އީރާނާއި އެމެރިކާގެ މަޝްވަރާތައް ބުރާސްފަތި ދުވަހު ކުރިއަށް ދާނެ ކަމަށް ޓްރަމްޕް ވިދާޅުވެއްޖެ
ޓްރަމްޕް ވިދާޅުވީ މަޝްވަރާތަކުގައި އީރާނުން އެދެނީ ކުރެވެން ނެތް ކަންތައްތަކެއް ކަމަށާއި، އީރާނުން ދޫ ދޭން ޖެހޭ ތަނުގައި ދޫ ދޭން ވެސް ބޭނުން ނުވާ ކަމަށް.
އެއާ ފޯސް ވަން އަށް އަރައި ވަޑައިގަތުމުގެ ކުރިން ޓްރަމްޕް ނޫސްވެރިންނާ ވާހަކަ ދައްކަވަނީ
އީރާނާއި އެމެރިކާއާ ދެމެދު ކުރިއަށް ގެންދަމުން އަންނަ ނިއުކްލިއާ މަޝްވަރާތަކުގެ އިތުރު ބައްދަލުވުމެއް، ބުރާސްފަތި ދުވަހު އޮންނާނެ ކަމަށް އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެއްޖެ އެވެ.
ހޯމަ ދުވަހު ޓްރަމްޕް ވިދާޅުވެފައި ވަނީ އީރާނަކީ ވަރަށް މޮޅަށް މަޝްވަރާ ކުރާ ޤައުމެއް ކަމަށެވެ. އެހެން ނަމަވެސް. މައިގަނޑު ހުރަހަކަށް ވެފައި ވަނީ ޔުރޭނިއަން އެންރިޗްމަންޓާ ގުޅޭ މައްސަލަ ކަމަށް ވެސް ޓްރަމްޕް ވިދާޅުވި އެވެ.
އެމެރިކާގެ ރިޔާސީ ގަނޑުވަރު ވައިޓް ހައުސްގައި ހޯމަ ދުވަހު އޮތް އިވެންޓެއްގައި ބައިވެރިވެ ވަޑައިގެން، ނޫސްެވެރިންނާ ވާހަކަ ދައްކަވަމުން ޓްރަމްޕް ވިދާޅުވީ، އެމެރިކާ އިން އަންނަނީ އީރާނާ ގުޅުން ހުރި ވަރަށް ގިނަ މަސައްކަތްތަކެއް ކުރަމުން ކަމަށެވެ. އަދި އެއީ ވަރަށް އުނދަގޫ މަސައްކަތްތަކެއް ކަމަށް ވެސް ޓްރަމްޕް ވިދާޅުވި އެވެ.
މީގެ އިތުރުން ޓްރަމްޕް ވިދާޅުވީ މަޝްވަރާތަކުގައި އީރާނުން އެދެނީ ކުރެވެން ނެތް ކަންތައްތަކެއް ކަމަށާއި، އީރާނުން ދޫ ދޭން ޖެހޭ ތަނުގައި ދޫ ދޭން ވެސް ބޭނުން ނުވާ ކަމަށެވެ. އަދި އީރާނުން ކޮންމެހެން ވެސް ޔުރޭނިއަން އެންރިޗްމަންޓް ބޭނުންވާ ކަމަށާއި، ނަމަވެސް އެއީ އެމެރިކާ އަށް ބަަލައި ގަނެވޭނެ ކަމެއް ނޫން ކަމަށް ވެސް ޓްރަމްޕް ވިދާޅުވެފައިވެ އެވެ.
އިތުރަށް ވާހަކަ ދައްކަވަމުން ޓްރަމްޕް ވިދާޅުވެފައި ވަނީ، އިސްރާއީލްގެ ބޮޑު ވަޒީރު ބެންޖަމިން ނަތަންޔާހޫ އާއެކު، އެހެނިހެން މައްސަލަތަކާ ގުޅޭ ގޮތުން ވެސް މަޝްވަރާ ކުރެވިފައިވާ ކަމަށެވެ. އީރާނާއި އިސްރާއީލާ ދެމެދު އޮތް މައްސަލަތަކާ ގުޅޭ ގޮތުން ެވސް މަޝްވަރާ ކުރެވިފައިވާ ކަމަށް ޓްރަމްޕް ވިދާޅުވި އެވެ.
އޮމާން އިން މެދުވެރިއެއްގެ ދައުރު އަދާ ކުރަމުން އަންނަ މި މަޝްވަރާތަކުގައި މިހާތަނަށް ވަނީ ފަސް ބައްދަލުވުމެއް ބާއްވައިފަ އެވެ. އެންމެ ފަހުގެ ބައްދަލުވުން ނިންމާލީ އިތުރު ބައްދަލުވުމެއް އޮންނާނެ ކަމުގެ ޔަގީންކަމާ އެކު އެވެ. ނަމަވެސް އޭރު ދެން ހަ ވަނަ ބައްދަލުވުން އޮންނާނެ ތާރީޚެއް ހާމަކޮށްފައި ނެތެވެ.
