ގަލްފުގެ ބައެއް ގައުމުތަކުން ގަތަރާ ދެކޮޅަށް އެޅި އަދި އަޅަމުންދާ ފިޔަވަޅުތަކުގައި "އަސްކަރީ އެއްވެސް ބަައެއް" ނުހިމެނޭ ކަމަށް ޔޫއޭއީން އެމެރިކާ އަށް ކަނޑައަޅުއްވާފައިވާ ސަފީރު ޔޫސުފް އަލް އުތައިބާ ވިދާޅުވެއްޖެއެެވެ.
ސަފީރު ވިދާޅުވީ ގަތަރާ ދެކޮޅަށް އެޅި އަދި އަޅަމުންދާ ފިޔަވަޅުތަކުގައި އަސްކަރީ އެއްވެސް ބައެއް ނުހިމެނޭ އިރު، ފަަހަރުގައި އަދިވެސް އިގްތިސާދީ ގޮތުން ފިއްތުންތައް ކުރިމަތި ކުރަން ޖެހިދާނެ ކަމަށެވެ. އޭނާ ވިދާޅުވީ، ހަމަ ޔަގީނުންވެސް މިހާރު ގައުމުތަކުން ގަތަރާ މެދު ގެންގުޅޭ އުސޫލުތަކުގައި އެއްވެސް އަސްކަރީ ބައެއް ނުހިމެނޭނެ ކަމަށެެވެ.
އެމެރިކާގެ ވޮޝިންޓަންގައި ނޫސްވެރިންނާ ބައްދަލު ކުރައްވާ ވާހަކަ ދައްކަވަމުން އުތައިބާ އިތުރަށް ވިދާޅުވީ، އޭނާ އެމެރިކާގެ ޑިފެންސް ސެކްރެޓަރީ ޖިމް މެޓިސް އާއި، އެމެރިކާ އިން ގަތަރުގައި ހިންގާ އަލް އުދެއިދް އަސްކަރީ ވައިގެ ބޭސްއާ ބެހޭ ގޮތުން ވަރަށް ގިނަ ފަހަރު މަޝްވަރާ ކުރައްވާފައިވާ ކަމަށެވެ. އަދި އެ މަޝްވަރާތަކުގައި މިހާރު ގަލްފުގައި ހިނގަމުންދާ ހަމަނުޖެހުންތަކުގައި އަލް އުދެއިދް ބޭސްއަށް އެއްވެސް ބުރުލެއް ނާރާނެ ކަން ޔަގީންކޮށްދެއްވާފައިވާ ކަމަށެވެ.
އުތައިބާ ވިދާޅުވީ ސައުދީ، ޔޫއޭއީ، ބަހްރައިން އަދި މިސްރުން ގަތަރަށް ކުރާ ޑިމާންޑްތަކެއް އެކުލަވާލަމުންދާ ކަމަށާއި، "އެ ޑިމާންޑްތައް ލިސްޓެއްގެ ސިފައިގައި ވަރަށް އަވަހަށް އެމެރިކާ" އަށް ހުށަހަޅާނެ ކަމަށެވެ. އޭނާ އިތުރަށް ވިދާޅުވީ ގަތަރުގެ މައްސަލާގައި ސައުދީ، ޔޫ އޭއީ، ބަހްރައިން އަދި މިސްރުން ގަަތަރުގެ އަމަލުތައް އިސްލާހު ކުރަން މަސައްކަތް ކުރަމުން ދަނީ އިގްތިސާދި އަދި ސިޔާސީ ފިއްތުންތަކުގެ ތެރެއިން ކަމަށެވެ.
ގަތަރުން ޓެރަރިޒަމަށް ހިއްވަރު ދޭ ކަމަށް ބުނެ ގަތަރާއި އޮންނަ ޑިޕްލޮމިޓިކް ގުޅުން އަރަބި ހަ ގައުމަކުން ކަނޑާލާފައިވާއިރު އެގައުމުތަކަކީ ސައުދީ އަރަބިއްޔާ، ޔޫއޭއީ، މިސްރު، ބަހްރައިން, ޔަމަން އަދި ލީބިޔާ އެވެ. ގަތަރާ މެދު ކުރެވޭ އެންމެހާ ތުހުމަތުތައް ގަތަރުން ދޮގު ކުރެއެވެ.
