކަލުގެ ތެރެއިން ދެ ސައިކަލުގައި ތިބި ދެ ފިރިހެނަކަށާއި އަންހެނަކަށް އަނިޔާވެގެން ހުޅުމާލޭ ހޮސްޕިޓަލުގައި ފަރުވާ ދީފައިވެއެވެ. އަދި ފަހުން ދެ މީހަކު ވަނީ އޭޑީކޭއަށް ބަދަލުކޮށްފައެވެ. މި އެކްސިޑެންޓުގައި ޖުމްލަ 4 މީހަކަށް އަނިޔާވިއެވެ.
އޭޑީކޭއަށް ބަދަލުކުރި 2 މީހުންގެ ތެރެއިން އެކަކަށް ފަރުވާ ދެމުން އަންނަނީ އައިސީޔޫގައެވެ. އަދި އަނެއް މީހާއަށް އެޗްޑީޔޫގައެވެ.
ކާރު ދުއްވަން އިން މީހާ އެރޭ ހައްޔަރުކޮށް، ބަންދުގެ މުއްދަތު ޖަހަން ހުޅުމާލެ ކޯޓަށް ގެންދިއުމުން، އެ ކޯޓުން ވަނީ 7 ދުވަސް ބަންދަށް ދީފައެވެ.
