ޣައްޒާ އަށް އެހީ ފޯރުކޮށްދިނުމުގެ މަސައްކަތުގައި އިސްރާއީލް ބައިވެރި ނުވާނެ

ޣައްޒާ އަށް އެހީ ފޯރުކޮށްދިނުމުގެ މަސައްކަތުގައި އިސްރާއީލް އަދި ހަމާސްގެ ސީދާ ބައިވެރިވުމެއް ނޯންނާނެ ކަމަށް، އެމެރިކާ އިން އިސްރާއީލަށް ކަނޑައަޅާފައި ހުންނަވާ އެމްބެސެޑަރު މައިކް ހަކަބީ ވިދާޅުވެއްޖެ އެވެ.

ހުކުރު ދުވަހު އޭނާ ވިދާޅުވީ، އެހީ ފޯރުކޮށްދިނުމުގެ މަސައްކަތުގައި އިސްރާއީލުން ބައިވެރި ނުވި ނަމަވެސް، ސަލާމަތީ ކަންކަމުގައި އެހީތެރިވާނެ ކަމަށެވެ. 

ހަނގުރާމަ ހުއްޓާލުމުގެ އެއްބަސްވުމާ ޚިލާފަށް، މިދިޔަ މާޗު މަހުގެ ތެރޭގައި ޣައްޒާ އަށް އަލުން ހަމަލާ ދިނުމަށް އިސްރާއީލް އިން ފަށާފައިވާއިރު، ޣައްޒާ އަށް ބޭނުންވާ އެހީ ވެއްދުމަށް ވެސް ވަނީ ހުރަސް އަޅައިފަ އެވެ. 

މިއަހަރުގެ ޖަނަވަރީ މަހު އެކުލަވާލެވުނު ހަނގުރާމަ ހުއްޓާލުމުގެ އެއްބަސްވުމުގެ ދަށުން، ޣައްޒާ އަށް ފޯރުކޮށްދެމުން އަންނަ އެހީގެ މިންވަރު އިތުރު ވެސް ކުރެވުނެވެ. 

ނޫސްވެރިންގެ ބައްދަލުވުމުގައި ވާހަކަ ދައްކަވަމުން ހަކަބީ ވިދާޅުވީ، އިސްރާއީލް އިން ހަމައެކަނި އެހީތެރިވާނީ ސަލާމަތީ ކަންކަމުގައި ކަމަށެވެ. ސަބަބެއްގެ ގޮތުގައި އޭނާ ވިދާޅުވީ، އެކަމުގައި އެހީތެރި ވަނީ އެ ސަރަހައްދަކީ ހަނގުރާމައިގެ ސަރަހައްދަކަށް ވާތީ ކަމަށެވެ. އެހެން ނަމަވެސް، އެހީ ފޯރުކޮށްދިނުމުގެ އެއްވެސް ކަމެއްގައި އިސްރާއީލް އިން ބައިވެރި ނުވާނެ ކަމަށް އޭނާ ވަނީ ވިދާޅުވެފަ އެވެ. 

އިސްރާއީލާއި ހަމާސް އާއި ދެމެދު ހަނގުރާމަ ހުއްޓުމަކަށް ގެނައުމަށް އެމެރިކާ، ޤަތަރު އަދި މިޞްރުން ކުރަމުން އަންނަ މަސައްކަތް މިހާތަނަށް ކާމިޔާބުވެފައި ނުވެ އެވެ. 

އިސްރާއީލް އިން ކުރަމުން އަންނަ ޝަރުތު ތަކުގެ ތެރޭގައި ހަމާސް އިން މުޅިން ހަތިޔާރު ދޫކޮށްލުން ފަދަ ކަންކަން ހިމެނެ އެވެ. ނަމަވެސް، ހަމާސް އިން ވަނީ އެ ޝަރުތާ ދެކޮޅު ހަދާ ކަމަށް ބުނެފަ އެވެ. 

ޣައްޒާގައި އިސްރާއީލް އިން ހިންގަމުން އަންނަ މި ހަނގުރާމައިގައި މިހާތަނަށް ޣައްޒާ އިން 52،000 އަށް ވުރެ މީހުން ވަނީ ޝަހީދު ކޮށްލައިފަ އެވެ. އޭގެ ތެރޭގައި ގިނަ އިން ހިމެނެނީ އަންހެނުންނާއި، ކުޑަ ކުދިން އެވެ.