ކޮތަޅު މުއިއްޒުގެ ކޮތަޅު ސަރުކާރު

ފޭސްބުކުން ފެނުނު އެއްޗެއްގައި ކުއްލިއަކަށް އަޅައިގަތެވެ. ކުރު ޑްރާމާއެކެވެ. ފެންނަނީ ދިރޭ މަހެއް ގަންނަން މީހަކު ފިހާރައަކަށް ވަންނަ މަންޒަރެވެ. ސޭޓަކީ އޭރުގެ ސަރުކާރަށް ވަރަށް ބޮޑަށް ފާޑު ކިޔަމުންދިޔަ މިހާރުގެ މޯލްޑިވްސް ގޭހުގެ އެމްޑީ އަބްދުﷲ މުހައްމަދެވެ. ޑްރާމާގައި ފެންނަނީ ދިރޭ މަހެއް ގަންނަން އައި މީހާއަށް ވިއްކާ މަސް އޭނާގެ އަތަށް ފެން އަޅާފައި ލައިދޭން އުޅޭ މަންޒަރެވެ. ޑްރާމާއިން ރައްޔިތުންނަށް ދޭން އުޅުނު މެސެޖަކީ ފިހާރަތަކުން ކޮތަޅު ދިނުން ހުއްޓާލީމާ ދެން ކަންކުރާން ޖެހޭ ގޮތެވެ. ބޭނުމަކީ އޭރުގެ ސަރުކާރުން ފިހާރަތަކުން ޕްލާސްޓިކް ކޮތަޅު ދިނުން ހުއްޓާލުމުން އެކަމަށް ފާޑު ކިއުމެވެ.

އެއީ މިދިޔަ ސަރުކާރުގެ ދުވަސްވަރެވެ. ރައީސް އިބްރާހީމް މުހައްމަދު ސާލިހްގެ ސަރުކާރެވެ. ސަރުކާރުން ބޭނުންވީ ތިމާވެށި ހިމާޔަތް ކުރުމަށް ކުރެވޭ މަސައްކަތުގެ ދަށުން އަޅާ ފިޔަވަޅެއްގެ ގޮތުގައި ޕްލާސްޓިކް މަދުކުރާށެވެ. ޕްލާސްޓިކް ފުޅިއާ ޕްލާސްޓިކް ކޮތަޅު އެތެރެކުރުން މަދު ކުރާށެވެ. ރާއްޖޭގެ ތިމާވެށި ހިމާޔަތް ކުރުމުގެ ގާނޫނަށް ގެނައި އިސްލާހުގެ ދަށުން ރައީސުލް ޖުމްހޫރިއްޔާ ނެރުއްވި ގަރާރެއްގެ ދަށުން ކުރެއްވި ކަމެކެވެ.

ކޮތަޅު މަދުކުރުމުގެ މި ސިޔާސަތުގެ ދަށުން ކޮތަޅުން ނަގާ ޑިއުޓީ ބޮޑުކުރުމާއެކު ފިހާރަތަކުން ކުރިން ހިލޭ ދެމުން އައި ބާޒާރު ކޮތަޅު ދިނުން ހުއްޓާލިއެވެ. ނޫންނަމަ އެއަށްވެސް އަގު ނަގަން ފެށިއެވެ. މައްސަލަ ޖެހުނީ އެހާހިސާބުންނެވެ. ދެނެކާ ދެނެއް ނެތެވެ. ސަރުކާރާ ދެކޮޅަށް އޭރުގެ އިދިކޮޅުން ނިކުތީ ތިޔަހެނެއް ނޫނެވެ. ހީވީ އުޑު ބޮލަށް ވެއްޓިގެން އުޅުނު ހެންނެވެ. ސަރުކާރާ ދިމާލަށް ނުގޮވާ އެއްޗެއް ނެތެވެ. ސަރުކާރަށް މުޚާތަބުކޮށް ނުކުރާ މަލާމާތެއް ނެތެވެ. ކޮތަޅު ސަރުކާރެވެ. ކޮތަޅު އިބޫއެވެ. މިހެންގޮސް ހަޑިވެގެންވެސް މައިން ދަރިންނާއެކު ނުބެލޭވަރަށް ފޮޓޯއާއި ކާޓޫނުވެސް ހެދިއެވެ. ކޮތަޅާ ގުޅުވާފައެވެ. ކޮތަޅު ލައްވާފައެވެ. ކޮތަޅު ސިފަކޮށްފައެވެ. އެހުރިހާ އެއްޗެއް ރައީސް އިބްރާހީމް މުހައްމަދު ސޯލިހާ ގުޅުވާފައެވެ. ކުރިން ބުނެވުނު ޚިޔާލީ ކުރު ޑްރާމާއަކީވެސް އޭގެ އެއްބައެވެ.

