މަސައްކަތް ހުއްޓުވި މަގޫދޫ އެއަރޕޯޓު މިދައުރުގެ ތެރޭގައި ހުޅުވާނަން: މިނިސްޓަރު މުއްތަލިބު
މިހާރު ވެސް މަގޫދޫގެ ގޮނޑުދޮށް ހިމާޔަތް ކުރުމުގެ މަސައްކަތް ކުރިއަށްދޭ
ފ. މަގޫދޫ އެއަރޕޯޓް
ފ. މަގޫދޫ އެއަރޕޯޓުގެ މަސައްކަތް ކުރިއަށް ގެންދިއުމުގައި ލަސްކަމެއް އެބަހުރި ކަމަށާއި، ނަމަވެސް މި ދައުރުގެ ތެރޭގައި އެއަރޕޯޓުގެ މަސައްކަތް ނިންމައި، ހުޅުވާނެ ކަމަށް ހައުސިން އަދި ކޮންސްޓްރަކްޝަން މިނިސްޓަރު ޑރ. އަބްދުﷲ މުއްތަލިބު ވިދާޅުވެއްޖެއެވެ.
ހޯމަ ދުވަހު ރައްޔިތުން މަޖިލީހުގައި ހުޅުމާލޭ ދެކުނު ދާއިރާގެ މެމްބަރު ޑރ.އަހްމަދު ޝަމްހީދު ވަނީ މަގޫދޫގެ އެއަރޕޯޓުގެ މަސައްކަތް ހުއްޓިފައިވާތީ އަލުން އެމަޝްރޫއުގެ މަސައްކަތްތައް ފެށޭނެ ދުވަހަކާއި ގުޅޭގޮތުން ސުވާލު ކުރައްވާފައެވެ. އަދި 200 މިލިއަނެއްހާ ރުފިޔާ ހޭދަކޮށްފައިވާ މަގޫދޫ އެއަރޕޯޓުގެ މަސައްކަތް އެއްކޮށް ނިންމޭނެ ތާރީހާ ގުޅޭގޮތުން ސުވާލު ކުރެއްވިއެވެ. މީގެ އިތުރުން މަގޫދޫ އެއަރޕޯޓުގެ އޭބީސީ ލޭޔަރު ނިމިފައިވަނިކޮށް މަޝްރޫއު ހުއްޓާލައި، ގިނަ ދުވަސްވެއްޖެނަމަ ރައްޔިތުންގެ ކިހައި ފައިސާއެއް އިސްރާފުވާނެތޯ މެންބަރު ޝަމްހީދު ސުވާލު ކުރެއްވިއެވެ.
މިސުވާލުތަކަށް މިނިސްޓަރު މުއްތަލިބު ވިދާޅުވީ އެރަށުގެ އެއަރޕޯޓުގެ މަސައްކަތް ކުރިއަށް ގެންދާނެ ކަމަށާއި، މިދައުރުގެ ތެރޭގައި މަސައްކަތް ނިންމައި ހުޅުވާނެ ކަމަށެވެ. އަދި ވިދާޅުވީ މިހާރު ވެސް މަގޫދޫގެ ގޮނޑުދޮށް ހިމާޔަތް ކުރުމުގެ މަސައްކަތް ކުރިއަށްދާ ކަމަށެވެ.
މީގެ އިތުރުން މިނިސްޓަރު މުއްތަލިބު ވިދާޅުވީ ސަރުކާރުގެ ޕްލޭންގައި އަބަދުވެސް އޮތީ އެ އަތޮޅު ނިލަންދޫގައި އެއާޕޯޓެއް އެޅުމަށް ކަމަށެވެ. ނަމަވެސް ޕްލޭނާ ހިލާފަށް މަގޫދޫގައި އެއަރޕޯޓު އަޅަން ނިންމީ ރަނގަޅަށް ނޫން ކަމަށެވެ. އެހެންކަމުން ނިލަންދޫގައި ވެސް އެއަރޕޯޓެއް އަޅަންޖެހޭކަން މިނިސްޓަރު ފާހަގަކުރެއްވިއެވެ.
