ރަޝިޔާ އާއި ޔުކްރެއިންއާ ދެމެދު ހިނގަމުން އަންނަ ހަނގުރާމައިގައި، ރަޝިޔާގެ ދެ ސަރަހައްދަކަށް އަމާޒުކޮށް ޔުކްރެއިން އިން ޑްރޯން ހަމަލާތަކެއް ދީފި އެވެ. 

ރަޝިޔާގެ ކާސްކް ސަރަހައްދު އަދި ވޮރޮނޭޝް ސަރަހައްދަށް އަމާޒުކޮށް ޔުކްރެއިން އިން އާދީއްތަ ދުވަހުގެ ރޭ ދިން ޑްރޯން ހަމަލާތަކުގައި ބައެއް ގެތަކުގައި އަލިފާން ރޯވެ، ސަރަހައްދުގެ ބައެއް މަގުތައް ބޭނުން ކުރުމަށް ވަނީ ހުރަސް އެޅިފަ އެވެ. 

މީޑިއާ ތަކުގައި ބުނެފައިވާ ގޮތުން ޔުކްރެއިން އިން ފޮނުވާލި ޑްރޯން ހަމަލާތަކުގެ ތެރެއިން 162 ޑްރޯން ހަމަލާއެއް ރަޝިޔާގެ ވައިގެ ދިފާއީ ބާރުތަކުން ވަނީ ނައްތާލައިފަ އެވެ. މީގެ ތެރެއިން 57 ޑްރޯން ވަނީ ޔުކްރެއިންއާ އިންވެގެން އޮންނަ ކާސްކް ސަރަހައްދުގައި ވައްޓާލައިފަ އެވެ.

ކާސްކް ސަރަހައްދުގެ ވަގުތީ ގަވަރުނަރު އެލެކްސެންޑާ ކިންޝެޓެއިން ވިދާޅުވެފައިވާ ގޮތުގައި، ރަޝިޔާ އިން ނައްތާލި ބައެއް ޑްރޯން ތަކުގެ ސަބަބުން ގިނަ ގެތަކަކަށް ވަނީ ގެއްލުންވެފަ އެވެ. އޭނާ ހާމަ ކޮށްފައިވާ ގޮތުގައި ވޮރޮނޭޝް ސަރަހައްދުގައި ވަނީ 16 ޑްރޯންއެއް ނައްތާލެވިފަ އެވެ. އެ ސަރަހައްދުގައި ޑްރޯންތައް ނައްތާލުމުގެ ސަބަބުން ކަރަންޓު ނަރުތަކެއްގައި ޖެހި ގެއްލުން ތަކެއް ވަނީ ލިބިފަ އެވެ. 

ކާސްކް އަދި ވޮރޮނޭޝް ސަރަހައްދުގެ ގަވަރުނަރުން ހާމަކޮށްފައިވާ ގޮތުގައި ވައްޓޭލެވުނު ޑްރޯންތަކުގެ ސަބަބުން، ދެ ސަރަަހައްދުގެ ވެސް ބައެއް ގެތަކަށް ގެއްލުން ލިބިފައިވެ އެވެ. އަދި ބައެއް އެހެން ކަހަަލަ ގެއްލުންތަކެއް ލިބުނު ނަމަވެސް، މި ހާދިސާގައި އެއްވެސް މީހަކަށް އަނިޔާވެފައި ނުވާ ކަަމަށް ވަނީ ހާމަކޮށްފަ އެވެ.

މި ހަމަލާތައް ދީފައި މި ވަނީ ރަޝިޔާ އާއި ޔުކްރެއިންއާ ދެމެދު ހިނގަމުން އަންނަ ހަނގުރާމަ ނިމުމަކަށް ގެނައުމަށްޓަކައި މަޝްވަރާތައް ކުރަމުން އަންނަ ދަނޑިވަޅެއްގަ އެވެ. މި މަޝްވަރާތުގައި މިހާތަނަށް ވަކި ގޮތެއް ނިމިފައި ނުވާއިރު، ޔުކްރެެއިން އިން އޮތީ ހަނގުރާމަ ހުއްޓާލުމަށް އެއްބަސްވެގެންނެވެ. ނަމަވެސް، ރަޝިޔާ އިން އެކަމާ ދެކޮޅު ހަދާތީި، މަޝްވަރާތަކުގައި އެއްބަސްވުމަކަށް ވާސިލުވުމުގައި ދަތިތަކެއް ހުރި ކަމަށް ވަނީ ރިޕޯޓު ކޮށްފަ އެވެ.