އެމްޓީޑީސީގެ އަހަރީ އާންމު ޖަލްސާ އޮގަސްޓް 28ގައި!
ފައިދާގެ ގޮތުގައި 6.7 މިލިއަން ރުފިޔާ ލިބިފައިވޭ
އެމްޓީޑީސީގެ ފުރަތަމަ އަހަރީ އާންމު ޖަލްސާގެ ތެރެއިން
މޯލްޑިވްސް ޓޫރިޒަމް ޑިވެލޮޕްމަންޓް ކޯޕަރޭޝަން (އެމްޓީޑީސީ) ގެ އަހަރީ އާއްމު ޖަލްސާ މާދަމޭ ބާއްވަން ނިންމައިފިއެވެ.
މިޖަލްސާ އޮންނާނީ އޮގަސްޓް މަހުގެ 28 ވާ ހޯމަދުވަހުގެ ރޭ 21:00 ޖަހާއިރު އިސްލާމީ މަރުކަޒުގެ ޖަލްސާކުރާ މާލަމުގައެވެ. އެމްޓީޑީސީން ބުނީ ޖަލްސާގައި ބައިވެރިވާން ބޭނުންވާ ފަރާތްތަކަށް ހޯމަދުވަހުގެ ރޭ 8:15 އިން ފެށިގެން 8:51 އަށް ރަޖިސްޓްރީ ކުރުމުގެ ފުރުޞަތު ހުޅުވާލާފައިވާ ކަމަށެވެ.
އަދި މި ޖަލްސާގައި ބައިވެރިވެވޭނީ އޮގަސްޓު މަހުގެ 27 ވަނަ ދުވަހުގެ ނިޔަލަށް އެކުންފުނީގެ ހިއްސާދާރުންގެ ގޮތިގައި ރަޖިސްޓްރީވެފައިވާ ފަރާތްތަކަށެވެ.
މިއަހަރުގެ ދެވަނަ ކުއާޓަރގައި އެމްޓީޑީސީއަށް ފައިދާގެ ގޮތުގައި 6.7 މިލިއަން ރުފިޔާ ލިބިފައެވެ.
އެކުންފުނީގެ މިއަހަރުގެ ދެވަނަ ކުއާޓަރގެ މާލީ ބަޔާނަށް ބަލާއިރު، ވަގުތީ ސާފު ފައިދާގެ ގޮތުގައި 434,655 ޑޮލަރު, ދިވެހި ފައިސާއިން ބަލާނަމަ، 6.7 މިލިއަން ރުފިޔާ ވަނީ ލިބިފައެވެ.
މި މުއްދަތުގެ ތެރޭގައި އެމްޓީޑީސީއަށް ޖުމްލަ އާމްދަނީގެ ގޮތުގައި އެއް މިލިއަނަށްވުރެ ގިނަ ޑޮލަރު، ނުވަތަ 16.8 މިލިއަން ރުފިޔާ ލިބިފައިވެއެވެ.
އެމްޓީޑީސީގެ މާލީ ބަޔާނުގައި ބުނެފައިވާގޮތުން ނިމިގެންދިޔަ ތިންމަހުގެ ތެރޭގައި ބޭއްވި ބޯޑު ބައްދަލުވުންތަކުގައި ކުންފުނީގެ ވިޔަފާރީގެ ކުރިމަގާ ބެހޭގޮތުން މުހިއްމު މަޝްވަރާތަކެއް ކޮށްފައިވެއެވެ.
މީގެ ތެރޭގައި ކުންފުނީގެ ބިޒްނަސް ޕްލޭނާ ބެހޭގޮތުންނާއި، ސަބްލީޒް ކޮށްފައިވާ ރަށްތަކުގެ މައްސަލަތަކާއި ބެހޭގޮތުން ކަމާއި ގުޅުންހުރި ފަރާތްތަކާއިއެކު މުހިންމު ބައްދަލުވުންތައް ކުރިއަށް ގެންގޮސްފައިވާކަން ފާހަގަކޮށްލެވެއެވެ.