ދައްކަން މިއުޅެނީ އެވާހަކައެއް ނޫނެވެ. އޭރު ސަރުކާރު ޒިންމާދާރު ކުރުވުމުގެ ނަމުގައި ލޮލަށް ނިދިނައިސްގެން އެކަމާ ދެކޮޅަށް ނުކުތް އިދިކޮޅު މިހާރު އޮތީ ސަރުކާރުގައެވެ. ފަޔަށް ހިނިއަރައިގެން އުޅުނު އޭރުގެ ސިޔާސީ އެކްޓިވިސްޓުން މިހާރު ތިބީ ސަރުކާރުގެ މަތީފަޑީގައި ސިޔާސީ މަގާމްތަކުގައެވެ. ބާރު އޮތީ އެވެރިންގެ އަތުގައެވެ. ރޭވެފައި އަލިވިލެންވާއިރަށް ގާނޫނު އަސާސީއަށާއި ގާނޫނުތަކަށް ބަދަލު ގެނައުމުގެ ބާރު އެވެރިންނަށް އެއޮތީ ސާފު ސީދަލަށް ލިބިފައެވެ. އެބާރު ބޭނުން ކޮށްގެން ކުރާން ބޭނުންވިހާ ކަމެއްކޮށް މަނާކުރާން ބޭނުންހާކަމެއް މަނާކޮށް ހުއްދަކުރާން ބޭނުންހާ އެއްޗެއް ހުއްދަކޮށް އެދަނީ ނިންމަމުންނެވެ. ކުރިން ކޮށްފައިހުރި ކަންކަން އުވާލާ އާ ކަންކަން އެދަނީ ކުރަމުންނެވެ. ކުރިން މަނާކަންކަން ހުއްދަކޮށް އާ ބާވަތްތައް އެދަނީ މަނާ ކުރަމުންނެވެ. ކުދި ވިޔަފާރިތަކެއް ފުނޑާލައި ވޭޕް މަނާކޮށް ދުންފަތާ ސިންގިރޭޓަށް ގެންނަ ބަދަލަކީ ލޯމައްޗަށް ހާމައަށް ފެންނާންހުރި މީގެ ދިރިހުރި މިސާލެކެވެ.

އެކަމަކު އަތްލާން ނުކެރިގެން މިއުޅެނީ އެއްކަލަ ކޮތަޅުގައެވެ. އަދިވެސް ފިހާރަތަކުން ކޮތަޅު ލިބެނީ ގަންނާށެވެ. މަހެއް ގަތަސް ކޮތަޅު ގަންނާން ޖެހެއެވެ.ހަނޑޫ ކިލޯއެއް ގަތަސް ކޮތަޅު ގަނެގެން ނޫނީ ނުލިބެއެވެ. މިހެންގޮސް ކިޔާނެ ކަމެއްނެތެވެ. ކުރިން ކޮތަޅުގެ މައްސަލައިގާ ދެފައި އެއްތާންގައި ނުޖަހާ ކޮޅުކޮޅަށް ދުވެ ހޯބޯލެވި މީހުންގެ ސަރުކާރުން ކޮތަޅުގެ ސިޔާސަތައް ގެނައި ބަދަލެއް ނެތެވެ. އެކަން އަދިވެސް އޮތީ އޮތްގޮތަށެވެ. އޭރު ގެނައި ބަދަލާ އެއްގޮތަށެވެ.

ކޮންމެއަކަސް މަވެސް ހިމެނޭގޮތައް ދިވެހިންނަކީ ދާދި އަވަހަށް ކަންކަން ހަނދާން ނެތޭ ބައެކޭ މީހުން ބުނެއުޅެއެވެ. އެހެންކަމުން ކޮތަޅުގެ މައްސަލައިގާ އޭރުގެ ސަރުކާރަށް ފާޑުކިޔަމުންދިޔަ އާއްމު ރައްޔިތުންވެސް މިތިބީ މިހާރު ބޮޑު ވަރިހަމަވެފައެވެ. ކޮތަޅަށް ލާރި ނެގުން އޯކޭ ވެފައެވެ. ކޮތަޅު މައްސަލަ ހައްލު ކުރަން އައި ސަރުކާރުން އެކަން ނުކުރިއަސް ފުއްދާލައިގެންނެވެ. އޭރުގެ ސަރުކާރަށް ރައްދުކުރި ބަހުންނަމަ ކޮތަޅު ސަރުކާރުގެ ކޮތަޅު މުއިއްޒުގެ ކޮތަޅު ސިޔާސަތު މިހާރު ރަނގަޅުކަމަށް ނިންމައިގެންނެވެ. ބުނާނެ އެއްޗެއް ނެތެވެ. ވަރަށް ސަލާމެވެ.