އުއްތަމަ ފަނޑިޔާރުގެ ރިޓަޔަމަންޓް އިނާޔަތާ މެދު ގޮތެއް ނިންމާނީ ޕޭ ކޮމިޝަނުންކަމަށް ކޮމިޓީން ފާސްކޮށްފި
މިހާރު ގަވާއިދު ބުނާ ގޮތުން އުމުރުން 55 އަހަރުވުމުން ރިޓަޔާކުރައްވާ ފަނޑިޔާރުންނަށް އިނާޔަތް ލިބޭނީ 10 އަހަރު ފަނޑިޔާރުކަން ކުރައްވާފައިވާނަމަ
އުއްތަމަ ފަނޑިޔާރު، އަހުމަދު މުއުތަސިމް އަދުނާން
އުއްތަމަ ފަނޑިޔާރުގެ މަގާމުގައި ހުންނަވާ ބޭފުޅަކު ރިޓަޔާ ކުރައްވައިފި ނަމަ، އެ ބޭފުޅަކަށް ބޮޑު އެލަވަންސެއް ދިނުމަށް ޖުޑީޝަލް ސާވިސް ކޮމިޝަން (ޖޭއެސްސީ)ން ރައްޔިތުންގެ މަޖިލީހުގައި އެދިފައިވާތީ، އެކަމުގައި އަމަލު ކުރަން ޖެހޭނީ ނެޝަނަލް ޕޭ ކޮމިޝަނުން ނިންމާ ގޮތަށް ކަމަށް މަޖިލީހުގެ ކަމާއި ގުޅުން ހުރި ކޮމިޓީން ނިންމައިފިއެވެ.
މާލިއްޔަތު ކޮމިޓީން އެގޮތަށް ނިންމާފައި ވަނީ ހޯމަ ދުވަހު އެވެ. ކޮމިޓީގެ މެމްބަރުން ނިންމާފައި ވަނީ ފަނޑިޔާރުންގެ ގާނޫނުގެ ދަށުން ޖޭއެސްސީއަށް ލިބިފައިވާ ބާރާއި އެކު، ފަނޑިޔާރުން ރިޓަޔާވުމުން ދޭން ޖެހޭ އިނާޔަތް ކަނޑައެޅުމުގެ ބާރު ލިިބިފައި ވީ ނަމަވެސް، އެ އިނާޔަތް ދޭންވާނީ ދައުލަތުގެ މުސާރައިގެ ސިޔާސަތުގެ ގާނޫނުގެ ދަށުން ނެޝަނަލް ޕޭ ކޮމިޝަނުން ކަނޑައަޅާ ގޮތެއްގެ މަތިން ކަމަށެވެ.
މީގެ އިތުުރުން މިއީ ސަރުކާރުން އުފުލަން ޖެހޭނެ އިތުރު ބުރައެއް ކަމަށް ފާހަގަކޮށް އެކަމާ ގުޅޭ ގޮތުން ފިނޭންސް މިނިސްޓްރީގެ ލަފައެއް ހޯދުމަށް ވެސް މާލިއްޔަތު ކޮމީޓީން ނިންމާފައެވެ.
ފަނޑިޔާރުންގެ ރިޓަޔާމަންޓް ގާނޫނު އިސްލާހުކުރުމުގެ މަސައްކަތް ކޮމިޓީން އަންނަނީ ކުރަމުންނެވެ. ސުޕްރީމް ކޯޓުގެ ތިން ފަނޑިޔާރަކު ކުއްލި ގޮތަކަށް ސަސްޕެންޑުކޮށް ކޯޓު 'ހުއްޓުވާލި'ކަމަށް ތުހުމަތުކުރެވިފައި އޮއްވައި މުއުތަސިމް ވަނީ ރިޓަޔާ ކުރައްވަން ހުށަހަޅުއްވާފައެވެ. އުއްތަމަ ފަނޑިޔާރު ރިޓަޔަރ ކުރައްވައިފި ނަމަ ލިބޭ އިނާޔަތްތަކަށް ޖޭއެސްސީން ބަދަލުތަކެއް ހުށަހެޅުއްވީ އޭގެ ފަހުންނެވެ.
އުއްތަމަ ފަނޑިޔާރު ރިޓަޔަރކުރައްވާ ނަމަ އިތުރު އިނާޔަތްތަކެއް ދޭން އެ ކޮމިޝަނުން ވަނީ މަޖިލީހަށް ހުށަހަޅާފައެވެ. އެގޮތުން އެލަވަންސެއްގެ ގޮތުގައި މަހަކު 70،000 ރުފިޔާ ދިނުމަށް ވަނީ އެދިފައެވެ. އެއީ ދަތުރުފަތުރުގެ އެލަންސް (ޑްރައިވަރެއްގެ މުސާރަ އާއި ޕެޓްރޯލް) އާއި ލިވިން އެލަވަންސްގެ ގޮތުގައެވެ.
އޭގެ އިތުރުން، ރިޓަޔާމަންޓް އެލަވަންސް ދިނުމުގައި ހިދުމަތް ކުރި މުއްދަތުގެ ގޮތުގައި ފަނޑިޔާރު ކަމުގައި ހޭދަވި މުއްދަތުގެ އިތުރުން މުޅި ދައުލަތަށް ހިދުމަތް ކުރި މުއްދަތު ހިމެނުމަށްވެސް ވަނީ އެދިފައެވެ.
ރާއްޖެ އެމްވީ އަށް ވަނީ ޖޭއެސްސީން މަޖިލީހުގެ ރައީސްއަށް ފޮނުވާފައިވާ ސިޓީގެ ކޮޕީއެއް ލިބިފައެވެ. އެ ސިޓީން އެނގޭ ގޮތުގައި މިހާރު އޮތް ގޮތުން މުއުތަސިމް ރިޓަޔާކުރެއްވުމުން ގަނޑުކޮށް ލިބިލައްވާނީ 185،100 ރުފިޔާއެވެ. އެކަމަކު، ޖޭއެސްސީން ހުށަހެޅި އިސްލާހުތަކާ އެކު އެ އަދަދު 493،600 ރުފިޔާއަށް ބޮޑުވާނެއެވެ. އަދި، މިހާރު މަހަކު އެ މަނިކުފާނަށް ލިބެން އޮތް 47،182.50 ރުފިޔާ 70،000 ރުފިޔާއަށް ބޮޑުވާނެއެވެ.
މިހާރު ގަވާއިދު ބުނާ ގޮތުން އުމުރުން 55 އަހަރުވުމުން ރިޓަޔާކުރައްވާ ފަނޑިޔާރުންނަށް އިނާޔަތް ލިބޭނީ 10 އަހަރު ފަނޑިޔާރުކަން ކުރައްވާފައިވާނަމަ އެވެ.
