މިދިޔަމަހު ކުޑަކުދިންނަށް ކުރާ އަނިޔާއާ ގުޅޭ 98 މައްސަލައެއް
21 މެއި 2025 | ބުދަ 11:58އެންމެ ގިނައިން ރިޕޯޓުކޮށްފައިވަނީ އިހުމާލުވުމުގެ މައްސަލަ
ކުޑަކުދިންނަށް ކުރާ އަނިޔާ
2025 ވަނަ އަހަރުގެ އޭޕްރިލް މަހު ކުޑަކުދިންނަށް ކުރާ އެކި ބާވަތުގެ އަނިޔާއާ ގުޅޭ 98 މައްސަލަ ހުށަހަޅާފައިވާކަމަށް އިޖުތިމާޢީ އަދި ޢާއިލީ ތަރައްޤީއާ ބެހޭ ވުޒާރާއިން ބުނެފި އެވެ.
އިޖުތިމާޢީ އަދި ޢާއިލީ ތަރައްޤީއާ ބެހޭ ވުޒާރާއިން މިއަހަރުގެ އޭޕްރިލް މަހު ނެރުނު އެ ވުޒާރާއަށް ހުށަހެޅި މައްސަލަތަކުގެ ތަފާސް ހިސާބުން ދައްކާގޮތުގައި، 2025 ވަނަ އަހަރުގެ އެޕްރީލް މަހު ކުޑަކުދިންނަށް ކުރާ އެކި ބާވަތުގެ އަނިޔާއާ ގުޅޭ 98 މައްސަލަ ހުށަހެޅިފައިވާއިރު، މި ބާވަތުގެ މައްސަލަތަކުގެ ތެރެއިން އެންމެ ގިނައިން ރިޕޯޓުކޮށްފައިވަނީ އިހުމާލުވުމުގެ މައްސަލައެވެ. އެގޮތުން މި ބާވަތުގެ 32 މައްސަލައެއްވަނީ ރިޕޯޓުކޮށްފައެވެ.
ދެވަނައަށް އެންމެ ގިނައިން ހުށަހެޅިފައިވާ މައްސަލައަކީ ޖިންސީ ހާނިކައިގެ މައްސަލައެވެ. އެގޮތުން ޖިންސީ ހާނިކައިގެ 21 މައްސަލައެއް ރިޕޯޓްކޮށްފައިވެއެވެ.
ހަމައެހެންމެ، މީގެ ތެރޭގައި ޖިސްމާނީ ހާނިކައިގެ 18 މައްސަލަ، ނަފްސާނީ ހާނިކައިގެ 12 މައްސަލަ، ގެވެށި އަނިޔާގެ އަމަލެއް ކުރާތަންދެއްކުން ނުވަތަ ފެނުމުގެ 4 މައްސަލަ، އެހެންކުދިންގެ ފަރާތުން އިންޓަނެޓް މެދުވެރިކޮށް ގަނާލިބުމުގެ 03 މައްސަލަ ރިޕޯޓް ކޮށްފައިވާކަމަށް އެވުޒާރާގެ ތަފާސް ހިސާބުތަކުން ދައްކައެވެ.
އެ ވުޒާރާއަށް ޢާއިލީ މައްސަލަތަކާ ގުޅޭ 32 މައްސަލައެއް ހުށަހެޅިފައިވެއެވެ. މި ބާވަތުގެ މައްސަލަތަކުގެ ތެރެއިން އެންމެ ގިނައިން ރިޕޯޓުކޮށްފައިވަނީ ކުދިން ބެލުމުގައި ޖެހޭ މައްސަލަ އެވެ. އެގޮތުން 13 މައްސަލައެއްވަނީ ރިޕޯޓުކޮށްފައެވެ.
ކުދިންގެ އަޚްލާގީ މައްސަލަތަކާއި ގުޅޭ 21 މައްސަލައެއް ހުށަހަޅާފައިވާއިރު، މި ބާވަތުގެ މައްސަލަތަކުގެ ތެރެއިން އެންމެ ގިނައިން ރިޕޯޓުކޮށްފައިވަނީ ގެއިން ނިކުމެގެން ދިއުމުގެ މައްސަލައެވެ. އެގޮތުން 7 މައްސަލައެއްވަނީ ރިޕޯޓުކޮށްފައެވެ.
މީގެ އިތުރުންވެސް އަންހެނުންނާއި ފިރިހެނުންނަށް ކުރާ އަނިޔާގެ ޖުމްލަ 44 މައްސަލަ ހުށަހަޅާފައިވެއެވެ. އެގޮތުން އަންހެނުންނާއި ފިރިހެނުންނަށް ކުރާ އަނިޔާގެ ތެރޭގައި، ނަފްސާނީ އަނިޔާކުރުމާއި، އަނގަބަހުން ކުރެވޭ އަނިޔާގެ 08 މައްސަލައެއް ވެސް ހިމެނެއެވެ. އަދި، ބިރުދެއްކުމުގެ ގޮތުން ކުރެވޭ ކަންކަމުގެ 05 މައްސަލައާއި، ޖިންސީ ހާނިކަކުރުމުގެ 02 މައްސަލައާއި، ހިފެހެއްޓުމުގެ 02 މައްސަލައާއި، ގަދަކަމުން ޖިންސީ ގޯނާ ކުރުމުގެ 02 މައްސަލައިގެ އިތުރުން، މުދާ ހިފަހެއްޓުމާއި މުދަލަށް ގެއްލުން ދިނުމުގެ 01 މައްސަލަ ވަނީ ރިޕޯޓުކޮށްފައެވެ. އޭގެތެރޭގައި ހިމެނެނީ، އަންހެނުންނާއި ގުޅޭ 40 މައްސަލައަކާއި ފިރހެނުންނައި ގުޅޭ 04 މައްސަލައެކެވެ.
އިޖުތިމާޢީ އަދި ޢާއިލީ ތަރައްޤީއާ ބެހޭ ވުޒާރާއިން ހާމަކުރިގޮތުގައި، އެޕްރީލް މަހު އެވުޒާރާގެ ހެލްޕްލައިންއަށް ޖުމްލަ 2150 ކޯލު ވަނީ ލިބިފައެވެ.
