އިސްލާމް ދީނުގެ ނަމުގައި ދެމުންދާ ހަމަލާތަކާ ގުޅިގެން މުސްލިމުންނާ މެދު އެތައް ބައެއް ނުރުހުން ފާޅު ކުރަމުން ދާއިރު، ސްޕެއިންގެ ބާސެލޯނާއަށް ނިމިގެން ދިޔަ ހަފްތާގައި ދިން ހަމަލާގައި ނިޔާވި އެެންމެ ތުއްތު ކުއްޖާގެ ބައްޕަގެ ފަރާތުން ތަފާތު މަންޒަރެއް ފެނިިއްޖެއެވެ.
ބާސެލޯނާގެ ލަސް ރަމްބްލާސް އެވެނިއުއަށް ވޭނެއް ބޭނުން ކޮށްގެން އޮގަސްޓް 17 ވަނަ ދުވަހު ދިން ހަމަލާގައި 15 މީހުން މަރުވެ 100 އަށް ވުރެ ގިނަ މީހުން ޒަހަމްވެފައިވާއިރު، މި ހަމަލާގައި ތިން އަހަރުގެ ހާވިއޭ މާޓިނެޒް އާއި އޭނާގެ ބޮޑު ބޭބެ ފްރަންސިސްކޯ ލޮޕެޒް ރޮޑްރިގެޒް ވަނީ މަރުވެފައެވެ.
ނަމަވެސް ހާވިއޭގެ ބައްޕަ، ޒޭވިއާގެ ފަރާތުން ފެނުނީ އެއްބައިވަންތަ ކަމުގެ މިސާލެކެވެ.
އެގޮތުން ޒޭވިއާ މުސްލިމް އިމާމް ދްރިސް ސަލީމްއާ ވަނީ ބައްދާލާ ވާހަކަ ދައްކާލާފައެވެ. އަދި މި މަންޒަރު ފެންނަ ވީޑިއޯއެއް ސޯޝަލް މީޑިއާގައި ދައުރުވަމުންދާ އިރު، ބައްފަގެ މި އަމަލާ އެކު އެތައް ބައެއް ރޮއްވާލައިފިއެވެ.
މި ކަންތައް ހިނގާފައި ވަނީ ބާސެލޯނާ ކައިރި އޮންނަ ރުބީ ޓައުންގައެވެ. އެ ބައްދަލު ވުމަކީ ޒޭވިއާގެ އެދުމުގެ މަތިން ބާއްވާފައިވާ ބައްދަލުވުމެއްކަން ރިޕޯޓްތަކުގައިވެއެވެ.
އަދި ހާވިއޭގެ ބައްޕަގެ މި އަމަލުން އިމާމަށް ކެތް ނުކުރެވި، ގިސްލަގިސްލާ ރޯތަން ވީޑިއޯއިން ފެނެއެވެ.
އެހެން މިފަދަ ގިނަ ހަމަލާ ތަކެކޭ އެއްފަދައިން ބާސެލޯނާއަށް ދިން ހަމަލާގެ ޒިންމާ އިސްލާމިކް ސްޓޭޓް (އައިއެސް) އިން ނަގާފައިވާއިރު، މި ހަމަލާގައި އިސްކޮށް އުޅުނު މީހާއާ ކުރިމަތިލުމެއް ހިނގާ ބަޑި ޖަހާ މަރާލާފައިވާ ކަމަށް ސްޕެއިންގެ ފުލުހުން ބުނެފައިވެއެވެ.
