ކާޅު ހާލި ހެދީމާ ކޮވެލި ބިސް އެޅުން މިއީ ދިވެހި އަދަބީ ބަހުގައި ބޭނުންކުރާ މިސާލު ބަހެކެއެވެ. މިބަސް ބޭނުންކުރަނީ އެހެން މީހަކު ނުވަތަ އެހެން ބަޔަކު ކޮށްފައި އޮތް ކަމެއްގެ ތެރެއަށް ތިމާ ވަދެ އަމިއްލަ ކޮށްލުމަށް ކުރާ ކަން ކަމަށެވެ.

ކޮވެއްޔަކީ އޭގެ ޒާތުގައި ހާލި ހަދައިގެން ބިސްއަޅާ ދޫންޏެއް ނޫނެއެވެ. އެއީ އުޅެ އުޅެވެސް އެސޮރަށް ދަސްނުވި ހުނަރެކެވެ. އެހެންކަމުން ކޮވެލި ބިސްއަޅަންވުމުން، ކާޅު ހަދާ ހާލި ހޯދައިގެން ގޮސް އެއަށް ބިސް އަޅައެވެ. އާހިރުގައި ކޮވެލީގެ ބިސްތައް ފީކުރަނީ ކާޅުގެ ބަނޑުދަށުގައެވެ.

ރައީސް ޑރ. މުހައްމަދު މުއިއްޒުގެ ސަރުކާރުން މިހާރު މިއުޅޭ ގޮތް އެންމެ ވައްތަރީ ކޮވެއްޔެއްގެ އުޅުމާއިއޭ ބުނާ މީހުންނެއް މިހާރަކު މަދެއް ނޫނެއެވެ. ސަބަބަކީ ކުރީގެ ސަރުކާރުން ފަށާފައިވާ ނިމެން ކައިރިވެފައިހުރި މަޝްރޫއުތައް ނިންމާފައި ނުހުޅުވި ހުރި މަޝްރޫއުތައްވެސް ނަގައިގެން އެއީ މިސަރުކާރުގެ މަޝްރޫއުތަކެއް ކަމަށް ހަދައިގެން ރައްޔިތުންނަށް ދައްކާ ޕްރޮމޯޓްކޮށް އެކަމުގެ ޝުކުރު ރައީސް މުއިއްޒުއަށް އަރުވަމުން ގެންދަނީ މާ ގިނައިން ކަމަށްވާތީއެވެ.

ސަރުކާރުތައް ބަދަލުވުމަކީ ތަބައީ ކަމަކެވެ. އެއް ސަރުކާރަކުން ފަށާފައި ހުންނަ މަޝްރޫއު އަނެއް ސަރުކާރު އައިސް ނިންމުމަކީވެސް ތަބައީ ކަމެކެވެ. ކުރީގެ ސަރުކާރުތަކުން ކޮށްނިންމާފައި ހުންނަ ކަންކަން ހުޅުވުމަށް ރިބަން ކެނޑުމަކީވެސް މިބީދައިން ހިނގާ ކަމެކެވެ. ނަމަވެސް މިސަރުކާރުގެ އަމަލުތައް މިބުނެވުނު ތަބީއަތާއި ހިލާފުވާ ކަމަކީ ސަރުކާރުގެ އަމަލުތައް ހުންނަ ގޮތެއެވެ. އެއީ މިސަރުކާރުން ފެށި މިސަރުކާރުން ނިންމި ކަންކަން ކަމުގައި ދައްކަން އުޅޭ އުޅެމެއެވެ. އޭގެ ކުރެޓިކް ނަގަން މާބޮޑަށް އުޅޭ އުޅުމެއެވެ. ރައްޔިތުން ލައްވާ މިކަމުގެ ޝުކުރު ރައީސްއަށް ދަންނަވަން އަދަޔާ ޚިލާފަށް މަސައްކަތްކުރާ ކުރުމެވެ.

