ކުޅުދުއްފުށީ މަށި މާލި ޕެރޭޑް، ފެނިގެން ދިޔައީ މިސަރުކާރުން ނުފުއްދާ ހުރި ވައުދުތައް
7 ޖޫން 2025 | ހޮނިހިރު 15:43މި ޕެރޭޑްގައި ސިޔާސީ ފަރާތްތަކުން ވެފައިވާ ވައުދުތަކާއި ޤައުމުގައި ހިނގާ ކަންކަމާމެދު މީހުން ދެކޭގޮތް އަދި ދުނިޔެއާއި ރާއްޖޭގައި އެދުވަސްވަރު އެންމެ ޓްރެންޑިން ކަންކަން ދައްކުވައިދޭ މާއްޔާއި ފުޅަނދު ފެނިގެންދާނެ
ކުޅުދުއްފުށީ މަށި މާލި ޕެރޭޑް
ކުޅުދުއްފުށީގައި ޒަމާނުއްސުރެ ކޮންމެ އަހަރުކުވެސް ބާއްވާ މަށި މާލި ޕެރޭޑުގައި މިއަހަރުވެސް ފެނިގެން ދިޔައީ މި ސަރުކާރުން ނުފުއްދާ ހުރި ވައުދުތަކެވެ.
ޒަމާނުންސުރެ ކޮންމެ އީދެއްގައި ކުޅުދުއްފުށިގައި ކުރިއަށް ގެންދާ މި ޕެރޭޑްގައި މަށިމާލީގެ އިތުރުން ބޭރު އަދި ދިވެހި މަޝްހޫރު ސަހުސިއްޔަތުތައް، ސިޔާސީ ފަރާތްތައް، ހާދިސާތަކުގެ ރޯލްޕްލޭ ޑްރާމާތައް، ސިޔާސީ ފަރާތްތަކުން ވެފައިވާ ވައުދުތަކާއި ޤައުމުގައި ހިނގާ ކަންކަމާމެދު މީހުން ދެކޭގޮތް، މޫވީ ކެރެކްޓަރސް، އަދި ދުނިޔެއާއި ރާއްޖޭގައި އެދުވަސްވަރު އެންމެ ޓްރެންޑިން ކަންކަން ދައްކުވައިދޭ މާއްޔާއި ފުޅަނދު ފެނިގެންދާ ޕެރޭޑެކެވެ.
ކުޅުދުއްފުށީގެ މި އިވެންޓުން ފެނިގެންދިޔާއީ، ރައީސް ޑރ. މުޙައްމަދު މުޢިއްޒު ބައްދަލުކުރެއްވި ސައުދީގައި ރަސްކަން ކުރައްވާ ޝާހީ އާއިލާ އަށް ނިސްބަތްވާ "ޕްރިންސް"އާ ބެހޭގޮތުން "ޕްރިންސް ފްރޮމް ޓެމޫ"ގެ ނަމުގައި ތައްޔާރުކޮށްފައިވާ ކެރެކްޓާއެކެވެ. އަދި ވެރިރަށް މާލެ އާއި ރަސްމާލެއާ ދެމެދު އަޅާނެ ކަމަށް އިއުލާނުކޮށްފައިވާ ކަނޑުއަޑީގެ ޓަނަލް އާއި ބެހޭގޮތުން ހަދާފައިވާ "ރަސްމާލެ ގުނބޯ ޓަނަލް" ޖަހާފައިވާ ކެރެކްޓާއަކާއި "ޑިސްކައުންޓް ދެވުނު ކަރަންޓް ބިލް" ކެރެކްޓާއަކާއި ސަރުކާރުން ފަށަން ނިންމާފައިވާ "ޓެކްސީ ލައިން" އަދި ދާދި ފަހުން ޑރ. މުޙައްމަދު މުޢިއްޒު ހަދާފައިވާ ވޯރލްޑް ރެކޯޑާއި ގުޅިގެން ތައްޔާރު ކޮށްފައިވާ "ޕްރެސް ވޯރލްޑް ރިކޯޑް" އަދި "ކަޅު ދިގު ޕްރެސް" ގެނަމުގައި ތައްޔާރު ކޮށްފައިވާ ކެރެކްޓާއެއް އެ ޕެރޭޑުގައި ވަނީ ފެނިގެން ގޮސްފައެވެ.
މީގެ އިތުރުން "ބެންކޮކް އާސަންދާ" ގެ ނަމުގައި ހަދާފައިވާ ކެރެކްޓާއެއްވެސް ތައްޔާރު ކޮށްފައިވާއިރު "ދިރުވާލި ސުކޫލް" ކެރެކްޓާއަކާއި "ބާރުވެރި ހުސްގޮނޑި" ގެ ނަމުގައި ތައްޔާރު ކޮށްފައިވާ ކެރެކްޓާއެއް އެ ޕެރޭޑުން ވަނީ ފެނިގެންގޮސްފައެވެ.
ކޮންމެ އީދެއްގެ ދެވަނަ ދުވަހު ހަވީރު ކުރިއަށްދާ މި ޕެރޭޑަކީ ކުޅުދުއްފުށިގެ ރައްޔިތުން އިންތިޒާމު ކޮށްގެން ކުރިއަށްގެންދާ ޕެރޭޑެކެވެ. މި ޕެރޭޑުގައި ދައްކުވައިދޭ މާލިތައް އެކި ރައްޔިތުން އެކި ތަންތަނުގަ އަމިއްލަޔަށް ހަދައިގެން އައިސް ޕެރޭޑުގައި ބައިވެރިވެއެވެ.
