ގދ.ރަތަފަންދޫގައި ވެސް މަޝްރޫއުތައް ހުއްޓިފައި : އާއްމުންގެ ކަންބޮޑުވުންތައް ބަންޑުން
ތިން އަހަރު ނިމިދަނީ މާޔޫސްކަމުގައި ކަމަށް އެ ރަށުގެ އާއްމުން ވަނީ ބުނެފަ
ރަތަފަންދޫގެ ބައެއް އާއްމުން ރާއްޖެޓީވީގެ ހާލު ކިހިނެތް ޕްރޮގްރާމްގައި ވާހަކަދައްކަނީ
ގދ.ރަތަފަންދޫގައި ވެސް މަޝްރޫއުތައް ހުއްޓިފައި ހުރުމުން އާއްމުންގެ ކަންބޮޑުވުންތައް ބަންޑުންކޮށްލައިފި އެވެ.
ހާލު ކިހިނެތް ޕްރޮގްރާމްގައި ގދ.ރަތަފަންދޫގެ އާއްމުން ވަނީ އެ ރަށުގެ ތަރައްޤީގެ މަޝްރޫޢޫތައް ނުހިނގާތީ އެކަމުގެ ކަންބޮޑުވުން ހިއްސާކޮށްފަ އެވެ. އެ ރަށުގެ ރައްޔިތުންގެ އެއް ކަންބޮޑުވުމަކީ ރަށުން ބައެއް ބޭސްތައް ނުލިބުމެވެ.
"ބޭހެއް ނުލިބޭ. ނުލިބިގެން އެހެން ރަށްރަށުން ބޭސް އެބަ ގެނޭ. ބޭސް ސިޓީ ލިޔެފަ ދޭ އެކަމަކު ބޭހެއް ނުލިބޭ. މިއީ މި ރަށުގެ ހާލަތަކީ." ރަތަފަންދޫ އާއްމު މީހަކު ވަނީ ބުނެފަ އެވެ.
ފެން ފޯރުކޮށްދިނުމަށް ނިމިދިޔަ ސަރުކާރުން ފެށި ޕްރޮޖެކްޓުގެ މަސައްކަތް ވެސް ވަނީ ހުއްޓިފައި ކަމަށް އެ ރަށުން ވާހަކަދެއްކި އާއްމުން ވަނީ ބުނެފަ އެވެ. އެ ރަށުގައި ހުރި އާރްއޯ ޕްލާންޓް ހުރީ ވީރާ ވާން ދޫކޮށްލާފައި ކަމަށް އެ ރައްޔިތުން ވަނީ ބުނެފަ އެވެ. މި ދައުރު ފެށުނު ފަހުން އެ ރަށުގައި އެއްވެސް މަސައްކަތެއް ނުހިނގާ ކަމަށް އާއްމުން ވަނީ ބުނެފަ އެވެ.
"މި ތަން މި ހުރީ ވީރާނާ ވާން ދޫކޮށްލާފަ. މިއީ މެޝިނަރީ ވެސް ގެނެސްފައި ހުރި ތަނެއް އާރްއޯ ޕްލާންޓް ވެސް އެބަހުރި ގެނެސްފައި . އެ ވަރުން ވެސް ނެތް މި ތަނުގެ މަސައްކަތް ނިންމާލެވޭނެ ފެންވަރު." އާއްމު މީހަކު ވަނީ ކިޔާދީފަ އެވެ.
އެ ރަށުން ވާހަކަ ދެއްކި އާއްމު މީހަކު ބުނެފައި ވަނީ ރަތަފަންދޫ އަށް މި ވެރިކަމުގައި އެއްވެސް ކަމެއް ކޮށް ނުދެވޭ ކަމަށެވެ. އެ ރަށުގައި ހިލަ ޖަހާ ގިރުމުން ސަލާމަތްކޮށްދޭނެ ކަމަށް ބުނި ނަމަވެސް އެކަން ވެސް ކޮށް ނުނިމޭ ކަމަށް އާއްމުން ވަނީ ބުނެފަ އެވެ. އާއްމުން ބުނީ މި ވެރިކަމުގައި އައިސް ރިބަން ކަނޑާލާނެ މަސައްކަތެއް ވެސް މި ސަރުކާރުން ކޮށްފައި ނުވާ ކަމަށެވެ.
"ރިބަން ކަނޑާލާނެ ތަނެއް ވެސް ނެތް މި ރަށުގައި. މި ރަށުގައި ގިރަން ފަށާފައި އޮތީ. ވަށައިގެން ތޮށި ލާނެ ކަަމަށް ބުނި. އެކަން ވެސް ކޮށް ނުދެވި ތިން އަހަރު މި ނިމިގެން ދަނީ." އާއްމު މީހަކު ވަނީ ބުނެފަ އެވެ.
މީގެ އިތުރުން އާއްމުން ވަނީ ތަކެތީގެ އަގު ބޮޑުވުމުން އެކަމާއި މެދު ވެސް ކަންބޮޑުވުން ފާޅުކޮށްފަ އެވެ. ތިން އަހަރު ނިމިދަނީ މާޔޫސްކަމުގައި ކަމަށް އެ ރަށުގެ އާއްމުން ވަނީ ބުނެފަ އެވެ.
