ބާސެލޯނާ އަށް އޮތީ އިޙުތިރާމް، ބިރުވެރި ކަމެއް ނެތް: އިންޒާގީ

ޔުއެފާ ޗެމްޕިއަންސް ލީގުގެ ސެމީ ފައިނަލްގެ ފުރަތަމަ ލެގުގަައި ބާސެލޯނާއާ ދެކޮޅަށް ނިކުންނައިރު، އެ ޓީމަށް އޮތީ ފުރިހަމަ އިޙުތިރާމް ކަމަށާއި، ނަމަވެސް ބިރުވެރި ކަމެއް ނެތް ކަމަށް އިންޓަރ މިލާންގެ ކޯޗު ސިމޯން އިންޒާގީ ބުނެފި އެވެ.

ބުދަ ދުވަހުގެ ރޭ ބާސެލޯނާއާ ދެކޮޅަށް ކުޅޭ ސެމީ ފައިނަލް މެޗުގެ ކުރިން އޮތް ނޫސްވެރިންގެ ބައްދަލުވުމުގައި ވާހަކަ ދައްކަމުން އިންޒާގީ ބުނީ، ބާސެލޯނާގެ ކޯޗުކަމާ ހަންސީ ފްލިކް ހަވާލުވީ ފަހުން އެ ޓީމު ފެންނަނީ ތަފާތުކޮށް ކަމަށެވެ. ޚާއްސަކޮށް ޒުވާން ގިނަ ކުޅުންތެރިންތަކެއް އުފެދިފައިވާ ކަމަށާއި، މިހާރު ވެސް ބާސެލޯނާ އިން ދެ ތަށި ކާމިޔާބު ކޮށްފައިވާ ކަމަށް އޭނާ ބުންޏެވެ.

ސެމީ ފައިނަލަށް ނިކުންނައިރު، ބާސެލޯނާ އަށް އެންމެ ފުރިހަމަ މަގާމުގައި އިޙުތިރާމް ކުރާނެކަން ފާހަގަކޮށް އިންޒާގީ ބުނީ، ބާސެލޯނާއާ މެދު ބިރުވެރި ކަމެއް ނެތް ކަމަށެވެ. ޚާއްސަކޮށް ޗެމްޕިއަންސް ލީގަކީ ތަފާތު މުބާރާތެއް ކަމަށާއި، މިހާތަނަށް އިންޓަރ އިން ވަނީ ރަނގަޅު ކުޅުމެއް ދައްކާފައި ކަމަށް އޭނާ ފާހަގަ ކުރި އެވެ. އަދި ސެމީ ފައިނަލްގެ ދެ މެޗު ވެސް ކުޅެން ބޭނުން ވަނީ، އަސްލު އިންޓަރގެ ފެންވަރުގައި ކަމަށް އޭނާ ބުންޏެވެ.

މީގެ އިތުރުން އިންޒާގީ ބުނީ ބާސެލޯނާއާ ދެކޮޅަށް ކުޅޭ އިރު، ވަރަށް ވިސްނުންތެރި ކަމާ އެކު ކުޅެން ޖެހޭނެ ކަމަށެވެ. ޚާއްސަކޮށް އެޓޭކު ކުރުމަށް ސަމާލުކަން ދޭންް ޖެހޭނެ ކަމަށާއި، ހަމަ އެއާއެކު ބާސެލޯނާގެ އެޓޭކުތައް ހުއްޓުވުމަށް ޚާއްސަ ސަމާލުކަމެއް ދޭން ޖެހޭނެ ކަމަށް ވެސް އޭނާ ބުންޏެވެ. އަދި ވަކިން ޚާއްސަކޮށް، ޓީމެއްގެ ގޮތުގައި އެންމެ މުހިންމު ދަނޑިވަޅުތަކުގައި ޑިފެންސް ކުރަން ޖެހޭނެ ކަމުގައި ވެސް އޭނާ ވަނީ ބުނެފަ އެވެ.

ބާސެލޯނާގެ އަމިއްލަ ދަނޑުގައި އިންޓަރ މިލާނާ ދެކޮޅަށް ކުޅޭ މެޗު އޮންނާނީ ބުދަ ދުވަހުގެ ރޭ ދަންވަރު ރާއްޖެ ގަޑިންް 12 ޖަހާއިރު އެވެ.