ރަޝިޔާގެ ކާސްކް ސަރަހައްދުގައި ޔުކްރެއިންގެ ސިފައިން އަދިވެސް ގެންދަނީ ހަނގުރާމަ ކުރަމުން ކަމަށް، ޔުކްރެއިންގެ ރައީސް ވުލެޑިމިއަރ ޒެލެންސްކީ ވިދާޅުވެއްޖެ އެވެ.

ޒެލެންސްކީ މިހެން ވިދާޅުވެފައި މި ވަނީ އެ ސަރަހައްދު މުޅިން ހިފާފައިވާ ކަމަށް ރަޝިޔާ އިން ބުނިތާ އެއް ދުވަަސް ފަހުންނެވެ. އެހެންކަމުން، އެ ސަރަހައްދުގައި ހިނގަމުން އަންނަ ހަނގުރާމައާ ގުޅޭ ގޮތުން ދެ ފަރާތުން ހާމަކުރަމުން އަންނަ މައުލޫމާތު ތަފާތު ކަމަށް ވަނީ ހާމަވެފަ އެވެ. 

ޒެލެންސްކީ ވިދާޅުވީ ޔުކްރެއިންގެ ސިފައިން ގެންދަނީ ކާސްކު ސަރަހައްދު އަދި ބެލްގޮރޮޑް ސަރަހައްދުގައި ކަނޑައެޅިފައިވާ ސަރަހައްދުތަކުގައި ހަނގުރާމަކޮށް، ދިފާއުވުމަށް މަސައްކަތް ކުރަމުން ކަމަށެވެ.

މިއީ 2024 ވަނަ އަހަރުގެ އޯގަސްޓް މަހު ޔުކްރެއިން އިން އެ ސަރަހައްދަށް ކުއްލި ހަމަލާއެއް ދިން ފަހުން، ޔުކްރެއިންގެ ބާރުގެ ދަށުގައި އޮތް އެންމެ ފަހު ރަށެވެ. އަދި އެ ސަރަހައްދު ހިފާފައިވާ ކަމަށް ރަޝިޔާ އިން ވަނީ ބުނެފަ އެވެ.

ނަމަވެސް، ޔުކްރެއިންގެ ސިފައިން ވަނީ ރަޝިޔާގެ އެ ވާހަކަތައް ދޮގުކޮށް، އެއީ "ޕްރޮޕެގަންޑާ" އެއް ކަމަށް ބުނެފަ އެވެ.

ރަޝިޔާގެ ރައީސް ވްލަޑިމިއާ ޕުޓިން ވަނީ ކާސްކުގެ އިސް ކޮމާންޑަރުންނަށް ފޯނުން ގުޅައި، ކާމިޔާބީ އަށް މަރުޙަބާ ވިދާޅުވެފައި ކަމަށް ވެސް، ރަޝިޔާގެ މީޑިއާ ތަކުގައި ވަނީ ބުނެފަ އެވެ. އެގޮތުން ޕުޓިންް ވަނީ "ބަޠަލުންގެ މަސައްކަތަށް" ޝުކުރު އަދާކުރައްވާފައި ކަމަށް ވެސް ބުނެފައިވެ އެވެ.

ޒެލެންސްކީގެ މި ބަޔާން އައިސްފައި މި ވަނީ ޕޯޕް ފްރާންސިސްގެ ޖަނާޒާގައި ބައިވެރިވުމަށް ވަޑައިގެންނެވުމުގެ ތެރޭގައި އެމެރިކާގެ ރައީސް ޑޮނަލްޑް ޓްރަމްޕާ ބައްދަލު ކުރެއްވުމަށް ފަހު އެވެ.