ޣައްޒާގައި އިސްރާއީލްގެ ހަނގުރާމަ ފުޅާ ކުރަން ނިންމައިފި

އިސްރާއީލް އިން ޣައްޒާގައި ހިންގަމުން އަންނަ ހަނގުރާމަ ފުޅާ ކުރަން ނިންމާފައިވާ ކަމަށް، އިސްރާއީލްގެ ބޮޑު ވަޒީރު ބެންޖަމިން ނަތަންޔާހޫ ވިދާޅުވެއްޖެ އެވެ.

ހޯމަ ދުވަހު އޭނާ ވިދާޅުވީ ޣައްޒާގައި އައު ހަނގުރާމައެއް ފަށައި، ހަނގުރާމަ ފުޅާ ކުރަން ނިންމާފައިވާ ކަމަށެވެ. އަދި އެ ހަނގުރާމައިގެ މަޤުސަދަކީ ހަމާސް މުޅިން ބަލި ކުރުން ކަމަށް ވެސް އޭނާ ވިދާޅުވި އެވެ. ނަމަވެސް، އެ ހަނގުރާމައިގައި ޣައްޒާގެ ކިހާ ސަރަހައްދެއް ހިފާނެ ކަމެއް ސާފުކޮށް ވިދާޅުވެފައި ނުވެ އެވެ. 

އިސްރާއީލްގެ ސަލާމަތީ ކެބިނެޓުން އެކަން ފާސްކޮށްފައިވާއިރު، އެ އޮޕަރޭޝަންގެ ތެރޭގައި ޣައްޒާގެ އާބާދީ ދެކުނަށް ގެންދިޔުމާއި، ހަނގުރާމައިގެ ސަރަހައްދުތަކުން މީހުން ދުރު ކުރުން ހިމެނޭ ކަމަށް ވަނީ ބުނެފަ އެވެ.

މިއަހަރުގެ ފެބްރުވަރީ މަހުގެ ތެރޭގައި އެމެރިކާގެ ރައީސް ޑޮނަލްޑް ޓްރަމްޕް ހުށަހެޅުއްވި، ޣައްޒާގެ ރައްޔިތުން އެހެން ޤައުމަކަށް ބަދަލު ކުރުމުގެ ހުށަހެޅުން އަދި ވެސް ނަތަންޔާހޫ ކުރިއަށް ގެންދާ ކަމަށް އިސްރާއީލްގެ އޮފިޝަލަކު ވަނީ ހާމަކޮށްފަ އެވެ. 

އެ އޮޕަރޭޝަނާ ގުޅިގެން ޔޫރަޕިއަން ޔޫނިއަން އިން ވަނީ އެކަމުގެ ކަންބޮޑުވުން ފާޅު ކޮށްފަ އެވެ. އަދި އެކަމުގެ ސަބަބުން ޣައްޒާގެ ރައްޔިތުންނަށް އިތުރު ގެއްލުންތަކެއް ލިބިދާނެ ކަމުގެ ކަންބޮޑުވުން ވެސް ވަނީ ފާޅު ކޮށްފަ އެވެ. 

މިއަހަރުގެ ޖަނަވަރީ މަހުގެ ތެރޭގައި ހަނގުރާމަ ހުއްޓާލުމަށް ފަހު، މާޗު މަހުގެ ތެރޭގައި އިސްރާއީލް އިން ވަނީ އަލުން ޣައްޒާ އަށް ހަމަލާ ދޭން ފަށައިފަ އެވެ. މި ހަނގުރާމައިގައި މިހާތަނަށް ޣައްޒާ އިން 52،567 މީހުން ޝަހީދުވެފައިވާ ކަމަށް ޣައްޒާގެ ޞިއްޙީ ވުޒާރާ އިން ވަނީ ހާމަކޮށްފަ އެވެ.