"މުލީ އެއަރޕޯޓުގެ މަސައްކަތަކީ ރައީސް މުއިއްޒު ފެއްޓެވި މަސައްކަތެއް ކަމަށް ބުނެ މިނިސްޓަރ ހެއްދެވީ އިތުރުފުޅެއް"
20 މެއި 2025 | އަންގާރަ 13:27އެ މަސައްކަތް ނިންމަން ރައީސް މުއިއްޒު އިސްކަން ދެއްވިކަމަށް ބުނުމަކީ ވެސް އިތުރުފުޅެއް ކަމަށް އޭނާ ވިދާޅުވި
ރައްޔިތުންގެ މަޖިލީހުގެ ދިއްގަރު ދާއިރާގެ ކުރީގެ މެމްބަރު އިކްރާމް ހަސަން
މުލީ އެއަރޕޯޓުގެ މަސައްކަތަކީ ރައީސް މުއިއްޒު ފެއްޓެވި މަސައްކަތެއް ކަމަށް ބުނެ ހައުސިން މިނިސްޓަރ އަބްދުﷲ މުއްތަލިބު ހެއްދެވީ އިތުރުފުޅެއް ކަމަށް ރައްޔިތުންގެ މަޖިލީހުގެ ދިއްގަރު ދާއިރާގެ ކުރީގެ މެމްބަރު އިކްރާމް ހަސަން ވިދާޅުވެއްޖެއެވެ.
އޭނާ އެފަދައިން ވިދާޅުވީ ރައީސް އިބްރާހީމް މުޙައްމަދު ސާލިޙްގެ ސަރުކާރުން ހަދަންފެށި މ. މުލީ އެއަރޕޯޓު ރަސްމީކޮށް ހުޅުވައިދެއްވުމުގެ ރަސްމިއްޔާތުގައި ހައުސިން މިނިސްޓަރ އަބްދުﷲ މުއްތަލިބު ދެއްކެވި ވާހަކަ އަށް އިޝާރާތްކުރައްވައެވެ. މުއްތަލިބު ވިދާޅުވި ގޮތުގައި 2014ވަނަ އަހަރު ފެށި ބިން ހިއްކުމުގެ މަސައްކަތާއި އެކު 540 މިލިއަން ރުފިޔާ ސަރުކާރުން މި މަޝްރޫޢުއަށް ވަނީ ޚަރަދުކޮށްފައެވެ. އަދި މި މަޝްރޫޢު އޮތީ ރައީސް ޞާލިހުގެ ނިމުނު އިރު ހުއްޓިފައި ކަމަށާއި އެ މަސައްކަތް އަވަހަށް ކުރިއަށް ގެންދިޔައީ މި ސަރުކާުރން ކަމަށް އޭނާ ވިދާޅުވިއެވެ.
ރާއްޖެއެމްވީ އަށް ދެއްވި ބަސްތީގަތުމެއްގައި، އެކަމަށް ރައްދު ދެއްވާ އިކްރާމް ވިދާޅުވީ އެއީ ކަނޑައެޅިގެން ހަގީގަތާއި ޚިލާފު ވާހަކަ އެއް ކަމަށެވެ. މުއްތަލިބް އެެހެން ވިދާޅުވި ނަމަވެސް މުލީގެ އެއަރޕޯޓު ތަރައްގީކުރުމުގެ މަސައްކަތް އެމްޓީސީސީއާ ހަވާލު ކުރީ، 2021 ވަނަ އަހަރުގެ ފެބްރުއަރީ މަހުގެ 28 ވަނަ ދުވަހުކަން އިކްރާމް ފާހަގަކުރެއްވިއެވެ. އެގޮތުން ބިން ހިއްކައިގެން 1200 މީޓަރުގެ ރަންވޭއަކާއެކު އެއާޕޯޓް ތަރައްގީކުރުމުގެ މަސައްކަތް ހަވާލުކޮށްފައިވަނީ 212 މިލިއަން ރުފިޔާއަށެވެ.
