ޑިމޮކްރަސީއަކީ ރަނގަޅު ގިނަ ކަންތައްތަކެއް ހިމެނުނު ނަމަވެސް ގޯސް އަދި ނުރަނގަޅު ސިފަތައް ވެސް ހިމެނޭ ނިޒާމެކެވެ. އެންމެ ބޮޑު އެއް ގޯހަކީ އަގުލަބިއްޔަތަށް ތަބާވުމެވެ. އެއީ ކިތަންމެ ބޮޑު ގޯހެއް ކަމުގައި ވިޔަސް އަގުލަބިއްޔަތުން އެގޮތް ނިންމައިފި ނަމަ ޑިމޮކްރަސީގައި އޮތީ އެ ގޮތެވެ. އެއީ އިސްލާމްދީނުގެ އަސްލާ ފުށުއަރާ ނިޒާމެކޭ ބައެއް މީހުން ބުނަނީ އެހެން ވެގެންނެވެ. އިސްލާމްދީނާއި ތަރުބަވީ ނިޒާމުގެ ތެރޭގައި އޮންނަ އުސޫލަކީ ކިތަންމެ ގިނަ ބަޔަކު ބުންޏަސް ގޯސް ގޯހަށް ވުމެވެ. އެންމެ މީހަކު ބުންޏަސް ރަނގަޅު ރަނގަޅަށް ވުމެވެ. ޑިމޮކްރަސީގައި ހުރިހާ ވެސް ބާރަކީ މެޖޯރިޓީއެވެ. ހާއްސަކޮށް ގާނޫނު ހަދާ މަޖިލީހުގެ ސާފު އަގުލަބިއްޔަތާ އެކު ނުވާނެ އެއްވެސް ކަމެއް ނޯންނާނެއެވެ. މި ގައުމުން ވެސް ފެނިގެން މިދަނީ އެ ކަމެވެ.

ރައީސް އަބްދުﷲ ޔާމީން ވެރިކަމަށް ވަޑައިގެންނެވީ މި ދެންނެވި ބާރުތަކާ އެކުގައެވެ. އެގޮތުން 2014 ވަނަ އަހަރު ބޭއްވި އާންމު އިންތިޚާބުގައި ރައްޔިތުން ވަނީ ޑޮމޮކްރަސީގެ ލަގަން ރައީސް ޔާމީނަށް ދެއްވާފައެވެ. އޭގެ ފުރިހަމަ ބޭނުން ފާއިތުވި ތިން އަހަރެއްހާ ދުވަހުގެ ތެރޭގައި އެމަނިކުފާނު ހިއްޕަވައިފިއެވެ. ޑިމޮކްރަސީގެ އުސޫލްތަކުގެ ނަމުގައި ގާނޫނުތައް ކޮށައި މަށައި އެމަނިކުފާނަށް ހެޔޮވަރުވާ ގޮތަށް ހުރިހާ ކަމެއް ބަދަލުކުރެއްވީ ކުރިން ފާހަގަކުރެއްވި ޑިމޮކްރަސީގައި މުތުލަގަށް ދީފައި އޮތް އަގުލަބިއްޔަތުގެ ނާޖާއިޒް ބާރު ބޭނުންކުރައްވައިގެންނެވެ. އިދިކޮޅު ފަރާތްތައް ވެސް ކުޑަކަކޫ މައްޗަށް ތިރިކުރައްވާފައި ވަނީ އެ ލަގަނުގައި ހިއްޕަވައިގެންނެވެ. ގާނޫނު ހަދާ މަޖިލީހުގެ ބާރު ހިއްޕަވައިގެންނެވެ.

ނަތީޖާ ވަރަށް ބިރުވެރިއެވެ. ގާނޫނުއަސާސީން ވަރަށް ފުޅާކޮށް ދީފައިވާ ބާރުތައް އޭގެ ފަހުން ހެދި ގާނޫނުތަކުގެ ތެރެއިން ދެފޮޅުވަތް ދޭތެރޭގައި ވަނީ ފިއްތާލާ ބާރުކޮށްލާފައެވެ. އެއްވެ އުޅުމާއި މުޒާހަރާކުރުމުގެ މިނިވަންކަމާއި، ހިޔާލުފާޅުކުރުމުގެ މިނިވަންކަމާއި އެ ނޫން ވެސް އެތައް އިންސާނީ ހައްގުތަކެއް ވަނީ ނިގުޅައިގެންފައެވެ. ރައްޔިތުން ހަމަ ޗުއްޕު ވެސް ބުނެ ނުލައެވެ. ނުވަތަ ބުނާނެ ފުރުސަތެއް ސަރުކާރުން ނުދެއެވެ.