ވެރިކަމަށް އައީސުރެ ދައްކަމުން ގެންދިޔައީ ކުރީ ސަރުކާރުން ލޯނު ނެގި ވާހަކައެވެ. ދަރަނި ނެގި ވާހަކައެވެ. ކުރީ ސަރުކާރުން މަސްވެރިންނަށް ފާއިސާ ނުދައްކާ ހުރި ވާހަކައެވެ. ކުރީ ސަރުކާރުން ކުރުވި މަސައްކަތްތަކަށް، ކުންފުނިތަކަށް ފާއިސާ ނުދީ ހުރި ވާހަކައެވެ. މިސަރުކާރުގެ ފުރަތަމަ ބަޖެޓާއި ބެހޭގޮތުންވެސް ދެއްކީ ކުރީ ސަރުކާރުގެ މެމްބަރުން ބަޖެޓް ހެދި ގޮތުން ކަމެއް ނުވެގެން އުޅެން ޖެހޭ ވާހަކައެވެ. މައްސަލައެއް ނެތެއެވެ. ކުރީ ސަރުކާރުގެ މިހުރިހާ ވާހަކައެއްވެސް ދައްކަންވީއެވެ. ހަމަ އެހެންމެ ކުރީ ސަރުކާރުން ނިންމާފައި ހުރި މަޝްރޫއުތަކުގެ ރިބަން ކެނޑިއަސް އެވާހަކަވެސް ދައްކާލަންވާނެ ނޫންތޯއެވެ. މިއީ ކުރީ ސަރުކާރުގެ މަޝްރޫއުއެކޭ ބުނުމުގެ ހިތްވަރުވެސް ހުންނަން ވާނެ ނޫންތޯއެވެ. ކަމެއް ނުވުމުން އެހެން މީހުންގެ ބޮލަށް ކަންކަން ޖަހަން ހުންނަ ފޯރި އެހެން މީހުންކޮށް ނިންމި ކަންކަމުގެ ވާހަކަ ދައްކަންވެސް ހުންނަން ވާނެ ނޫންތޯއެވެ.

ޤަބޫލުފުޅުކުރައްވާށެއެވެ. ކޮވެލި އަމިއްލައަށް ހާލި ހަދަން ނޭގޭތީ ކާޅު ހާއްޔަށް ބިސް އަޅައެވެ. އެކަމަކު ހާލި ހެދީ ތިމަންނައޭ ކިޔައިގެން މުޅި ރަށުތެރެއަރަކު ނުދުވެ އެއް ނޫންތޯއެވެ. ވީ އިރު ކޮވެލި އުޅޭހެން އުޅެން ސަރުކާރުން މަސައްކަތްކުރި ނަމަވެސް ހަގީގަތުގައި ކޮވެއްޔަށްވާވަރުވެސް މިސަރުކާރަށް ނުވެއެއްނޫންތޯއެވެ. މިއީ ރައްޔިތުން ލައްވާ ސަނާ ކިޔުއްވައިގެން ޝުކުރު އަދާކުރުވައިގެން އަތްޖަހުވައިގެން ކަންކަމުހގެ ހަގީގަތް ފޮރުވޭނެ ޒަމާނެއް ނޫނެއް ނޫންތޯއެވެ. މުލީ އެއރޕޯޓްވެސް ހުޅުވަން ވީއެވެ. އާރްޓީއެލްގެ ލޯންޗް ބަންނަން އިންޑިޔާ ސަރުކާރުން އެހީވެސް ހޯދަންވީއެވެ. އޮޅުހިޔަލުގެ އޮނަރޝިޕްވެސް ނަގަންވީއެވެ. ކުރީ ސަރުކާރުގރ މަޗްރއުތައް ހުޅުވަން ރިބަންވެސް ކަނޑުއްވަންވީއެވެ. އެކަމަކު ހަޤީގަތް އޮޅުވާނުލައްވާށެއެވެ.