މަރަދޫ އާއި މަރަދޫފޭދޫ އިން ދިރިއުޅުމަށް ދޫކުރާ ބަންޑާރަ ގޯއްޗަށް އެދި ހުށަހެޅުމުގެ މުއްދަތު އިތުރުކޮށްފި
03 ޖުލައި 2025 ވާ ބުރާސްފަތި ދުވަހުގެ 13:00 އަށް ފޯމު ހުށަހެޅުމުގެ މުއްދަތު ވަނީ އިތުރު ކޮށްފައިވާ
އައްޑޫ ޑިވެލޮޕްމެންޓް ޕްރޮޖެކްޓްގެ ދަށުން އައްޑޫސިޓީގައި މިހާރު އަޅަމުންދާ ޑީޓުއަރ ބްރިޖްގެ 95 އިންސައްތަ މަސައްކަތް މިހާރުވަނީ ނިމިފައި
އައްޑޫސިޓީ މަރަދޫ އާއި މަރަދޫފޭދޫ އިން ދިރިއުޅުމަށް ދޫކުރާ ބަންޑާރަ ގޯއްޗަށް އެދި ފޯމު ހުށަހެޅުމުގެ މުއްދަތު އިތުރުކޮށްފި އެވެ.
ކުރިން އޮތް ގޮތުން ދެ އަވަށުން ދޫކުރަން ނިންމި ގޯތިތަކަށް އެދުމުގެ ފުރުސަތު ހަމަވާނީ މި މަހުގެ 24 އަށެވެ.
ރާއްޖެއެމްވީއާއި ވާހަކަދައްކަވަމުން މަރަދޫ ކައުންސިލު އެގްޒެކެޓިވް މަރިޔަމް ސާއިދާ ވިދާޅުވީ މިގޮތަށް ނިންމީ ފޯމު ހުށަހެޅުމަށް ދެވިފައިވާ މުއްދަތުގެ ތެރޭގައި ޢީދު ބަންދު އައުމާއި ފޯމު ހުށަހަޅާ މީހުންގެ ޢަދަދު ގިނަވުމާއި އަދިވެސް ފޯމުލާން ބޭނުންވާ ގިނަބަޔަކު ތިބިކަން ފާހަގަކުރެވޭތީ އެފަރާތްތަކަށް ފުރުސަތު ދިނުމުގެ ގޮތުން، 03 ޖުލައި 2025 ވާ ބުރާސްފަތި ދުވަހުގެ 13:00 އަށް ފޯމު ހުށަހެޅުމުގެ މުއްދަތު އިތުރު ކޮށްފައިވާ ކަމަށެވެ.
މަރަދޫ އާއި މަރަދޫފޭދޫން ގޯއްޗަށް ހުޅުވައިލީ މިދިޔަ މަހުގެ ކުރީކޮޅު އެވެ. އެގޮތުން މަރަދޫން 175 ގޯތި އަދި މަރަދޫފޭދޫން 76 ގޯއްޗަށް ހުޅުވައިލި އެވެ. ދެ އަވަށުން ވެސް ދޫކުރަނީ 1،500 އަކަފޫޓްގެ ގޯއްޗެވެ.
ސާއިދާ ވިދާޅުވީ މި ގޯތިތައް ދޫކުރާނީ އަލަށް ހިއްކާފައިވާ ބިންތަކުން ކަމަށާއި މިބިމުގަ ލޭންޑްޔޫސް ޕްލޭން ހަދާ ނިމިފައިވާ ކަމަށެވެ.
2023 ގައި އައްޑޫގެ އިތުރު ހަތަރު އަވަށަކުން ވެސް 1،000 ގޯތި ދޫކޮށްފައިވެ އެވެ. އެއީ ހިތަދޫން 500، ފޭދޫން 300، ހުޅުދޫން 100 އަދި މީދޫން 100 ގޯއްޗެވެ.
އައްޑޫގެ ރައްޔިތުންނަށް ދިމާވެފައިވާ ބޯހިޔާވަހި ކަމަށް ހައްލު ގެނެސްދިނުމަށް މުޅި އައްޑޫ ސިޓީގެ ހުރިހާ ރަށަކުން ވަނީ 228 ހެކްޓަރުގެ ބިން ހިއްކާފައެވެ.
އައްޑޫން ބިން ހިއްކާފައިވަނީ ރިސޯޓު ތަރައްޤީ ކުރުމަށާއި ގެދޮރުގެ މަޝްރޫތައް ހިންގުމުގެ އިތުރުން ވިޔަފާރި ބޭނުންތަކަށް ޚާއްސަކޮށްގެންނެވެ. އެގޮތުން މަރަދޫ އަދި މަރަދޫ ފޭދޫގައި 76 ހެކްޓަރުގެ ބިން ވަނީ ހިއްކާފައެވެ. އަދި ހިތަދޫގައި 80 ހެކްޓަރު ވަނީ ހިއްކާފައެވެ.
މީގެ އިތުރުން ރިސޯޓުގެ ގޮތުގައި ތަރައްޤީކުރާ ތިން ރަށަށް، ރަށަކަށް 8.3 ހެކްޓަރުގެ މަގުން 25 ހެކްޓަރުގެ ބިން އަދި ހަންކެޑެގައި 4.72 ހެކްޓަރުގެ ބިން ވަނީ ހިއްކާފައެވެ. މި ރަށްތައް ބީލަމަށް ހުޅުވާލަން ބޭނުންވާތީ، އައްޑޫ ސިޓީ ކައުންސިލުން މިހާރު ވަނީ މި ރަށްތަކަށް ކިޔާނެ ނަންތައްވެސް ފާސްކޮށްފައެވެ. އެގޮތުން އެ ކައުންސިލުން ދީފައިވާ ނަންތަކަކީ "ބޮލިހެރަ" އާއި "ދޮންދީނިހެރަ" އަދި "ދޮންހެރަ" އެވެ.
