މޯލްޑިވްސް ބްރޯޑްކާސްޓިން ކޮމިޝަން (ބްރޯޑްކޮމް)ގެ މެންބަރުން، މުވައްޒަފުންގެ ފަހަތުން ނުދުވެ، މަސައްކަތު މާހައުލު ރަނގަޅު ކޮށްދިނުމަށް އެ ކޮމިޝަންގެ މުވައްޒަފުން ގޮވާލައިފިއެވެ.

ބުދަ ދުވަހުގެ ހެނދުނު 8:00ށް އެކޮމިޝަންގައި މަސައްކަތް ކުރާ ބައެއް މުވައްޒަފުން އޮފީހަށް ހާޒިރުވުމަށްފަހު ގާތްގަނޑަކަށް 8:30 ހާއިރު ގެއަށް ދިއުމަށް ވަނީ ނުކުމެފައެވެ. މަސައްކަތް ކުރާނެ ރަނގަޅު މާހައުލެއް ނެތް ކަމަށް ބުނެ، ކޮމިޝަންގެ ދޮރުމަތީގައި އެމުވައްޒަފުން ވަނީ ހިމޭން އިހުތިޖާޖެއް ވެސް ކޮށްފައެވެ.

ރާއްޖެއެމްވީއަށް މުވައްޒަފުންގެ ކަންބޮޑުވުންތަކާ ގުޅޭގޮތުން އެޗްއާރް ޑިރެކްޓަރު އަހުމަދު ރާޝިދު ވިދާޅުވީ ކޮމިޝަންގެ މުވައްޒަފުން މަސައްކަތް ކުރަމުންދަނީ ބިރުވެރިކަމެއްގެ ތެރޭގައި ކަމަށާއި، ރަނގަޅު މާހައުލެއް ނެތް ކަމަށެވެ. ބްރޯޑްކޮމްގެ މެންބަރުން މުވައްޒަފުންނަށް އެކި ކަންކަމުގައި ޝައްކުކޮށް، އެމުވައްޒަފުންގެ ނެތް މައްސަލަތައް ނަގައި، ފަހަތުން ދުވުމުގެ ބަދަލުގައި މަސައްކަތުގެ މާހައުލު ރަނގަޅު ކުރުމަށް މަސައްކަތް ކުރަންޖެހޭ ކަމަށް އޭނާ ވިދާޅުވިއެވެ.

ރާޝިދު ވިދާޅުވީ އެކޮމިޝަންގެ ސެކްރެޓަރީ ޖެނެރަލް މަރިޔަމް ޒީނިޔާ ވެސް ސަސްޕެންޑްކޮށްފައިވަނީ އުސޫލުން ބޭރުން ކަމަށާއި، ކުއްލި އަކަށް ކަމަށެވެ. އެހެންކަމުން މުވައްޒަފުންގެ މެދުގައި ވަޒީފާގެ ބިރުވެރިކަން ވެސް އުފެދިފައިވާ ކަމަށް އޭނާ ވިދާޅުވިއެވެ. 14 އަހަރު ބްރޯޑްކޮމްގައި މަސައްކަތްކުރިކަން ފާހަގަކުރައްވައި ރާޝިދު ވިދާޅުވީ މަސައްކަތް ކުރި މި މުއްދަތުގެ ތެރޭގައި މިހައި އުދަނގޫ ނުވާ ކަމަށެވެ. އަދި ވިދާޅުވީ މަސައްކަތް ކުރުމަށް ރަނގަޅު ކޮންޕިއުޓަރު ފަދަ ވަސީލަތްތައް ނެތްއިރު، ބުދަ ދުވަހު ވެސް ސާވާއަށް ނުވަދެވޭ ކަމަށެވެ.

ބުދަ ދުވަހު ބްރޯޑްކޮމްގެ ބައެއް މުވައްޒަފުން މަސައްކަތް ނުކޮށް ގެއަށް ގޮސްފައިވާއިރު، މުވައްޒަފުންގެ ކަންބޮޑުވުންތަކަށް ހައްލު ލިބޭނެ ކަމަށް އުމީދު ކުރާ ކަމަށް ވެސް އެމީހުން ބުނެފައިވެއެވެ. އެކޮމިޝަނަކީ އާއްމު ރައްޔިތުންނަށް ޚިދުމަތްދޭ ކޮމިޝަނަށްވާތީ، ބުރާސްފަތި ދުވަހު ވެސް އޮފީހަށް ނުކުންނާނެ ކަމަށް އެމުވައްޒަފުން ބުނެއެވެ.

ބްރޯޑްކޮމްގެ މެންބަރުން މުވައްޒަފުންނަަށް ނުފޫޒު ފޯރުވާ، މަސްއޫލިއްޔަތު އަދާކުރުމަަަށް ދަތިކުރާތީ 18 މެއި 2025 ގައި ވަނީ މަޖިލީހަށް ޕެޓިޝަނެއް ވެސް ހުށަހަޅާފައެވެ.

މިމައްސަލައާ ގުޅިގެން ކޮމިޝަންގެ މެންބަރެއްގެ ބަހެއް ވަނީ ލިބޭގޮތް ނުވެފައެވެ.