އީރާނުގައި ޔޫރޭނިއަމް ފައްކާ ކުރިއަސް ނުކުރިއަސް އެއީ އެމެރިކާ އާ ކޮން ބެހޭ ކަމެއް؟: ރޫހާނީ ލީޑަރު އާޔަތުﷲ
އެމެރިކާ އިން ހުށަހަޅާފައިވާ ހުށަހެޅުމަކީ 100 އިންސައްތަ އީރާނުގެ މަސްލަހަތާ ދެކޮޅު އެއްޗެއް ކަމަށާއި އެމެރިކާގެ ހަރުކަށި އަދި ބޮޑާ ވެރިން ތަކުރާރުކޮށް ޑިމާންޑް ކުރަނީ އީރާނުގެ ނިއުކްލިއަރ ޕްރޮގްރާމް ހުއްޓާލުމަށް ކަމަށާއި އެހެން ނަމަވެސް އީރާނުން ޔޫރޭނިއަމް ފައްކާ ކުރާނެކަން ނުވަތަ ނޫންކަން ނިންމުމުގެ ހައްގު ލިބިގެންވަނީ ކާކަށްތޯ އާޔަތު ﷲ ޚާމަނާއީ ސުވާލު ކުރެއްވިއެވެ.
އީރާނުގެ އިސްލާމީ ޖުމްހޫރިއްޔާގެ ބާނީ އަވަހާރަވިތާ 36 ވަނަ އަހަރީ ދުވަސް ފާހަގަ ކުރުމަށް ބޭއްވި ރަސްމިއްޔާތުގައި އަޔަތުالله ޚާމަނާއީ އެއްވެ ތިބި މީހުންނަށް އަތްޕުޅުން އިޝާރާތް ކުރައްވަނީ
ޔޫރޭނިއަމް ފައްކާ ކުރުމަކީ ނިއުކްލިއަރ ޕްރޮގްރާމުގެ މައިގަނޑު ކަމެއް ކަމަށާއި، އީރާނުން ޔޫރޭނިއަމް ފައްކާ ކުރުން ހުއްޓާލުމަށް އެމެރިކާ އިން ހުށަހަޅާފައިވާ ހުށަހެޅުން ބަލައިނުގަންނަ ކަމަށް އީރާނުގެ އިސްލާމީ އިންޤިލާބުގެ ލީޑަރު އާޔަތު ﷲ ސައްޔިދު އަލީ ޚާމަނާއީ ވިދާޅުވެއްޖެއެވެ.
އެމެރިކާގެ ފުރަތަމަ ބަހަކީ އީރާނުގައި ނިއުކްލިއަރ ސިނާއަތެއް އޮވެގެން ނުވާނެ ކަމަށާއި އެމެރިކާ އަށް ބަރޯސާވާން ޖެހޭނެ ކަމަށް ބުދަ ދުވަހު ދެކުނު ތެހެރާނުގައި ހުންނަ އިމާމް ޚުމައިނީގެ މަޤްބަރާގައި ދެއްވި ތަޤްރީރެއްގައި އީރާނުގެ އިސް ލީޑަރު ވިދާޅުވިއެވެ.
"އެމެރިކާގެ ބޭކާރު ވާހަކަތަކަށް އަޅުގަނޑުމެންގެ ޖަވާބު ސާފެވެ: އެމީހުންނަށް މިކަމުގައި އެއްވެސް ކަމެއް ނުކުރެވޭނެއެވެ،" އިސްލާމީ ޖުމްހޫރިއްޔާގެ ބާނީ އަވަހާރަވިތާ 36 އަހަރު ފުރުނު ދުވަސް ފާހަގަ ކުރުމަށް ބޭއްވި އެއްވުމުގައި ލީޑަރު ވިދާޅުވިއެވެ.
މިއީ އީރާނާއެކު އެމެރިކާ އިން ކުރިއަށް ގެންދާ ނިއުކްލިއަރ މަޝްވަރާތަކާ ގުޅޭގޮތުން އީރާނު ސަރުކާރުގެ ސިޔާސަތު ބަޔާން ކޮށްދެއްވުމަށް ދެއްކެވި ވާހަކަފުޅެކެވެ. ޓްރަމްޕް ވިދާޅުވެފައިވަނީ އީރާނަށް "އެއްވެސް ވަރަކަށް ޔުރޭނިއަމް ފައްކާ ކުރުމުގެ ހުއްދައެއް ނުދެވޭނެ" ކަމަށެވެ.
ޓްރަމްޕް މިހެން ވިދާޅުވި އިރު، އެމެރިކާގެ މީޑިއާތަކުން އަންގާރަ ދުވަހު އާންމު ކުރި ރިޕޯޓެއްގައި އެމެރިކާ އިން އީރާނަށް ހުށަހަޅަމުންދަނީ "ވަކި މުއްދަތަކަށް އީރާނުގެ ބިމުގައި މަދު މިންވަރަކަށް ދަށް ފެންވަރެއްގައި ޔުރޭނިއަމް އެންރިޗްކުރުމުގެ" ހުއްދަ ދިނުމަށް ކަމަށް ބުނެފައިވެއެވެ.
