ފަލަސްޠީނުގެ ޣައްޒާގައި ކުރިއަށް ގެންދަމުން އަންނަ އިންސާނީ އެހީގެ ޕްރޮގްރާމް ހުއްޓުމުގެ ނުރައްކަލާ ކުރިމަތިލާން ޖެހިއްޖެ އެވެ.

ރެޑް ކްރޮސް އިން ހުކުރު ދުވަހު ހާމަކޮށްފައިވާ ގޮތުގައި، ޣައްޒާ އަށް އިންސާނީ އެހީ ފޯރުކޮށްދިނުމަށް، ހައްދުފަހަނަ އަޅާފައިވާ އިސްރާއީލުން ދަތި ކުރަމުންދާތީ، އެ ސަރަހައްދުގައި އިންސާނީ އެހީގެ މަސައްކަތްތައް މުޅިން ހުއްޓުމުގެ ނުރައްކަލާ ކުރިމަތިލާން ޖެހިފައިވާ ކަމަށެވެ. 

އިންޓަނޭޝަނަލް ކޮމެޓީ އޮފް ދަ ރެޑް ކްރޮސް (އައިސީއާރުސީ) އިން ނެރުނު ބަޔާނެއްގައި ބުނެފައި ވަނީ، އެހީ ފޯރުކޮށްދިނުން އަވަހަށް ނުފެށިއްޖެ ނަމަ، ޣައްޒާގައި ހިންގާ ޕްރޮގްރާމްތައް ކުރިއަށް ގެންދިޔުމަށް ބޭނުންވާ ކާބޯ ތަކެއްޗާއި، ބޭސް އަދި އެހެނިހެން ވެސް މުހިންމު ތަކެތި ހޯދުމަށް ނުކުޅެދޭނެ ކަމަށެވެ.

މި އަހަރުގެ މާޗު މަހުގެ ދެ ވަނަ ދުވަހު އިސްރާއީލުން ވަނީ ޣައްޒާ އަށް އެހީ ފޯރުކޮށްދިނުން ހުއްޓުވައިފަ އެވެ. މިއީ 15 މަސް ދުވަހުގެ ހަނގުރާމަ ހުއްޓަލާން ނިންމުމަށްފަހު، އަލުން ހަމަލާ ދޭން ފެށުގެ ކުރިން އިސްރާއީލް އިން ނިންމި ނިންމުމެކެވެ.

އެހީ ފޯރުކޮށްދިނުމަށް ހުރަސް އަޅަން އިސްރާއީލުން ފެށުމާ އެކު، އދ އިން ވަނީ އިންސާނީ ކާރިސާއެއްގެ އިންޒާރު ވެސް ދީފަ އެވެ. 

ޣައްޒާގެ 2.4 މިލިއަން ރައްޔިތުންނަށް ބޭނުންވާ އެހީގެ މައްޗަށް އިސްރާއީލުން ދަނީ އެއްވެސް އިމެއް ނެތި ހުރަސް އަޅަމުންނެވެ. 

ރެޑް ކްރޮސް އިން ބުނެފައިވާ ގޮތުގައި ދުވާލަކު އެއް ފަހަރު ކާންދޭ ކެއުން، ހަމައެކަނި ކުރިއަށް ގެންދެވޭނީ ދެ ހަފުތާ ނުވަތަ ތިން ހަފުތާގެ މުއްދަތަކަށެވެ.

މީގެ އިތުރުން ހޮސްޕިޓަލް ތަކުގައި ބޭހާއި، ޞިއްޙީ އެހީތެރިކަަމަށް ބޭނުންވާ ސާމާނު ވެސް ވަރަށް ބޮޑަށް މަދުވެފައިވާ ކަމަށާއި، ފެނުގެ ނިޒާމު ހަލާކުވެ، ބަލިމަޑުކަމުގެ ނުރައްކާތެރިކަން އިތުރުވެފައިވާ ކަމަށް ވެސް ރެޑް ކްރޮސް އިން ވަނީ ބުނެފަ އެވެ.

ރެޑް ކްރޮސް އިން ބުނީ ޣައްޒާ އަށް ބޭނުންވާ އެހީތެރިކަން ވަންނަން ޖެހޭނެ ކަމަށާއި، ހަނގުރާމައިގެ ސަބަބުން ހައްޔަރު ކޮށްފައިވާ މީހުން ވެސް ދޫކޮށްލަން ޖެހޭނެ ކަމަށެވެ. އަދި ވަކިން ޚާއްސަކޮށް އާންމު ރައްޔިތުން ރައްކާތެރި ކުރަން ޖެހޭނެ ކަމުގައި ވެސް ވަނީ ބުނެފަ އެވެ. 

އެކަމާ ދެކޮޅަށް އަވަސް ފިޔަވަޅުތަކެއް ނޭޅިއްޖެ ނަަމަ، ޣައްޒާ އިތުރަށް ހަލާކުވެ، އިންސާނީ އެހީގެ މަސައްކަތްތައް ކޮންޓްރޯލް ނުކުރެވޭ ހިސާބަށް ދާނެ ކަމަށް ވެސް ވަނީ ބުނެފަ އެވެ. 

ޣައްޒާ އަށް އިންސާނީ އެހީ ފޯރުކޮށްދިނުމަށް އިސްރާއީލުން ހުރަސް އަޅަމުން އަންނައިރު، ގިނަ ޤައުމުތަކުން ވަނީ އެކަން ކުށްވެރިކޮށްފަ އެވެ. އަދި ޣައްޒާ އަށް އިންސާނީ އެހީ ފޯރުކޮށްދިނުމުގެ ފުރުސަތު ދިނުމަށް ވެސް ޤައުމުތަކުން އަންނަނީ ގޮވާލަމުންނެވެ.