އެހީ ބަހާ މަރުކަޒަކަށް ދިން ހަމަލާގައި ހަތަރު މީހަކު ޝަހީދު ކޮށްލައިފި

ޣައްޒާ އަށް ބޭނުންވާ އިންސާނީ އެހީ ބެހުމުގެ މަސައްކަތް ކުރަމުން އަންނަ މަރުކަޒަކަށް އަމާޒުކޮށް އިސްރާއީލްގެ އަސްކަރިއްޔާ އިން ދިން ހަމަލާގައި، ހަތަރު މީހަކު ޝަހީދު ކޮށްލައިފި އެވެ.

ޣައްޒާގެ ޞިއްޙީ ވުޒާރާ އިން ހާމަކޮށްފައިވާ ގޮތުގައި އެހީ ބެހުމުގެ މަސައްކަތް ކުރަމުން އަންނަ މަރުކަޒަކަށް އަމާޒުކޮށް އިސްރާއީލް އިން ވަނީ ހަމަލާ ދީފަ އެވެ. އެ ވަގުތު އެ މަރުކަޒަަށް ގިނަ ބަޔަކު އެެއްވެފައި ތިބި ކަމަށާއި، އެ ހަމަލާގައި ހަތަރު މީހަކު ޝަހީދުވެފައިވާ ކަމަށް ވަނީ ބުނެފަ އެވެ. މީގެ އިތުރުން އިތުރު ބަޔަކަށް ގިނަ ޒަޚަމުތަކެއް ލިބިފައިވާ ކަމަށް ވެސް ވަނީ ބުނެފަ އެވެ.

އިސްރާއީލްގެ އަސްކަރިއްޔާ އިން ނެރެފައިވާ ބަޔާނެއްގައި ބުނެފައި ވަނީ ޣައްޒާގައި ހުޅުވާލެވިފައިވާ ސަރަހައްދަކަށް އަމާޒުކޮށް ވަޒަން ޖަހާފައިވާ ކަމަށެވެ. އަދި އެގޮތަށް އަމަލު ކުރަން ޖެހުނީ ސިފައިންގެ ބަޔަކާ ދިމާލަށް މީހުންތަކެއް އަންނަން ފެށުމުން ކަމަށް ވެސް ބުނެފައިވެ އެވެ.

ޞިއްޙީ އޮފިޝަލުން ހާމަކޮށްފައިވާ ގޮތުގައި އިސްރާއީލްގެ ހަމަލާތަކުގައި ޝަހީދުވީ ހަތަރު މީހުންގެ ހަށިގަނޑު ވަނީ އެމްބިއުލާންސްގައި ވަގުތުން ހޮސްޕިޓަލަށް ގެންގޮސްފަ އެވެ. އެ ހަމަލާގައި ޝަހީދުވި މީހުންގެ ތެރޭގައި ހިމެނޭ، އުމުރުން 36 އަހަރުގެ ޚާލިދު ދޮޣްމާ ޝަހީދުވެފައި ވަނީ އޭނަގެ ފަސް ދަރިންނަށް ބޭނުންވާ ކާނާ ހޯދުމަށް މަރުކަޒަކަށް ގޮސް ހުއްޓަ އެވެ. އަދި އޭނާ ޝަހީދުވީ ބޮލަށް އަމާޒުކޮށް އިސްރާއީލްގެ ސިފައިން ވަޒަން ޖެހުމުންނެވެ. 

އިސްރާއީލް އިން އަންނަނީ ޣައްޒާގައި އެހީ ބަަހަމުން އަންނަ މަރުކަޒުތަކަށް އަމާޒުކޮށް ހަމަލާތައް ދީ، އެތައް ބަޔަކު ޝަހީދު ކުރަމުންނެވެ. އެގޮތުން ފާއިތުވި 24 ގަޑިއިރުގެ ތެރޭގައި އެކަނި ވެސް 104 މީހަކު ޝަހީދުކޮށްލާފައިވާ ކަމަށް ވަނީ ބުނެފަ އެވެ. އޭގެ ތެރޭގައި އެހީ ބަހާ މަރުކަޒު ތަކުން ޝަހީދުކޮށްލި ފަސް މީހުން ވެސް ހިމެނެ އެވެ. 

އިސްރާއީލް އިން އަންނަނީ ޣައްޒާ އަށް ދެމުން އަންނަ ހަަމަލާތައް އެއް ދުވަހުން އަނެއް ދުވަހަށް ވަރުގަދަ ކުރަމުންނެވެ. ޚާއްސަކޮށް އެހީ ބެހުމުގެ މަސައްކަތް ކުރަމުން އަންނައިރު ވެސް، އިސްރާއީލް އިން ދެމުން އަންނަ ހަމަލާތައް ގިނަވެފައިވާކަން ފާހަގަ ކުރެވެ އެވެ.