ސުޕްރީމް ކޯޓުގެ ފަނޑިޔާރު ކަމަށް ހަމީދާއި ސަލީމު އައްޔަން ކުރެއްވުމަށް ފާސްކޮށްފި
ފަނޑިޔާރު ކަމަށް ހަމީދު އައްޔަން ކުރެއްވުމަށް ފެންނަ ކަމަށް 60 މެމްބަރުން ވޯޓް ދެއްވާފައިވޭ
ސުޕްރީމް ކޯޓުގެ ފަނޑިޔާރު ކަމަށް އައްޔަން ކުރެއްވި، މުހައްމަދު ސަލީމާއި، އަބްދުﷲ ހަމީދު
ދިވެހި ރާއްޖޭގެ ސުޕްރީމް ކޯޓުގެ ފަނޑިޔާރު ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު އިސްކަން ދެއްވި މުޙައްމަދު ސަލީމް އަދި ޢަބްދުﷲ ޙަމީދު އައްޔަން ކުރެއްވުމަށް ރައްޔިތުންގެ މަޖިލީހުން ފާސްކޮށްފިއެވެ.
ސުޕްރީމް ކޯޓުގެ ފަނޑިޔާރު ކަމުގެ މަގާމު ހުސްވީ، ކުރިން އެ ފަނޑިޔާރު ކަމުގައި ތިއްބެވި ޑރ. އަޒްމިރަލްދާ ޒާހިރު އަދި އަލްއުސްތާޒު މަހާޒް އަލީ ޒާހިރު ފަނޑިޔާރު ކަމުން ވަކި ކުރުމަށް ރައްޔިތުންގެ މަޖިލީހުން ފާސް ކުރުމުންނެވެ.
އެއާއެކު ސުޕްރީމް ކޯޓަށް ކުރިމަތިލުމަށް ހުޅުވާލި ފުރުސަތުގައި 12 ފަރާތަކުން ކުރިމަތިލީއިރު، ޖުޑީޝަލް ސާވިސް ކޮމިޝަން (ޖޭއެސްސީ)ގެ އިންޓަވިއު އިން ކުރި ހޯދީ ސަލީމް އަދި ޙަމީދު އެވެ. އެއާއެކު ޖޭއެސްސީ އިން ވަނީ އެ ދެ ބޭފުޅުން ސުޕްރީމް ކޯޓަށް އައްޔަން ކުރުމަށް ރައީސް މުއިއްޒު އަށް ލަފާ ދީފަ އެވެ.
ޖޫން މަހުގެ 4 ވަނަ ކުރިއަށް ގެންދިޔަ ޖުޑިޝަރީ ކޮމެޓީގައި، ކޮމެޓީ މެންބަރުންގެ އިއްތިފާގުން ދެ ބޭފުޅުންނަށް ވެސް ރުހުންދޭން ވަނީ ފާސްކޮށްފައެވެ.
އެގޮތުން، ބުދަ ދުވަހު އޮތް ރައްޔިތުންގެ މަޖިލީހުގެ ޖަލްސާގައި، ސުޕްރީމް ކޯޓުގެ ފަނޑިޔާރު ކަމަށް ސަލީމް އަދި ޙަމީދު އައްޔަން ކުރުމަށް ވަނީ ފާސްކޮށްފަ އެވެ. ފަނޑިޔާރު ކަމަށް ހަމީދު އައްޔަން ކުރެއްވުމަށް ފެންނަ ކަމަށް 60 މެމްބަރުން ވޯޓް ދެއްވާފައިވެއެވެ. އަދި ސަލީމް ފަނޑިޔާރު ކަމަށް އައްޔަން ކުރެއްވުމަށް ފެންނަ ކަމަށް 61 މެމްބަރުން ވަނީ ވޯޓް ދެއްވާފައެވެ.