"މި ހުށަހެޅުމުގެ ދަށުން، އެމެރިކާ އިން އީރާނަށް ނިއުކްލިއަރ ހަކަތައިގެ ރިއެކްޓަރުތައް އެޅުމަށް މަގުފަހި ކޮށްދޭނެއެވެ. އަދި ސަރަޙައްދީ ޤައުމުތަކުގެ ބައިވެރިވުމާއެކު މެނޭޖުކުރާ އެންރިޗްމަންޓް ފެސިލިޓީތައް އެޅުމާ ބެހޭ މަޝްވަރާތައް ކުރިއަށް ގެންދާނެއެވެ،" ދަ ނިއު ޔޯކް ޓައިމްސް ގައި ލިޔެފައިވެއެވެ. "އީރާނަށް މި ވައުދުތަކުގެ މަންފާ ލިބެން ފެށުމުން، އެ ޤައުމުގައި ހިންގާ ހުރިހާ އެންރިޗްމަންޓެއް ހުއްޓާލަން ޖެހޭނެއެވެ."
އާޔަތު ﷲ ޚާމަނާއީ ވިދާޅުވީ، ޔުރޭނިއަމް އެންރިޗްކުރުމަކީ ނިއުކްލިއަރ މަސައްކަތުގެ މައިގަނޑު ކަމަށެވެ. އަދި ދުޝްމަނުންވެސް އެންރިޗްމަންޓް މަސައްކަތް ކުރަމުން ގެންދާ ކަމަށް އޭނާ ވިދާޅުވިއެވެ.
"ކަލޭމެން ކީއްވެ މިކަމަށް އަތްބާނަނީ؟ އީރާނުގައި އެންރިޗްމަންޓް އޮތަސް ނެތަސް، އެއީ ކަލޭމެންނާ ކޮން ބެހޭ ކަމެއް؟ ތިޔައީ ކޮން ބައެއް؟" ލީޑަރު އެމެރިކާ އަށް އިޝާރާތް ކުރައްވާ ވިދާޅުވިއެވެ.
އާޔަތު ﷲ ޚާމަނާއީ ވިދާޅުވީ އީރާނުން ވަނީ ވަރަށް ބުރަ މަސައްކަތުން ފުރިހަމަ ނިއުކްލިއަރ ފިއުލް ސައިކަލް އެއް ހާސިލުކޮށްފައި ކަމަށެވެ. އަދި ނިއުކްލިއަރ ސިނާއަތަކީ ހަމައެކަނި ހަކަތައަށް އެކަނި ބޭނުންކުރާ އެއްޗެއް ނޫން ކަމަށް އޭނާ ވިދާޅުވިއެވެ.
"ނިއުކްލިއަރ ސިނާއަތަކީ މައި ސިނާއަތެކެވެ. ގިނަ ޢިލްމީ ދާއިރާތަކަށް ނިއުކްލިއަރ ސިނާއަތުގެ އަސަރު ފޯރައެވެ."
"އަނެއްކޮޅުން، ޤައުމީ މިނިވަންކަމުގެ މާނައަކީ އެކަހެރިވުމެއް ނޫނެވެ. އަދި ދުނިޔެއާ ގުޅުން ނެތުމެއްވެސް ނޫނެވެ. އޭގެ މާނައަކީ އީރާނުގެ ޤައުމާއި ރައްޔިތުން އަމިއްލަ ފައިމައްޗަށް ތެދުވެ ތިބުމެވެ." އާޔަތު ﷲ ޚާމަނާއީ ވިދާޅުވިއެވެ.
"ޤައުމީ މިނިވަންކަމުގެ މާނައަކީ ޤައުމު އެމެރިކާ އާއި އެފަދަ ފަރާތްތަކުގެ ރަތް ނުވަތަ ފެހި ސިގުނަލަށް ބަލަން ނުތިބުމެވެ. ޤައުމީ މިނިވަންކަމުގެ މައިގަނޑު އުންސުރަކީ 'އަޅުގަނޑުމެންނަށް ކުރެވޭނެ' މި އުސޫލެވެ،" އާޔަތު ﷲ ޚާމަނާއީ ވިދާޅުވިއެވެ.
"އެމެރިކާ އިން ހުށަހަޅާފައިވާ ހުށަހެޅުމަކީ 100 އިންސައްތަ އަޅުގަނޑުމެންގެ މަސްލަހަތާ ދެކޮޅު އެއްޗެކެވެ... އެމެރިކާގެ ހަރުކަށި އަދި ބޮޑާ ވެރިން ތަކުރާރުކޮށް ޑިމާންޑް ކުރަނީ އަޅުގަނޑުމެން ނިއުކްލިއަރ ޕްރޮގްރާމް ހުއްޓާލުމަށެވެ. އީރާނުން ޔޫރޭނިއަމް ފައްކާ ކުރާނެކަން ނުވަތަ ނޫންކަން ނިންމުމުގެ ހައްގު ލިބިގެންވަނީ ކާކަށްތޯއެވެ؟" އާޔަތު ﷲ ޚާމަނާއީ ސުވާލު ކުރެއްވިއެވެ.
ތެހެރާނުން އަބަދުވެސް ބުނަމުން އައިސްފައިވަނީ އެމީހުން ބޭނުން ވަނީ ސުލްހަވެރި މަގްސަދުތަކަށްޓަކައި ނިއުކްލިއަރ ޓެކްނޮލޮޖީގެ ހުނަރު ކުރިއެރުވުމަށް ކަމަށެވެ. އަދި ނިއުކްލިއަރ ހަތިޔާރު އުފެއްދުމަށް މަސައްކަތް ކުރަމުން ދާކަމަށް ހުޅަނގުގެ ބާރުތަކުން ކުރާ ތުހުމަތުތައް އީރާނުން ދަނީ ދޮގު ކުރަމުންނެވެ.
