ލަންކާ ހެލްތް މިނިސްޓަރުގެ އިތުބާރު ނެތްކަމުގެ ވޯޓް ފެއިލް ކޮށްލާނަން: ފޮރިން މިނިސްޓަރ
26 އޯގަސްޓު 2017 | ހޮނިހިރު 12:05ރަޖިތާ ސެނެރަތުނޭގެ މައްޗަށް އިތުބާރު ނެތްކަމުގެ މައްސަލައެއް އެގައުމުގެ ގާނޫނު ހަދާ މަޖިލީހަށް ހުށަހަޅާފައިވަނީ، އިދިކޮޅު 39 މެންބަރުންގެ ސޮޔާއިއެކު
ލަންކާ ހެލްތް މިނިސްޓަރު ރަޖިތާ ސެނެރަތުނެ
ލަންކާގެ ގާނޫނު ހަދާ މަޖިލީހަށް އިދިކޮޅު މެންބަރުން ހުށަހަޅާފައިވާ ހެލްތް މިނިސްޓަރު ރަޖިތާ ސެނެރަތުނޭގެ އިތުބާރު ނެތްކަމުގެ ވޯޓް ފެއިލް ކޮށްލާނެ ކަމަށް ފޮރިން މިނިސްޓަރ ރަވީ ކަރުނަޔެކަ ވިދާޅުވެއްޖެއެވެ.
ލަންކާގެ ހެލްތް މިނިސްޓަރު އަދި ކެބިނެޓްގެ ތަރުޖަމާނު ރަޖިތާ ސެނެރަތުނޭގެ މައްޗަށް އިތުބާރު ނެތްކަމުގެ މައްސަލައެއް އެގައުމުގެ ގާނޫނު ހަދާ މަޖިލީހަށް ހުށަހަޅާފައި ވަނީ، އިދިކޮޅު 39 މެންބަރުންގެ ސޮޔާއިއެކުގައެވެ.
ކަރުނަޔެކަ ވިދާޅުވީ އިދިކޮޅު މެންބަރުން ހެލްތް މިނިސްޓަރުގެ ނޯ ކޮންފިޑެންސް މޯޝަންއަކަށް ދާން ނިންމީ، ސަރުކާރާއި، އަދި މިނިސްޓަރު ރަޖިތާ ސެނެރަތުނޭ އެ މަގާމުގައި ހުންނަވައިގެން ހޯއްދަވާ ކާމިޔާބީތައް ހަޖަމު ނުކުރެވޭތީ ކަމަށެވެ.
އެހެން ނަމަވެސް އިދިކޮޅު މެންބަރުން ވިދާޅުވަނީ އޭނާގެ މައްޗަށް އިތުބާރު ނެތްކަމުގެ ވޯޓަކަށް ދިއުމަށް ނިންމީ، މަގާމުގެ މަސްއޫލިއްޔަތު އަދާކުރުމަށް ނުކުޅެދިފައިވުމާއި،މަސްއޫލިއްޔަތު އަދާކުރުމުގައި ނާޖާއިޒު ފައިދާ ހޯދުމާއި، ރަޖިތާ ކުރިން ފިޝަރީޒް މިނިސްޓަރަކަށް ހުންނަވާ ރިޝްވަތު ހިއްޕެވުވާއި، ޖުޑީޝަރީއަށް ފާޑުކިޔާ ނުފޫޒު ފޯރުމުވަށް މަސައްކަތް ކުރައްވަމުންދާކަމަށް ތުހުމަތުކޮށެވެ.
ރަޖިތާގެ އިތުބާރުގެ މައްސަލަ ގާނޫނު ހަދާ މަޖިލީހަށް ހުށަހެޅީ ބުރާސްފަތި ދުވަހުއެވެ. އަދި މި މައްސަލަ ތާވަލް ކޮށްފައެއް ނުވެއެވެ.
