ހޯމަ ދުވަހު ވެސް އީރާންގެ ހަމަލާތަކެއް އިސްރާއީލަށް

އިސްރާއީލާއި އީރާނާ ދެމެދު މިހާރު ހިނގަމުން އަންނަ ހަނގުރާމައިގައި، އިސްރާއީލަށް އަމާޒުކޮށް އީރާން އިން ހޯމަ ދުވަހު ވެސް ވަރުގަދަ ހަމަލާތަކެއް ދީފި އެވެ. 

ވައިގެ މަގުން އީރާން އިން ދިން މި ހަމަލާތައް އަމާޒުކޮށްފައި ވަނީ އީރާންގެ ތެލް އަވީވް އަދި ހައިފާ ސިޓީ އަށެވެ. މި ހަމަލާތަކުގައި މަދުވެގެން އިސްރާއީލްގެ ފަސް މީހަކު މަރުވެފައިވާ ކަމަށާއި، އިތުރު 100 އަށް ވުރެ ގިނަ މީހުންނަށް އަނިޔާވެފައިވާ ކަމަށް ވަނީ ރިޕޯޓުކޮށްފަ އެވެ. 

އެ ހަމަލާއާ ގުޅޭ ގޮތުން އީރާންގެ އިސްލާމިކް ރިވޮލިއުޝަނަރީ ގާޑްސް ކޯޕްސް އިން ބުނެފައި ވަނީ، ހޯމަ ދުވަހު ދެވުނު އެ ހަމަލާތައް ވަރަށް "ކާމިޔާބު" ކަމަށެވެ. މިއީ އީރާންގެ ނިއުކްލިއާ ފެސިޓީ އަށް އަމާޒުކޮށް އިސްރާއީލް އިން ދިން ހަމަލާގެ ބަދަލުގައި ދެމުން އަންނަ ހަމަލާތަކުގެ ތެރެއިން ހަމަލާ އެކެވެ.

އީރާން އިން ހޯމަ ދުވަހު ހަމަލާގައި ހައިފާ ސިޓީ ސަރަހައްދުން އެކަނި ވެސް 30 މީހުންނަށް އަނިޔާވެފައިވާ ކަމަށް ބުނެފައިވެ އެވެ. އަދި އެ ސަރަހައްދުގެ ބަނދަރު ކައިރީގައި ހުރި ހަކަތައިގެ މަރުކަޒެއްގައި އަލިފާން ރޯވެފައިވާ ކަމަށް މީޑިއާ ތަކުގައި ވަނީ ރިޕޯޓު ކޮށްފަ އެވެ. 

މީގެ އިތުރުން އިސްރާއީލްގެ ވެރި ރަށް ތެލް އަވްވީގެ މީހުން ދިރިއުޅޭ ސަރަހައްދުތަކަށާއި، އެމެރިކާގެ އެމްބަސީ ކައިރީގައި ހުރި ގިނަ އިމާރާތްތަކަކަށް ގެއްލުން ލިބިފައިވާ ކަމަށް ވެސް ރިޕޯޓުކޮށްފައިވެ އެވެ. އަދި ބައެއް އެހެން ގެއްލުންތައް ލިބިފައިވާ ކަމަށް ވެސް ބުނެފައިވެ އެވެ.

އެކަމާ ގުޅިގެން އެ ސަރަހައްދުގައި ހުރި މީހަކު ބުނެފައި ވަނީ، ހަމަލާތައް އަމާޒުވާން ފެށުމާ އެކު، ސަލާމަތްތެރިކަމާއި، ހިމާޔަތް ހޯދުމަށް ޝެލްޓަރަށް ވަންނަން ޖެހުނު ކަމަށެވެ. ނަމަވެސް މިނެޓެއްގެ ތެރޭގައި ޝެލްޓަރުގެ ދޮރު ވެސް ހަމަލާ އަމާޒުވެ ގޮސްފައިވާ ކަމަށް އޭނާ ބުންޏެވެ. 

އިސްރާއީލަށް އަމާޒުކޮށް އީރާނުން ދެމުން އަންނަ ވަރުގަދަ ހަމަލާތަކުގައި އެ ޤައުމަށް އަންނަނީ އެކި އެކި ގެއްލުންތައް ލިބެމުންނެވެ. އަދި ހަމަލާތައް ހުއްޓުވުމުގައި އެކުވެރި ޤައުމުތަކުގެ އެހީތެރިކަމަށް ވެސް އިސްރާއީލް އިން ވަނީ އެދިފަ އެވެ.