އިކްރާމް ވިދާޅުވީ މުލީ އެއާޕޯޓް އެޅުމަށް އެދެމުންދާތާ ވަރަށް ދުވަސް ވެފައިވާ ކަމަށާއި އެކަން ފުއްދައި ދިނީ ރައީސް ޞާލިހު ކަމަށް އޭނާ ވިދާޅުވިއެވެ. އެއީ ރައީސް ޞާލިހުގެ ވައުދާއި އެއްގޮތަށް ކުރި ވަރަށް ބޮޑު މަސައްކަތެއް ކަމަށް ވެސް އޭނާ ވަނީ ވިދާޅުވެފައެވެ. އިކްރާމް ވިދާޅުވީ މި ސަރުކާރާއި ރައީސް މުއިއްޒު އެ މަސައްކަތުގެ ކްރެޑިޓް ނަގާ މެޑަލް ޖަހަން އުޅުމަކީ ވަރަށް ހުތުރު ކަމެއް ކަމަށެވެ. އަދި އެ މަސައްކަތް ފަށާފައި ވަނީ ރައީސް ޞާލިހުގެ ސަރުކާރުގައި ކަމަށާއި އެ ވެރިކަން ނިމުނު އިރު ވެސް 80% މަސައްކަތް ނިމިފައި އޮތް ކަމަށް އޭނާ ވަނީ ވިދާޅުވެފައެވެ. އެހެންކަމުން އެ މަސައްކަތް ނިންމަން ރައީސް މުއިއްޒު އިސްކަން ދެއްވިކަމަށް ބުނުމަކީ ވެސް އިތުރުފުޅެއް ކަމަށް އޭނާ ވިދާޅުވިއެވެ.
މުލީ އެންމެންނަށް ވެސް އެނގޭ މިކަން ހިނގި ގޮތް. ސަރުކާރު ބަދަލު ނުވި ނަމަ މާ އަވަހަށް ނިމޭނެ. ވަރަށް އުނދަނގޫ މިކަމުގަ ސަރުކާރުގެ ހިއްސާ އެއް އޮތޭ ބުނަން. ބިން ހިއްކުމާއި ހައުސިން މިނިސްޓަރަކަށް މުއިއްޒު ހުރުމާއި ގުޅުވާގޮތެއް ނޭނގޭ އެއާޕޯޓް އެޅުމަށް ހިއްކި ކަމަށް ބުނާ ބިން. އޭރު މެމްބަރު ބިން ހިއްކަން ދިނީމަ އޭރުގެ މެމްބަރު ކުންފުންޏަކާއި ހަވާލުކޮށްގެން އެކްސްކަވޭޓަރެއް ވައްޓާލަ ވައްޓާލަ ތިބީ. އަލުން ބިން ހިއްކައިގެން އެއާޕޯޓް އެ އަޅުއްވަން ފެއްޓެވީ ރައީސް ޞާލިހު. އެކަން އާއްމުންނަށް ވެސް އެނގޭ.ރައްޔިތުންގެ މަޖިލީހުގެ ދިއްގަރު ދާއިރާގެ ކުރީގެ މެމްބަރު އިކްރާމް ހަސަން
އަންގާރަ ދުވަހު ބޭއްވި ރަސްމިއްޔާތެއްގައި އެ އެއާޕޯޓް ރަސްމީކޮށް ހުޅުއްވައިދެއްވީ ރައީސުލްޖުމްހޫރިއްޔާ ޑރ. މުހައްމަދު މުއިއްޒެވެ. މުލީ އެއާޕޯޓްގެ މަސައްކަތް ނިންމާ ޓެސްޓު ފްލައިޓް ޖެއްސީ މިދިޔަ މަހު 25 ވަނަ ދުވަހުއެވެ. އެއަށްފަހު ރަސްމީކޮށް އެ އެއާޕޯޓު ހުޅުވަން އޮތީ މެއިމަހު ކުރީކޮޅެވެ. އެހެން ނަމަވެސް ރީޖަނަލް އެއާޕޯޓްސް ކޮމްޕެނީއިން ބުނީ ރަސްމީކޮށް މުލީ އެއާޕޯޓު ހުޅުވުން ކެންސަލް ކުރި ކަމަށެވެ. ސަބަބު ހާމަ ނުކުރަށްވާ ކުއްލިއަކަށް ކެންސަލް ކުރަށްވާފައި މިއަދު އެ އާޕޯޓު ރަސްމީކޮށް ވަނީ ހުޅުވާފައެވެ.
