ހަމާސް އިން މެދުވެރިންނާ ބައްދަލުކުރި ނަމަވެސް އެއްވެސް ކުރިއެރުމެއް ނުލިބުނު: މަސްދަރުތައް

ހަމާސްގެ ވަފުދެއް މި ހަފްތާގައި ދޯހާގައި މިސްރާއި ގަތަރުގެ މެދުވެރިންނާއި އެކު ދެ ބައްދަލުވުމެއް ބޭއްވި ނަމަވެސް ޣައްޒާގައި ހަނގުރާމަ ހުއްޓާލުމަށް ކުރި މަސައްކަތުގައި އެއްވެސް ކުރިއެރުމެއް ނުލިބުނު ކަމަށް އެ ޖަމާއަތާ ގާތް މަސްދަރުތަކުން ހުކުރު ދުވަހު ބުނެފި އެވެ.

"މިސްރުގެ އޮފިޝަލުން ބުދަ ދުވަހާއި ބުރާސްފަތި ދުވަހު ދޯހާގައި ޗީފް ނެގޯޝިއޭޓަރު ޚަލީލް އަލް ހައްޔާ އިސްކޮށް ހުންނަވައިގެން ހަމާސްގެ މަތީ ފެންވަރުގެ ވަފުދަކާއި، ގަތަރުގެ އޮފިޝަލުންނާ ދެ ފަހަރެއްގެ މަތިން ބައްދަލުކުރެއްވި ކަމަށް އޭއެފްޕީއަށް މައުލޫމާތު ދެއްވަމުން އެއް މަސްދަރަކުން ބުންޏެވެ.

ދެވަނަ މަސްދަރަކުން މި މަޝްވަރާތަކަކީ "ސީރިއަސް" މަޝްވަރާތަކެއް ކަމަށް ސިފަކުރި ނަމަވެސް އޭގެ ނަތީޖާއެއްގެ ގޮތުން ވަރުގަދަ ކުރިއެރުމެއް ނުލިބުނު ކަމަށް ބުނެފައިވެ އެވެ.

ޣައްޒާގެ ހަނގުރާމަ ހުއްޓުމާއި ގުޅޭ މަޝްރާތަކަށް ކުރިއެރުމެއް ނުލިބުނު ނަމަވެސް، އިސްރާއީލް އިން ޣައްޒާގައި ހިންގަމުން އަންނަ ހަނގުރާމަ ހުއްޓުވުމުގެ އައު ހުށަހެޅުމެއްގެ މައުލޫމާތު ހާމަ ކުރަން ތައްޔާރު ކަމަށް، އެމެރިކާގެ ރައީސް ޑޮނަލްޑް ޓްރަމްޕް ވަނީ ވިދާޅުވެފައެވެ.

ޓްރަމްޕް ވިދާޅުވީ ޣައްޒާގައި ހިނގަމުން އަންނަ ހަނގުރާ ހުއްޓުވުމާއި، ހަނގުރާމައިގެ ސަބަބުން ހައްޔަރު ކޮށްފައިވާ ރަހީނުން ދޫކޮށްލުމާ ގުޅޭ އައު ހުށަހެޅުމެެއް ކުރިއަށް އޮތް 24 ގަޑިއިރުގެ ތެރޭގައި ހާމަ ކުރައްވާނެ ކަމަށެވެ.

އެމެރިކާގެ ރިޔާސީ ގަނޑުވަރު ވައިޓް ހައުސްގައި ހުންނަވާ ޓްރަމްޕް ވިދާޅުވީ، ޣައްޒާގައި ހިނގަމުން އަންނަ ހަނގުރާމައާ ގުޅޭ މަޝްވަރާތަކެއް މިވަގުތު ކުރައްވަމުން ގެންދަވާ ކަމަށާއި، އެކަމާ ގުޅުން ހުރި މައުލޫމާތުތައް ހިއްސާ ކުރައްވާނެ ކަމަށެވެ.

ޓްރަމްޕް މިހެން ވިދާޅުވެފައި ވަނީ ޣައްޒާގެެ ހަނގުރާމަ އިތުރަށް ފުޅާ ކުރަން ނިންމާފައިވާ ކަމަށް އިސްރާއީލް ހާމަކޮށްފައި ވަނިކޮށެވެ. އަދި ހަނގުރާމައިގެ އިތުރުން، ޣައްޒާ އަށް އިންސާނީ އެހީތެރިކަން ވެއްދުމަށް އިސްރާއީލް އިން ހުރަސް އަޅާފައިވާ ދަނޑިވަޅެއްގަ އެވެ.

ޣައްޒާ ހަނގުރާމައާ ގުޅިގެން ހަމާސް އާއި އިސްރާއީލާ ދެމެދު ގިނަ މަޝްވަރާތަކެއް ކޮށްފައިވާއިރު، މިހާތަނަށް އެ މަޝްވަރާތަކުން އެއްވެސް ކުރިއެރުމެއް ލިބިފައި ނެތެވެ.

މިއަހަރުގެ ޖަނަވަރީ މަހުގެ ތެރޭގައި ހަނގުރާމަ ހުއްޓާލަން އެއްބަސްވީ ފަހުން، މާޗު މަހުގެ ތެރޭގައި އިސްރާއީލުން ވަނީ އަލުން ޣައްޒާ އަށް ހަމަލާތައް ދޭން ފަށައިފަ އެވެ.

އެމެރިކާގެ ރިޔާސީ ދެ ވަނަ ދައުރަކަށް ވަޑައިގެންނެވި ފަހުން ޓްރަމްޕް އަންނަނީ ޣައްޒާ ހަނގުރާމަ ހުއްޓާލުމަށް ވަރަށް ބޮޑަށް ބާރު އަޅުއްވަމުންނެވެ. އަދި އެކަމާ ގުޅިގެން ޓްރަމްޕް އަންނަނީ ވަރަށް ގިނައިން ވާހަކަ ދައްކަވަމުންނެވެ.