މަގޫދޫ އެއާޕޯޓުގެ މަސައްކަތް އިރާދަކުރެއްވިއްޔާ މިދައުރުގެ ތެރޭގައި ނިންމާފައި ހުޅުވާނަން. އަޅުގަނޑުމެން ގަބޫލުކުރަން ލަސްތަކެއް އައިސްފިކަން އަޅުގަނޑުމެން ގަބޫލުކުރަން ކުރީގައި ނިލަންދޫގައި އެޅުމަށް އެންމެ ކުރީގައި އަބަދުވެސް ނިލަންދޫގައި އެޅުމަށް ކަނޑައެޅިފައި އޮތް ޕްރޮޖެކްޓެއް މަގޫދޫއަށް ބަދަލުކުރީ އެންމެ ރަނގަޅަށް ނޫންކަން. އެހެންވީމަ އެއާއެކު ސަރުކާރުގެ ޑިވަލޮޕްމަންޓްގެ ޕްލޭންއާއެކު ނިލަންދޫގައި އެއަރޕޯޓެއް އަޅަންޖެހޭނެ. އެހެންނަމަވެސް މަގޫދޫގައި މަސައްކަތް ކުރިއަށް ގެންގޮސްފައި އޮތް މަޝްރޫއު އަޅުގަނޑުމެން ކުރިއަށް ގެންގޮސް ނިންމާނަން. އޭގައި މިވަގުތު ޝޯ ޕްރޮޓެކްޝަން މަސައްކަތް ކުރިއަށް އެބަދޭ. ސްލޯކަމެއް އުޅުނަސް އިރާދަކުރެއްވިއްޔާ މާ ލަސްތަކެއް ނުކުމެ އަޅުގަނޑުމެން މަސައްކަތް އަވަސްކޮށް އިރާދަކުރެއްވިއްޔާ އެއަރޕޯޓު ރައްޔިތުންނަށް ބޭނުންކުރެވޭ ތަނެއްގެ ގޮތުގައި ހެދުމަށް ސަރުކާރުން މަސައްކަތް ކުރަމުން ގެންދާ ވާހަކަ ދަންނަވަން.ހައުސިން އަދި ކޮންސްޓްރަކްޝަން މިނިސްޓަރު ޑރ. އަބްދުﷲ މުއްތަލިބު
މި ސަރުކާރާއެކު، ދެ ފަހަރެއްގެ މަތިން މަގޫދޫ އެއަރޕޯޓުގެ މަޝްރޫއު ވަނީ ހުއްޓުވާފައެވެ. މިކަމާއި ހިތްހަމަނުޖެހިގެން އެ ރަށުގެ ރައްޔިތުން ސަރުކާރާ ދެކޮޅަށް މުޒާހަރާ ވެސް ކޮށްފައިވެއެވެ.
މަގޫދޫ އެއަރޕޯޓް ތަރައްގީ ކުރުމުގެ މަސައްކަތުގެ ދަށުން ޓަރމިނަލާއި ރަންވޭގެ ގިނަ މަސައްކަތްތަކެއް ނިމިފައިވަނިކޮށް، މި މަޝްރޫއުގެ މަސައްކަތްތައް ހުއްޓުވުމުން ބޮޑެތި ގެއްލުންތަކެއް ލިބެމުންދާ ކަމަށް އެރަށުގެ ރައްޔިތުން ދަނީ ބުނަމުންނެވެ.
މަގޫދޫ އެއަރޕޯޓްގެ މަސައްކަތް ފަށާފަވަނީ 2023 ވަނަ އަހަރުގެ ކުރީކޮޅުއެވެ. މަގޫދޫ އެއަރޕޯޓް ތަރައްގީ ކުރަނީ ރަށުގެ ފަޅުން 30 ހެކްޓަރުގެ ބިން ހިއްކައިގެންނެވެ.
މަގޫދޫ އެއަރޕޯޓުގައި ފުރަތަމަ ތަރައްގީކުރަން ނިންމީ 1200 މީޓަރުގެ ރަންވޭއެކެވެ. ނަމަވެސް މިހާރުވަނީ އެއަރޕޯޓުގައި 1800 މީޓަރުގެ ރަންވޭއެއް އެޅުމަށް ނިންމާފައެވެ. މަގޫދޫ އެއަރޕޯޓް މަޝްރޫއަކީ ސަރުކާރުން 231 މިލިޔަން ރުފިޔާ ޚަރަދު ކޮށްގެން ކުރިއަށް ގެންދާ މަޝްރޫއެކެވެ.
މަގޫދޫގައި ތަރައްގީ ކުރަމުން އަންނަ އެއަރޕޯޓުގެ ހިންގުން ހަވާލުކޮށްފައިވަނީ ރީޖަނަލް އެއަރޕޯޓްސް ކޮމްޕެނީއާއެވެ.
