މާލޭގެ ތިން ސަރަހައްދެއްގައި ސަރުކާރާ ދެކޮޅަށް އަޑު އުފުލައި ރޭ ބޭއްވި ތިން އެއްވުމާ އެކު، ރަޔަޓް ގިޔަރުގައި ތިބި ސިފައިން މަގުތަކަށް ނެރެފިއެވެ.

ރަޔަޓް ގިޔަރުގައި ތިބި ސިފައިން އެންމެ ފުރަތަމަ ރޭ ނުކުތީ، އެމްޑީޕީ ކުރިއަށް ގެންދިޔަ "ކުއްލި ހަރަކާތް"ގެ ބައިވެރިން، އޯކިޑުމަގުން ހިލާލީގެއާ ދިމާލަށް ދާން އުޅެނިކޮށެވެ. އޯކިޑުމަގު، ކުރީގެ ސަލްސާ ކެފޭ ހުންނަ ސަރަހައްދުން ކުއްލި ހަރަކާތުގެ ބައިވެރިން ހުއްޓުވުމުން، ފުލުހުންގެ ފަހަތުން ރަޔަޓް ސިފައިން އެތަނަށް ދިޔައެވެ.

މާލޭގައި އެމްޑީޕީން ބޭއްވި ރޭ ކުއްލި އެއްވުމުގެ އިތުރުން ޒުވާނުން އިސްނަގައިގެން ކުރިއަށް ގެންދާ "ދުލެއް ނުކުރާނަން" ސިލްސިލާ މުޒާހަރާ ވެސް މަޖީދީމަގުގައި ރޭ ކުރިއަށް ގެންދިޔައެވެ. އެ މުޒާހަރާ ކުރިއަށް ގެންދާތާ، ހަތަރު ރޭ ވަނީ ވެފައެވެ.

މީގެ އިތުރުން ޓެކްސީ ޑްރައިވަރުން، އެ މީހުންގެ ހައްގުތަށް ހޯދުމަށް ގޮވާލައި، ޓްރާންސްޕޯޓް އެންޑް ސިވިލް އޭވިއޭޝަން މިނިސްޓަރު މުޙައްމަދު އަމީން ދިރިއުޅުއްވާ ގެކޮޅު، މާންދޫގެ ކައިރީގައި ވެސް ރޭ މުޒާހަރާ ކުރިއެވެ.

އަނިޔާވެރިކަމާއި ކޮރަޕްޝަނާއި ފަސާދަ އާއި އާއިލީ ވެރިކަން ނިންމަންޖެހޭ ކަމަށް ބުނެ، އަޑުއުފުލަމުން އެމްޑީޕީގެ ރޭގެ ކުއްލި އެއްވުގެ ބައިވެރިން މާލޭގެ އެކި ސަރަހައްދުތަކަށް އެއްވެ އަޑުއުފުލިއެވެ. އެމްޑީޕީ ހަރުގެއިން ނުކުމެގެން، މުޒާހަރާގެ ބައިވެރިން މިސްރާބު ޖެހީ އަލިކިލޭގެފާނު މަގުން މުލިއާގެ ކައިރިއަށް އެއްވާންށެވެ. ނަމަވެސް ފުލުހުން އެ ސަރަހައްދުން މުޒާހަރާގެ ބައިވެރިންނަށް ހުރަސް އެޅިއެވެ. އެއަށްފަހު، ކުއްލި ހަރަކާތުގެ ބައިވެރިން، ޓެކްސީ ޑްރައިވަރުންނާ އެކު، ގ. މާންދޫގެ ދެކުނު ކައިރީގައި ވެސް އަޑުއުފުލިއެވެ.

އެމްޑީޕީ ކުއްލި އެއްވުމުގެ އިސް ސަފުގައި ހަރަކާތްތެރި ވަނީ އެމްޑީޕީ ގައުމީ މަޖިލީހުގެ މެމްބަރުންނާއި އެ ޕާޓީގެ އިސް އެކްޓިވިސްޓުންނެވެ. ރޯދަ މަހުގެ ސިލްސިލާ 13 އެއްވުމަށްފަހު، އެމްޑީޕީން ވަނީ މި މަހު ސިލްސިލާ ގޮތެއްގައި ހަތަރު ރޭ މާލޭގައި މުޒާހަރާކޮށްފައެވެ.