އީރާންގައި ހުންނަ އޮސްޓްރޭލިއާގެ ސަފީރު އެ ޤައުމު ދޫކޮށް ފުރައިގެން ގޮސްފައިވާ ކަމަށާއި، ދެ ޤައުމުގެ ދެ މެދުގައި އޮތް ޑިޕްލޮމެޓިކް ގުޅުން ދަށް ކޮށްފައިވާ ކަމަށް އީރާންގެ ސަރުކާރުން ހާމަކޮށްްފި އެވެ.

އީރާންގައި ހުންނަ އޮސްޓްރޭލިއާގެ ސަފީރު ފުރައިގެން ގޮސްފައިވާ ކަމަށް އީރާންގެ ސަރުކާރުން ހާމަކޮށްފައިވާއިރު، ސިޑްނީ އަދި މެލްބޯން ސިޓީގައި ޔަހޫދީންނާ ދެކޮޅަށް ހިންގި ހަމަ ނުޖެހުން ތަކުގެ ފަހަތުގައި އީރާން އޮތް ކަމަށް ބުނެ، އޮސްޓްރޭލިއާ އިން ވަނީ އެ ޤައުމުގައި ހުންނަ އީރާންގެ ސަފީރު ޤައުމުން ފޮނުވާލައިފަ އެވެ.

ބުރާސްފަތި ދުވަހު އީރާންގެ ފޮރިން މިނިސްޓްރީގެ ތަރުޖަމާނު އިސްރާއީލް ބަޣާއީ ވިދާޅުވީ، ޑިޕްލޮމެޓިކް ގުޅުންތަކާ އެއްގޮތްވާ ގޮތުގެ މަތިން، އަދި އޮސްޓްރޭލިއާގެ ފިޔަވަޅަށް ޖަވާބު ދިނުމުގެ ގޮތުން، އީރާން އިން އޮސްޓްރޭލިއާއާ އެކު ޑިޕްލޮމެޓިކް ގުޅުންތައް ދަށްކޮށްފައިވާ ކަމަށެވެ. އަދި އީރާންގައި ހުންނަ އޮސްޓްރޭލިއާގެ ސަފީރު ވެސް އެ ޤައުމު ދޫކޮށް ގޮސްފައިވާ ކަމަށް އޭނާ ވަނީ ވިދާޅުވެފަ އެވެ.

މިދިޔަ ހަފުތާގެ ތެރޭގައި އޮސްޓްރޭލިއާގެ ބޮޑު ވަޒީރު އެންތަނީ އަލްބަނީސް ވަނީ، އީރާންގެ ވެރި ރަށް ތެހެރާންގައި ހުންނަ އޮސްޓްރޭލިއާގެ އެމްބަސީގެ މަސައްކަތްތައް ހުއްޓާލުމަށް އަންގަވައިފަ އެވެ. އަދި އެ ޤައުމުގެ ހުރިހާ ޑިޕްލޮމެޓުން ތިން ވަނަ ޤައުމެއްގައި ރައްކާތެރިކަން ހޯދައިގެން ތިބި ކަމަށް ވެސް އަލްބަނީސް ވަނީ ހާމަ ކުރައްވައިފަ އެވެ.

މިއީ ދެ ވަނަ ބޮޑު ހަނގުރާމަ އަށް ފަހު، އޮސްޓްރޭލިއާ އިން އެ ޤައުމުގައި ހުންނަ އެހެން ޤައުމެއްގެ ސަފީރަކު ޤައުމުން ބޭރު ކުރި ފުރަތަމަ ފަހަރެވެ. މިއީ ބޭރު ޤައުމު ތަކުގައި ނޭދެވޭ ޙަރަކާތްތައް ހިންގުމުގެ ތުހުމަތު އީރާނާ ދެކޮޅަށް ހުޅަނގުގެ ޤައުމު ތަކުން ކުރަމުން އަންނަ ކަމުގެ އިތުރު ހެއްކެކެވެ.

އީރާންގެ މައްޗަށް އޮސްޓްރޭލިއާ އިން ކޮށްފައިވާ މި ތުހުމަތުތައް އެ ޤައުމުން ވަނީ ދޮގު ކޮށްފަ އެވެ. އެގޮތުން ޔަހޫދީންނާ ދެކޮޅަށް އީރާން އިން މަސައްކަތް ކުރި ކަމުގެ ތުހުމަތަކީ އެއްވެސް އަސާސެއް ނެތް ތުހުމަތެއް ކަމަށް އީރާން އިން ވަނީ ބުނެފަ އެވެ. ހަމަ އެހެންމެ، އޮސްޓްރޭލިއާއާ އެކު ގޮތް ގުޅުން ގޯސްވެގެން ދިޔުމަކީ އީރާން އިން އެއްވެސް އިރެއްގައި އެދޭ ކަމެއް ނޫން ކަމަށް ވެސް އެ ޤައުމުން ބުނެފައިވެ އެވެ.

އިތުރަށް އީރާންގެ ސަރުކާރުން ބުނެފައި ވަނީ އޮސްޓްރޭލިއާގެ ވެރި ރަށް ކެންބެރާގައި ހުންނަ އީރާންގެ އެމްބަސީ އިން ކޮންސިއުލާ ޚިދުމަތްތައް މިހާރު ވެސް ފޯރުކޮށްދެމުން ގެންދާނެ ކަމަށެވެ.