އިސްރާއީލް އިން ޣައްޒާގައި ހިންގަމުން އަންނަ ހަނގުރާމައިގެ ސަބަބުން ޣައްޒާ ޙާލުގައި ޖެހިފައިވާއިރު، ޣައްޒާ އަށް އެތެރެ ކުރަމުން އަންނަ އިންސާނީ އެހީ އެތެރެ ކުރުން ހުއްޓާލަން ޖެހޭ ކަމަށް އިސްރާއީލްގެ ސެކިއުރިޓީ މިނިސްޓަރު އިޓަމާ ބެން ގްވީރް ގޮވާލައްވައިފި އެވެ.

އިސްރާއީލް އިން ޣައްޒާ އަށް އިންސާނީ އެހީ އެތެރެ ކުރުމަށް ހުއްދަ ދީފައި ވީ ނަމަވެސް، އިންސާނީ އެހީ އެތެރެ ކުރަމުން އަންނައިރު ވެސް އިސްރާއީލްގެ އަސްކަރިއްޔާ އިން އަންނަނީ އެކަމަށް ހުރަސް އަޅަމުންނެވެ. އެގޮތުން އެހީ ހޯދުމަށް އެއްވާ އާންމުންނަށް ހަމަލާދީ، އެތައް ބަޔަކު މިހާތަނަށް ވެސް ޝަހީދު ކޮށްލާފައިވެ އެވެ.

އިޓަމާ ބެން ގްވީރް ވިދާޅުވެފައި ވަނީ، މިހާރު ޣައްޒާ އަށް ފޮނުވަަމުން އަންނަ އިންސާނީ އެހީ އާއި، އެ ޤައުމަށް އެތެރެ ކުރަމުން އަންނަ އިންސާނީ އެހީ ވެސް ހުއްޓާލަން ޖެހޭ ކަމަށެވެ. އަދި އެކަމަކީ ނުހަނު ލަދުވެތި ކަމެެއް ކަމަށް ވެސް އޭނާ ވިދާޅުވެފައިވެ އެވެ.

އިޓަމާ ބެން ގްވީރް އޭނާގެ ރަސްމީ އެކްސް އެކައުންޓުގައި ކުރި ޕޯސްޓެއްގައި ވިދާޅުވެފައި ވަނީ، އިސްރާއީލް އިން މިހާރު ބޭނުން ވަނީ ވަގުތީ ގޮތުން އިންސާނީ އެހީ އެތެރެ ކުރުން ހުއްޓާލުން ނޫން ކަމަަށެވެ. އޭގެ ބަދަލުގައި މުޅިން އެއްކޮށް، އަދި އަބަދުގެ އަބަދަށް އެހީ އެތެރެ ކުރުން ހުއްޓާލަން ޖެހޭ ކަމަށް ވެސް ވިދާޅުވެފައިވެ އެވެ. 

މީގެ އިތުރުން އޭނާ ވިދާޅުވީ، މީގެ އެއް މަސް ދުވަހާއި ދެ ހަފުތާ ކުރިން ނެގި ވޯޓުގައި ވެސް، އިންސާނީ އެހީ އެތެރެ ކުރުމާ ދެކޮޅަށް ވޯޓު ދެއްވީ އޭނާ އެކަނި ކަަމަށެވެ. އަދި ޣައްޒާ އަށް މިހާރު އެތެރެ ކުރަމުން އަންނަ ކާބޯ ތަކެއްޗާއި، އެހެނިހެން އިންސާނީ އެހީގެ ކޮންޓްރޯލް ހަމާސް ޖަމާއަތުން ނަގަމުންދާ ކަމަށާއި، އެކަމުގެ ސަބަބުން އެ ޖަމާއަތަށް ދިރުން ލިބެމުން އަންނަ ކަމަށް ވެސް އޭނާ ވިދާޅުވި އެވެ. 

އިތުރަށް އިޓަމާ ބެން ގްވީރް ވިދާޅުވީ، ޣައްޒާ އަށް ވަންނަމުން އަންނަ އިންސާނީ އެހީ ހުއްޓުވާލުމަކީ، ޣައްޒާގައި އިސްރާއީލް އިން ކުރަމުން އަންނަ ހަނގުރާމައިގައި ކާމިޔާބު ހޯދުމަށް އަވަސް ވެގަންނާވެ އަދި އެކަމަށް މަގުފަހިވާނެ ކަމެއް ކަމަށެވެ. 

އެހެންކަމުން އެންމެ އަވަހަށް ދެން އޮންނަ، އިސްރާއީލް ސަރުކާރުގެ ކެބިނެޓު ބައްދަލުވުމެއްގައި އެ މައްސަލަ އަށް ވޯޓު ނަގަން ބޭނުންވާ ކަމަށާއި، އެކަން ކުރަން ބޭނުންވާ ކަމަށް އޭނާ ވިދާޅުވި އެވެ. އެހެން ނަމަވެސް، މިކަމާ ގުޅިގެން އިސްރާއީލް ސަރުކާރުގެ ކެބިނެޓުގެ އެހެން މެމްބަރުން ވަކި އެއްޗެއް ހާމަކޮށްފައި ނުވެ އެވެ.