ބުދަ ދުވަހު ޣައްޒާގައި 16 މީހަކު ޝަހީދު ކޮށްލައިފި
ހަމަލާގައި ފޮޓޯ ނެގުމުގެ މަސައްކަތް ކުރަމުން އަންނަ ނޫސްވެރިޔާ، އުސާމާ އަލް އަރުބީދުގެ އާއިލާ އަށް ނިސްބަތްވާ ނުވަ މީހަކު ވެސް ވަނީ ޝަހީދުވެފައެވެ.
އުތުރު ޣައްޒާ އަށް އަމާޒުކޮށް އިސްރާއީލް އިން ދީފައިވާ ހަމަލާގެ މަންޒަރު
އިސްރާއީލް އިން ޣައްޒާގައި ހިންގަމުން އަންނަ ހަނގުރާމައިގައި ބުދަ ދުވަހު ވެސް 16 މީހަކު ޝަހީދު ކޮށްލާފައިވާ ކަމަށް، ޣައްޒާގެ ސިވިލް ޑިފެންސް އިން ހާމަކޮށްފި އެވެ.
ސިވިލް ޑިފންސް އިން ހާމަކޮށްފައިވާ ގޮތުގައި ބުދަ ދުވަހު އިސްރާއީލް އިން ދިން ވައިގެ ހަމަލާއެއްގައި، ޣައްޒާ އިން 16 މީހަކު ޝަހީދުވެފައިވާ ކަމަށެވެ.
އެކަމާ ގުޅިގެން ސިވިލް ޑިފެންސްގެ ތަރުޖަމާނު މަޙުމޫދު ބައްސާލް އޭއެފްޕީ އަށް ވިދާޅުވެފައިވާ ގޮތުގައި، އެންމެ ފުރަތަމަ ހަމަލާ ދީފައި ވަނީ މެންދަމު ދޭއް ޖެހިއިރު އެވެ. އެ ހަމަލާ ދީފައި ވަނީ ޣައްޒާގެ އުތުރުގައި ހުރި ގެއަކަށް ކަމަށް ވެސް އޭނާ ވިދާޅުވި އެވެ. އަދި ހަމަލާގައި ފޮޓޯ ނެގުމުގެ މަސައްކަތް ކުރަމުން އަންނަ ނޫސްވެރިޔާ، އުސާމާ އަލް އަރުބީދުގެ އާއިލާ އަށް ނިސްބަތްވާ ނުވަ މީހަކު ވެސް ވަނީ ޝަހީދުވެފަ އެވެ.
އެ ހަމަލާގައި ނޫސްވެރިޔާ އަރުބީދަށް ވެސް ވަނީ އަނިޔާވެފަ އެވެ. މީގެ އިތުރުން ޣައްޒާގެ އެއް އާއިލާ އަކަށް ނިސްބަތާ ހަ މީހަކު ވެސް ވަނީ އެ ހަމަލާގައި ޝަހީދުވެފަ އެވެ. އަދި އެ ހަމަލާގެ ސަބަބުން 15 މީހަކު ޒަޚަމުވެފައިވާ ކަމަށް ވެސް ވަނީ ހާމަކޮށްފަ އެވެ. އޭގެ ތެރޭގައި ކުޑަ ކުދިން ހިމެނޭ ކަމަށް ވެސް ބައްސާލް ވަނީ ވިދާޅުވެފަ އެވެ.
މީގެ އިތުރުން އެ ހަމަލާގެ ސަބަބުން ޚާން ޔުނިސް ސަރަހައްދުގައި އާންމު ރައްޔިތުންގެ ތެރެއިން އެކަކު ޝަހީދުވެފައިވެ އެވެ. އިސްރާއީލް އިން ބުދަ ދުވަހު މި ދިން ހަމަލާތަކާ ގުޅިގެން، އެ ޤައުމުގެ އަސްކަރިއްޔާ އިން މިހާތަނަށް ވަކި އެއްޗެއް ބުނެފައި ނުވެ އެވެ.
ޖަނަވަރީ މަހުގެ ތެރޭގައި ހަނގުރާމަ ހުއްޓާލުމަށް ފަހު، މާޗު މަހުގެ ތެރޭގައި ވަނީ ދެ ވަނަ ފަަހަރަށް އަނެއްކާ ވެސް ހަމަލާ ދޭން ފަށައިފަ އެވެ. އޭގެ ފަހުން މިހާތަނަށް އެކަނި ޣައްޒާ އިން 3822 މީހަކު ވަނީ ޝަހީދުވެފަ އެވެ.
2023 ވަނަ އަހަރުގެ އޮކްޓޫބަރު މަހު ފެށުނު މި ހަނގުރާމައިގައި، އިސްރާއީލްގެ ހަމަލާތަކުގައި މިހާތަނަށް ޣައްޒާ އިން ވަނީ ޖުމުލަ 54000 އަށް ވުރެ ގިނަ ރައްޔިތުން ޝަހީދުވެފަ އެވެ. ޝަހީދުވެފައިވާ މީހުންގެ ތެރޭގައި ގިނަ އިން ހިމެނެނީ އަންހެނުންނާއި ކުޑަ ކުދިން ކަމަށް ބުނެފައިވެ އެވެ.
އިސްރާއީލް އިން ވަނީ މި ފަހުން ޣައްޒާ އަށް ދެމުން އަންނަ ހަމަލާތައް ވަރަށް ބޮޑަށް ވަރުގަދަކޮށްފަ އެވެ. އަދި ހަމާސް ޖަމާއަތް މުޅިން ބަލިކޮށް، ހަމާސް އިން ރަހީނުކޮށްފައިވާ އިސްރާއީލްގެ ރައްޔިތުން މިނިވަން ކުރަންދެން ހަނގުރާމަ ކުރިއަށް ގެންދާނެ ކަމަށް ވެސް އިސްރާއީލްގެ ބޮޑު ވަޒީރު ބެންޖަމިން ނަތަންޔާހޫ ވަނީ ވިދާޅުވެފަ އެވެ.