ސުޕްރީމް ކޯޓުގެ ފަނޑިޔާރު ކަމުގެ މަގާމަށް އައްޔަން ކުރެއްވި، ސަލީމް އަކީ، މިހާރު ދިވެހި ރާއްޖޭގެ ހައި ކޯޓުގެ ފަނޑިޔާރު ކަމުގައި ހުންނެވި ފަރާތެކެވެ. ސުޕްރީމް ކޯޓުގެ ފަނޑިޔާރުކަމަށް، ފަނޑިޔާރު ސަލީމްގެ ޝަރުރު ހަމަވުމާ ގުޅޭ ގޮތުން ޖޭއެސްސީ ގައި ބޮޑު ބަހުސެއް ކުރިއަށް ދިޔައިއިރު، ޖޭއެސްސީ އިން އެންމެ ފަހުން ނިންމީ ވަކީލު ކަމުގެ ހުއްދަ އަށް ހަތް އަހަރު ވެއްޖެ ނަމަ، ޝަރުތު ހަމަވާނެ ކަމަށެވެ.
މީގެ އިތުރުން ޙަމީދަކީ ހައި ކޯޓުގެ އިސް ފަނޑިޔާރުކަން މީގެ ކުރިން ކުރައްވާފައިވާ ބޭފުޅެކެވެ. ޙަމީދާ ގުޅުން ހުރި މައްސަލަ އެއް ޖޭއެސްސީ އިން ތަހުގީގު ކުރިއިރު، ފަނޑިޔާރު ކަމުން އޭނާ ވަކި ކުރުމަށް ރައްޔިތުންގެ މަޖިލީހުން ވަނީ 2022 ވަނަ އަހަރު ފާސްކޮށްފަ އެވެ. އެއީ ކުރީގެ ރައީސް ޢަބްދުﷲ ޔާމީންގެ ވެރިކަމުގައި ފަނޑިޔާރުންނަށް ދިން ފްލެޓު ގަބޫލު ކުރި މައްސަލައިގަ އެވެ.
ސުޕްރީމް ކޯޓަށް މި ދެބޭފުޅުން އައްޔަން ކުރެއްވުމާއެކު، ކޯޓުގެ ބެންޗު ފުރިހަމަވާނެއެވެ.
ސުޕްރީމް ކޯޓުގައި މި ދެބޭފުޅުންގެ އިތުރުން، މިވަގުތި ތިއްބެވީ، އުއްތަމަ ފަނޑިޔާާރު އަޙުމަދު މުއުތަސިމް އަދުނާން، ފަނޑިޔާރު އައިޝާ ޝުޖޫން މުޙައްމަދު، ފަނޑިޔާރު އަލީ ރަޝީދު ޙުސެއިން، ފަނޑިޔާރު ޑޮކްޓަރު މުޙައްމަދު އިބްރާހީމް އަދި ފަނޑިޔާރު ޙުސެއިން ޝަހީދު އެވެ. މީގެ ތެރެއިން ޝަހީދު ސުޕްރީމް ކޯޓަށް އައްޔަން ކުރީ މި ސަރުކާރުންނެވެ.
އެއީ ސުޕްރީމް ކޯޓުގެ ފަނޑިޔާރުކަމުން އަލްއުސްތާޛް ހުސްނުއް ސުއޫދު އިސްތިއުފާ ދެއްވުމުންނެވެ.
ފަނޑިޔާރު ކަމުގެ މަގާމުން ސުއޫދޫ އިސްތިއުފާ ދެއްވީ، ސުޕްރީމް ކޯޓުގައި ކުރިއަށް ދިޔަ ދުސްތޫރީ މައްސަލައެއްގެ އަޑު އެހުން ފަށަން ކުޑަތަން ވެފައި ވަނިކޮށް، ޖޭއެސްސީ އިން ކުއްލި ގޮތަކަށް އޭނާ ސަސްޕެންޑު ކުރި ފަހުންނެވެ. ފަނޑިޔާރު ކަމުން ސުއޫދު އިސްތިއުފާ ދެއްވީ ފަނޑިޔާރު ގެއަށް ރައީސް މުއިއްޒު އަދި ސަރުކާރުން ނުފޫޒު ފޯރުވަމުން ގެންދަވާތީ، އެކަމާ އިހުތިޖާޖު ކުރެއްވުމުގެ ގޮތުންނެވެ.
