ދިވެހިރާއްޖޭގައި އެކި ގޮތް ގޮތުން އަނިޔާ ލިބުނު ކުޑަކުދިންގެ ތެރޭގައި އެންމެ ގިނައީ ޖިންސީ އަނިޔާ ލިބިފައިވާ ކުދިންކަން ހާމަވެއްޖެ އެވެ.

ކުޑަކުދިންގެ ދުވަހާއި ގުޅިގެން މޯލްޑިވްސް ބިއުރޯ އޮފް ސްޓެޓިސްޓިކްސް އާއްމުކުރި ތަފާސްހިސާބުތަކުން ދައްކާ ގޮތުގައި 2023 ވަނަ އަހަރު ހުށަހެޅިފައިވާ މައްސަލަތަކުގައި އަނިޔާލިބިފައިވާ ކުދިންގެ ތެރެއިން ޖިންސީ އަނިޔާ 264 ކުއްޖަކަށް ލިބިފައިވެ އެވެ.

ބިއުރޯ އޮފް ސްޓެޓިސްޓިކްސް ބުނީ ޖިސްމާނީ އަނިޔާ 191 ކުއްޖަކަށް، ގަނާކުރުން 19 ކުއްޖަކަށް، އަޅާނުލުން 45 ކުއްޖަކަށް، އަނގަބަހުން ނުވަތަ ނަފްސާނީ ގޮތުން ކުރެވޭ އަނިޔާ 45 ކުއްޖަކަށް، ނަހަމަގޮތުގައި ކަންކަން ކުރުވި 3 ކުއްޖަކަށް، އަމިއްލަ ނަފްސަށް ގެއްލުން ދިން 7 ކުއްޖަކަށް އަދި އިންޓަރނެޓް މެދުވެރިކޮށް ގަނާކުރި 2 ކުއްޖެއް ހިމެނޭ ކަމަށެވެ.

ބިއުރޯ އޮފް ސްޓެޓިސްޓިކްސް ބުނީ، މާރާމާރީގައި 86، ވައްކަމުގައި 4، ފޭރުމުގައި 2، މަސްތުވާތަކެތީގައި 8، ޓްރެފިކްގައި 19 އަދި އާއިލީ މައްސަލަތަކުގައި 95 ކުއްޖަކަށް އަނިޔާ ލިބިފައިވާ ކަމަށެވެ.

މީގެ އިތުރުން 2022 ގެ ބޯހިމެނުން ދައްކާގޮތުގައި ކިޔަވަން ނުދާ، މަސައްކަތުގައި ހަރަކާތްތެރިނުވާ އަދި ތަމްރީންގައި ހަރަކާތްތެރިނުވާ ކުދިންގެ އަދަދަކީ އާބާދީގެ 16 އިންސައްތައެވެ. އަދި އުމުރުން 15 އަހަރާއި 17 އަހަރާއި ދެމެދުގެ ގާތްގަނޑަކަށް ކޮންމެ 6 ކުއްޖަކުން 1 ކުއްޖަކީ މަސައްކަތްތެރިކަމުގައި ހަރަކާތްތެރިވާ ކުދިން ކަމަށް ތަފާސްހިސާބުތަކުން ދައްކައެވެ.