އުރީދޫ މޯލްޑިވްސް ގެ 2017 ވަނަ އަހަރުގެ އަހަރީ އާންމު ޖަލްސާ، އޮކްޓޯބަރު 1 ވާ އާދީއްތަ ދުވަހުގެ ރޭ އޮންނާނެ ކަމަށް އެކުންފުނިން ހާމަކޮށްފިއެވެ.
މި ޖަލްސާ ބޭއްވުމަށް ހަމަޖެހިފައިވަނީ ދަރުބާރުގެ ރަންނަބަނޑޭރި މާލަމުގައެވެ.
މިޖަލްސާގައި ޑިރެކްޓަރުންގެ ބޯޑަށް މެންބަރުން ހޮވައި ޢައްޔަންކުރުމާއި ވަތަނިއްޔާ އިންޓަރނޭޝަނަލް އެފްޒެޑް-އެލްއެލްސީގެ ފަރާތުން ޑިރެކްޓަރުންގެ ބޯޑަށް ޑިރެކްޓަރެއް ޢައްޔަންކުރުން ހަމަޖެހިފައި ވެއެވެ.
ކުންފުނީގެ 90.5 އިންސައްތަ ޙިއްޞާގެ ވެރިފަރާތްކަމުގައިވާ ވަތަނިއްޔާ އިންޓަރނޭޝަނަލްއަށް ޑިރެކްޓަރުންގެ ބޯޑަށް 7 މެންބަރުން ޢައްޔަންކުރުމުގެ ބާރު ލިބިފައިވެއެވެ. މިގޮތުން ވަތަނިއްޔާ އިންޓަރނޭޝަނަލްއިން ޑިރެކްޓަރުންގެ ބޯޑަށް ޑޮކްޓަރ ޝައިޚާ އަލް-ޖާބިރު އައްޔަންކުރުމަށް ވަނީ ނޮމިނޭޓުކޮށްފައެވެ.
ކުންފުނީގެ ޙިއްޞާގެ 9.5 އިންސައްތަ އާންމު ޙިއްޞާދާރުން ގަނެފައިވާތީ، ޢާންމު ޙިއްޞާދާރުންގެ ފަރާތުން ޑިރެކްޓަރުންގެ ބޯޑަށް 1 މެންބަރު ޢައްޔަންކުރުމުގެ ބާރު ލިބިފައި ވެއެވެ.
އުރީދޫ މޯލްޑިވްސްގެ ޙިއްސާދާރެއްގެ ގޮތުގައި ސެޕްޓެންބަރު 13، 2017 ގެ ހަވީރު 5:00 ގެ ކުރިން ރަޖިސްޓަރީވެފައިވާ ފަރާތްތަކަށް 2017 ވަނަ އަހަރުގެ އަހަރީ އާންމު ޖަލްސާގައި ބައިވެރިވެވޭނެ ކަމަށް އެކުންފުނިން ބުންޏެވެ.
އަހަރީ އާންމު ޖަލްސާގައި ބައިވެރިވުމަށް ޝަރުތުހަމަވާ ހިއްސާދާރުން، ޖަލްސާގައި ބައިވެރިވުމަށް "ޕްރީ-ރެޖިސްޓްރޭޝަން ފޯމު" ފުރުމަށްފަހު ސެޕްޓެމްބަރު 25، ވަނަ ދުވަހުގެ ހަވީރު 5:00 ގެ ކުރިން ފޯމު ހުށަހަޅަން ޖެހޭ ކަމަށް އުރީދޫއިން ބުންޏެވެ.
މީގެ އިތުރުން ޕްރޮކްސީ ހުށަހަޅަން ބޭނުންވާ ފަރާތްތަކުން، 28 ސެޕްޓެންބަރު ވާ ބުރާސްފަތު ދުވަހުގެ ހަވީރު 5:00 ގެ ކުރިން ޕްރޮކްސީ ފޯމު ހުށަހެޅުމަށް އުރީދޫއިން ބުންޏެވެ.
އަހަރީ އާންމު ޖަލްސާގައި ބައިވެރިވާން ބޭނުންވާ ޙިއްޞާދާރުން އޮކްޓޫބަރު 1 ވާ އާދިއްތަ ދުވަހުގެ ރޭގަނޑު 7.30 އާއި 8.30 އާ ދެމެދު ދަރުބާރުގެ ރަންނަ ބަނޑޭރި މާލަމަށް ވަޑައިގެން ރެޖިސްޓަރ ކުރުމަށް އުރީދޫއިން ވަނީ އެދިފައެވެ.