ސަރުކާރާ އިދިކީލި ކޮންމެ އަޑެއް ކަނޑުވާލުމަށް ގާނޫނުގެ ބާރު އޮތީ ސަރުކާރުން ނަގާފައެވެ. އެފަދަ ކޮންމެ ފަރާތަކާ ދެކޮޅަށް ދައުވާއެއް އުފުލި އެ އަޑެއް ކުޑަގޮޅިއަށްލާ ބަންދުކުރުން ވަނީ އާންމު ކަމަކަށް ވެފައެވެ. އިދިކޮޅު ފަރާތްކުގެ އަޑު ނީވޭ ވަރަށް އަޑު އެވަނީ ކަނޑާލާފައެވެ.

ގާނޫނު ހަދާ މަޖިލީހުގައި މެޖޯރިޓީ އޮތުމުން ރައްޔިތުންނާ މެދު ވެސް ސަރުކާރުން ކަންކުރަނީ ކުރާނެ ގޮތަކަށެވެ. ހެއްދި ގޮތެއް ހެދިގެން ޖެހޭނީ ތިބެންށޭ ބުނާ ބީދައިންނެވެ. ފެނާއި ކަރަންޓާއި ކާޑާއި މި ނޫން ވެސް އެތައް ޚިދުމަތާއި ތަކެއްޗެއްގެ އަގު އިންތިހާ އަށް ބޮޑުކޮށްފިއެވެ. ހިތަށް އެރީމާ ބޮޑުކުރަނީއެވެ. ހިތަށް އެރީމާ ކުޑަކުރަނީއެވެ. ނަމަވެސް ރައްޔިތުންނަށް ކުރެވޭނެ އެއްވެސް ކަމެއް ނެތް ކަހަލައެވެ.

އިދިކޮޅު ފަރާތްތަކުން ބުނަނީ ނޫނެކެވެ. ރައްޔިތުންނަށް ބާރު އެބަ އޮތް ކަމަށެވެ. މޭ 6 ވަނަ ދުވަހު ބޭއްވި އިންތިޚާބުގައި ފެނިގެން އެދިޔައީ އެކަމެވެ. ނަމަވެސް ހަގީގަތުގައި ވެސް ރައްޔިތުންގެ އެ ނިންމުމުން ސަރުކާރަށް ކުޑަވެސް އަސަރެއް ކޮށްފި ހެއްޔެވެ؟ ނޫނެކެވެ. ލޯކަލް ކައުންސިލް އިންތިޚާބުން ސަރުކާރަށް ލިބުނު ފިލާވަޅެއް ނެތް ކަހަލައެވެ. އިންތިޚާބަށް ފަހު ވެސް ފެންނަނީ ބޮޑާ ކަމާއި ކިބުރުވެރިކަމެވެ. ޑިމޮކްރަސީގައި ބާރަކީ މެޖޯރިޓީއޭ، މަޖިލީހުގައި އަދިވެސް އޮތީ ތިމަންނާމެންގެ ބާރޭ، ހަދާނީ ހަދާނެ އެއްޗެކޭ ބުނާ ފަދައެވެ.

އޭގެ ހެކިތައް އެދަނީ ފެންނަމުންނެވެ. ސަރުކާރަށް ބާރުތައް ލިބޭހާ ގޮތަކަށް ނުވަތަ ސަރުކާރުން ކަންކުރަން ބޭނުންވާހާ ގޮތަކަށް ގާނޫނުތައް ބަދަލުކުރުމުގެ މަސައްކަތަށް ކުޑަވެސް މަޑުޖެހުމެއް ނެތެވެ. ޖިނާއީ އިޖުރާއަތުގެ ބިލް ފާސްކޮށް މި އަންނަ މަހުގެ 2 ވަނަ ދުވަހު އަމަލުކުރަން ފަށަން ހަމަޖައްސާފައި ވަނިކޮށް އަނެއްކާ ވެސް ސަރުކާރުން އެ ވަނީ އެ ބިލަށް ވެސް އިސްލާހުތައް ގެނައުމުގެ މަސައްކަތް ވަނީ ފަށައިފައެވެ.  ބޭނުމަކީ ސަރުކާރާ ދެކޮޅަށް ބަހެއް ބުނާ އެއްވެސް މީހަކަށް ނޭވާލަން ވެސް ފުރުސަތު ނުލިބޭ ވަރަށް ކަންކަން ބަދަލުކުރުމެވެ. މި ނޫން ވެސް އެތައް ބަދަލުތަކެއް ޕެންޑިންގައި އެބަ ހުއްޓެވެ. އިދިކޮޅު ފަރާތްތަކުން އަވަސް ފިޔަވަޅުތަކެއް ނާޅައިފި ނަމަ ދެން އަވަސް މުސްތަގުބަލެއްގައި އިންތިޚާބެއް ވެސް ނުލިބޭ ވަރަށް ކަންކަން ބަދަލުކޮށްލުމުގެ ބިރު އެބަ އޮތެވެ.