ޕާކިސްތާނަަށް އަމާޒުކޮށް އިންޑިއާ އިން ދިން ހަމަލާއާ ގުޅިގެން، އިންޑިއާގެ އަސްކަރީ ތަންތަނަށް އަމާޒުކޮށް ޕާކިސްތާނުން ހަަމަލާ ދީފި އެވެ.

ޕާކިސްތާނުން މި ހަމަލާތައް ދީފައި ވަނީ ހޮނިހިރު ދުވަހުގެ ފަތިހުގެ ވަގުތެއް ގައެވެ. އިންޑިއާގެ އަސްކަރީ ތަންތަނަށް އަމާޒުކޮށް ދިން މި ހަމަލާ އަށް ދީފައިވާ ނަމަކީ، "ބުންޔާން މަރްސޫސް" އެވެ. 

ޕާކިސްތާންގެ އަސްކަރިއްޔާ އިން ބުނެފައިވާ ގޮތުގައި، އިންޑިއާގެ މިސައިލް ސްޓޭޝަނަކަށާއި، ދެ އެއަރ ފީލްޑަކަށް ވަނީ ހަމަލާ ދީފަ އެވެ. 

އަސްކަރިއްޔާ އާއި ހަވާލާދީ މީޑިއާ ތަކުގައި ބުނެފައިވާ ގޮތުން، މި ތަންތަނަކީ ޕާކިސްތާނުގެ އާންމު ރައްޔިތުންނާއި، އަޅުކަން ކުރާ ތަންތަނަށާއި، އަދި އަސްކަރީ މަރުކަޒުތަކަށް އަމާޒުކޮށް ހަމަލާ ދީނުމަށް ބޭނުން ކުރި ތަންތަނެވެ. 

ޕާކިސްތާނުން ބުނެފައިވާ ގޮތުގައި މިދިޔަ ދުވަސްތަކުގެ ތެރޭގައި އިންޑިއާ އިން ވަނީ، ޕާކިސްތާންގެ ސަރަހައްދަށް އަމާޒުކޮށް 80 އަށް ވުރެ ގިނަ ޑްރޯން ފޮނުވާލާފައި އެވެ. އަދި ކަޝްމީރުގެ ލައިން އޮފް ކޮންޓްރޯލްގަ އާއި، ސިޔާލްކޯޓްގެ އިތުރުން އެހެނިހެން ސަރަޙައްދު ތަކުގައި ވެސް ހަނގުރާމައިގެ ޙަރަކާތްތައް ހިނގާފައިވާ ކަމަށް ވަނީ ބުނެފަ އެވެ.

އިންޑިއާގެ އަސްކަރީ ތަންތަނަށް އަމާޒުކޮށް ޕާކިސްތާނުން ހަމަލާ ދިނުމުގެ ކުރިން، ޕާކިސްތާންގެ ބޮޑު ވަޒީރު ޝަހްބާޒް ޝަރީފް ވަނީ ޤައުމީ ސަލާމަތާ ގުޅޭ މުހިންމު ނިންމުންތައް ނިންމަވާ މަޖިލީހުގެ ބައްދަލުވުމެއް ބާއްވަވާފައި އެވެ. މި މަޖިލީހަކީ ނިއުކްލިއަރ ޚަރަކާތްތަކާއި، ހަތިޔާރާ ގުޅޭ ނިންމުންތައް ވެސް ނިންމާ މަޖިލީހެވެ.

ޕާކިސްތާނުން ބުނެފައިވާ ގޮތުގައި އދ ޗާޓަރުގެ 51 ވަނަ މާއްދާގެ ދަށުން އިންޑިއާ އަށް ހަމަލާ ދިނުމުގެ ޙައްގު އެ ޤައުމަށް ލިބިގެންވާ ކަމަށެވެ. އެއީ އިންޑިއާ އިން އެއްވެސް ހެއްކެއް ނެތި ޕާކިސްތާނަށް ހަމަލާ ދިން ކަމަށް ބުނެ އެވެ.

އިންޑިއާ އާއި ޕާކިސްތާނާ ދެމެދު ގައި އިތުރަށް ހަނގުރާމައިގެ ޙާލަތު ގޯސްވެދާނެ ކަމުގެ ބިރު އޮތް ކަމަށް ސަރަޙައްދީ މާހިރުން ވަނީ ފާހަގަކޮށްފަ އެވެ.