އޮސްޓްރޭލިއާގެ އާންމު އިންތިޚާބު ކާމިޔާބު ކުރައްވައި، ބޮޑު ވަޒީރު އެންތަނީ އަލްބަނީސް ވެރިކަމުގެ ދެ ވަނަ ދައުރެއް ކަށަވަރު ކުރައްވައިފި އެވެ.

އޮސްޓްރޭލިއާގެ ޤާނޫނު ހަދާ މަޖިލީހުގައި 150 ގޮނޑި ހިމެނޭއިރު، މެޖޯރިޓީ ހޯދުމަށް 76 ގޮަނޑި ކާމިޔާބު ކުރަން ޖެހެ އެވެ. އަލްބަނީސް ނިސްބަތްވެ ވަޑައިގަންނަވާ ލޭބާ ޕާޓީ އިން ވަނީ ޤާނޫނު ހަދާ މަޖިލީހުގެ 85 ގޮނޑި ކާމިޔާބު ކުރައްވާފައި އެވެ.

މި ކާމިޔާބާ އެކު އަލްބަނީސް އަށް ބޮޑު ވަޒީރު ކަމުގެ ދެ ވަނަ ދައުރެއް ލިބިވަޑައިގެންފައިވާއިރު، އޭނާ އަށް ވަނީ އެ ޤައުމުގެ ތާރީޚުން ވެސް ޖާގަ ލިބިވަޑައިގެންފަ އެވެ.

އެގޮތުން އަލްބަނީސް ވެގެން ގޮސްފައި ވަނީ ފާއިތުވި 20 އަހަރުގެ ތެރޭގައި ވެސް، ވެރިކަމުގައި ހުންނެވި ފަރާތަކަށް ޖެހި ޖެހިގެން ދެ ވަނަ ދައުރެއް ކާމިޔާބު ކުރެއްވި ފުރަތަމަ ބޭފުޅާ އަށެވެ.

އިންތިޚާބުގެ ކާމިޔާބީ އާއެކު، އުފާ ފާޅު ކުރައްވަމުން އަލްބަނީސް ވިދާޅުވެފައި ވަނީ އިސްޓްރޭލިއާގެ ބޮޑު ވަޒީރުގެ ގޮތުގައި ރައްޔިތުންނަށް ޚިދުމަތް ކުރުމަކީ އޭނާގެ ޙަޔާތުގައި ވެސް ލިބޭ އެންމެ ބޮޑު އުފާ ކަމަށެވެ.

މީގެ އިތުރުން އަލްބަނީސް ވިދާޅުވީ، އޮސްޓްރޭލިއާ ކުރިއަށް ދާން ވާނީ އެހެން އެއްވެސް ޤައުމަކަށް ނުވަތަ ބަޔަކަށް ބަރޯސާ ވުމެއް ނެތި ކަމަށެވެ. އަދި އޭނާގެ ސަރުކާރުން އަބަދު ވެސް އިސްކުރާނީ އޮސްޓްރޭލިއާގެ އަމިއްލަވަންތަކަން ކަމަށާއި، ޤައުމަށް ފައިދާ ވާނެ މަގުތަކުން ކުރިއަށް ދިޔުން ކަމަށް ވެސް އަލްބަނީސް ވަނީ ވިދާޅުވެފަ އެވެ.

މި އިންތިޚާބުގައި އޮސްޓްރޭލިއާގެ އިދިކޮޅު ލީޑަރު ޕީޓާ ޑަޓުން އަށް ވަނީ ބޮޑު ނާކާމިޔާބެެއް ކުރިމަތިވެފަ އެވެ. އެގޮތުން 20 އަހަރު ވަންދެން މަޖިލީހުގައި އޭނާ ތަމްސީލު ކުރައްވަމުން ގެންދިޔަ ގޮނޑި ވެސް ވަނީ ގެއްލިފަ އެވެ. އޭނާގެ މައްޗަށް ކުރި ހޯދީ ބޮޑު ވަޒީރު އަލްބަނީސްގެ ލޭބާ ޕާޓީގެ ކެންޑިޑޭޓް އެވެ. ޑަޓުން ވަނީ އިންތިޚާބުގައި ލިބިވަޑައިގެން ނާކާމިޔާބު ޤަބޫލު ކުރައްވައި، ބަލި ޤަބޫލު ކުރައްވާ ކަމަށް ވެސް ވިދާޅުވެފަ އެވެ.

އަލްބަނީސް ހޯއްދެވި ކާމިޔާބާ ގުޅިގެން އެކި ޤައުމުތަކުގެ ރައީސުންނާއި، ބޮޑު ވަޒީރުން އަންނަނީ އޭނާ އަށް މަރުޙަބާ ވިދާޅުވަމުންނެވެ.