އަލޮންސޯގެ އިރުޝާދުގެ ދަށުން ރެއާލް ފުރަތަމަ މޮޅު ހޯދައިފި

މިހާރު ކުރިއަށްދާ ފީފާ ކުލަބު ވާރލްޑް ކަޕްގެ ގުރޫޕް ސްޓޭޖުގައި ކުޅުނު ދެ ވަނަ މެޗުގައި ޕަޗުކާގެ މައްޗަށް ކުރި ހޯދައި، ރެއާލް މެޑްރިޑުން މުބާރާތުގެ ފުރަތަމަ މޮޅު ހޯދައިފި އެވެ.

މުބާރާތުގައި ރެއާލްގެ ފުރަތަމަ މެޗުގައި ވަނީ އަލް ޙިލާލާ އެއްވަރުވެފަ އެވެ. އެ މެޗުގައި ރެއާލް އިން ލީޑު ނަގާފައި ވަނިކޮށް، އަލް ޙިލާލް އިން ވަނީ ފަހަތުން އަރައި ނަތީޖާ ހަމަހަމަ ކޮށްފަ އެވެ.

ބޭންކް އޮފް އެމެރިކާ ސްޓޭޑިއަމްގައި ކުޅުނު މެޗުގައި ރެއާލް އިން ވަނީ 3-1 އިން ޕަޗުކާގެ މައްޗަށް ކުރި ހޯދައިފަ އެވެ. މެޗުގެ ފުރަތަމަ ހާފުގައި ރެއާލް އިން ދެ ލަނޑު ޖެހިއިރު، އަނެއް ލަނޑު ޖެހީ ފަހު ހާފުގަ އެވެ. މި ހާފުގައި ޕަޗުކާ އިން ވެސް ވަނީ ލަނޑެއް ޖަހައިފަ އެވެ.

މެޗުގައި ރެއާލަށް އެންމެ ބޮޑު ގެއްލުމެއް ދެއްކީ، މެޗު ފަށައިގެން ހަތް ވަނަ މިނެޓުގައި އެ ޓީމުގެ ޑިފެންޑަރު ރައުލް އަސެންސިއޯ އަށް ސީދާ ރަތް ކާޑު ދައްކައި ދަނޑުން ފޮނުވާލުމުންނެވެ. އެއީ ރެއާލްގެ އޭރިޔާ ކައިރިން ޕަޗުކާގެ ކުޅުންތެރިޔަކަށް އޭނާ ކުރި ފައުލަކާ ގުޅިގެން ދެއްކި ކާޑެކެވެ.

އެއް ކުޅުންތެރިޔަކު މަދުން ކުޅުނު ނަމަވެސް، ފުރަތަމަ ހާފުގެ 35 ވަނަ މިނެޓުގައި ރެއާލް އިން ވަނީ ލަނޑު ޖަހައި ލީޑު ނަގައިފަ އެވެ. އެ ލަނޑު އެ ޓީމަށް ޖަހައިދިނީ ޖޫޑް ބެލިންހަމް އެވެ. އޭނާ އެ ލަނޑު ޖެހީ ފްރާން ގާސިއާ ތަނަވަސްކޮށްދިން ފުރުސަތެއްގައި އޭނާ ޖެހި ލަނޑެކެވެ.

އޭގެ ފަހުން ފުރަތަމަ ހާފުގެ ފުރިހަމަ ވަގުތު ހަމަވާން ދެ މިނެޓަށް ވެފައި ވަނިކޮށް ރެއާލްގެ ދެ ވަނަ ލަނޑު ޖަހައި ލީޑު ފުޅާ ކުރީ އާޑާ ގުލާ އެވެ. އެއީ ގޮންޒާލޯ ގާސިއާ ތަނަވަސްކޮށްދިން ފުރުސަތެއްގައި ގުލާ ޖެހި ލަނޑެކެވެ.

މެޗުގެ ދެ ވަނަ ހާފުގައި ރެއާލްގެ ތިން ވަނަ ލަނޑު ޖަހައި އިތުރަށް ލީޑު ފުޅާ ކޮށްދިނީ ފެޑެރިކޯ ވަލްވާޑޭ އެެވެ. މެޗުގެ 70 ވަނަ މިނެޓުގައި އޭނާ އެ ލަނޑު ޖެހީ ބްރަހިމް ޑިއާޒް ތަނަވަސްކޮށްދިން ފުރުސަތެއްގަ އެވެ.

މެޗުގައި ޕަޗުކާގެ ހަމައެކަނި ލަނޑު، 80 ވަނަ މިނެޓުގައި ޖެހީ އެލިއާސް މޮންޓިއޭލް އެވެ. އޭނާ އެ ލަނޑު ޖަަހަން ފުރުސަތު ތަނަވަސްކޮށްދިނީ ހޭވިއާ އެޑުއާޑޯ ލޮޕޭޒް އެވެ.

މިއީ މި ފަހުން ރެއާލްގެ ކޯޗުކަމާ ހަވާލުވި އެ ޓީމުގެ ކުރީގެ ކުޅުންތެރިޔާ، ޒަބީ އަލޮންސޯގެ އިރުޝާދުގެ ދަށުން ރެއާލް ހޯދި ފުރަތަމަ މޮޅެވެ. މޮޅާ އެކު ރެއާލް އެއް ވަނައިގައި އޮތީ މިހާތަނަށް ކުޅެފައިވާ ދެ މެޗުން ހަތަރު ޕޮއިންޓާ އެކު އެވެ. ގުރޫޕް ސްޓޭޖުގައި ރެއާލްގެ ފަހު މެޗުގައި އެ ޓީމު ނިކުންނާނީ އެފްސީ ސަލްޒްބާގާ ދެކޮޅަށެވެ.