އެޕްރީލް 18 ވަނަ ދުވަހުގެ ރޭ ފަތިހު ހެންވޭރު މިޓާޒް ގޭ ފުރާޅުމައްޗަށް އަންހެން ކުއްޖާ ވެއްޓިފައި އޮއްވައި ފެނުނު މައްސަލައިގެ ތަހުގީގާ މެދު ހިތްހަމަނުޖެހުން ފާޅުކުރުމަށް ބާއްވަމުންދާ ޒުވާނުންގެ ސިލްސިލާ މުޒާހަރާގެ ތެރެއިން ހޮނިހިރު ދުވަހުގެ ރޭ ވެސް އެ މައްސަލައަށް އިންސާފު ހޯދައިދިނުމަށް ގޮވާލައި އަޑު އުފުލައިފި އެވެ.

މިއީ ގިނަ އަދަދެއްގެ ޒުވާނުން އެއްވެ ޔުމްނު އަށް އިންސާފު ހޯދައި ދިނުމަށް ގޮވާލައި ވިދިވިދިގެން އިހުތިޖާޖު ކުރަމުން އަންނަ ހަތަރުވަނަ ރޭކަން ފާހަގަކޮށްލެވެއެވެ.

އުމުރުން 21 އަހަރުގެ ޔުމްނުއަށް އިންސާފު ހޯދުމަށް އެދި ހޮނިހިރު ދުވަހުގެ ރޭ ކުރި އިހުތިޖާޖުގެ ތެރެއިން މިރޭވެސް ސަރުކާރުގެ ވެރިންގެ އިސްތިއުފާއަށް ވަނީ ގޮވާލާފަ އެވެ. އަދި ޔުމްނުގެ މި މައްސަލައަށް އިންސާފު ހޯދައިދިނުމަށް ވެސް ވަނީ ގޮވާލާފައެވެ.

މުޒާހަރާގެ ބައިވެރިންގެ އެންމެ ބޮޑު ޑިމާންޑެއް މިކަމުގައި އޮތީ މި މައްސަލައިގެ އިންސާފުވެރި ތަހުގީގެއް ކުރުމަށެވެ. އޭގެ އިތުރުން، ނޭޝަނަލް އިންޓެގްރީ ކޮމިޝަނުން މިނިވަން އިިންކުއަރީއެއް މިކަމުގައި ހިންގަން ވެސް ވަނީ ގޮވާލާފަ އެވެ.

ހޮނިހިރު ދުވަހުގެ ރޭގެ މުޒާހަރާ ވެސް ފެށީ ހެންވޭރުގައި ހުންނަ ފުލުހުންގެ އިންވެސްޓިގޭޝަން އިމާރަތުގެ ކުރިމަތިންނެވެ.

ހ. ފެންޓެނޯއީ ގޭގެ ނުވަ ވަނަ ފަންގިފިލާގެ ފެންލައިޓަކުން ވެއްޓުނު އުމުރުން 21 އަހަރުގެ އަންހެން ކުއްޖާގެ މި ހާދިސާއަށް ހަފްތާއެއް ވާން ކައިރިވި ފަހުން ފުލުހުން ވަނީ ބިރާސްފަތި ދުވަހު އިރާކޮޅު އެ މައްސަލައިގައި ތުހުމަތުކުރެވޭ ރައުދު އަަހުމަދު ޒިލާލް 21، ހައްޔަރުކޮށްފަ އެވެ. މީގެއިތުރުން އެ މައްސަލައިގައި ހިމެނޭ ކަމަށް ތުހުމަތު ކުރެވޭ ހަތް މީހެއްގެ ފޯނު ވެސް ހިފަހައްޓާފައިވާ ކަމަށް ފުލުހުން ބުނެއެވެ.

ބައެއް ފަރާތްތަކުން ބުނާ ގޮތުގައި އެ އަންހެން ކުއްޖާ ވެއްޓުނު މި މައްސަލަ ސީރިއަސް މައްސަލައެއްގެ ގޮތުގައި ފުލުހުން ތަހުގީގު ކުރަމުން ގޮސްފައެއް ނުވެ އެވެ.

އެހެން ނަމަވެސް ގިނަ ބަޔަކު މަގުތަކަށް އެއްވެ މުޒާހަރާކޮށް، އަޑުއުފުލަން ފެށުމުން ފުލުހުން ވަނީ މި މައްސަލަ ތަހުގީގުކުރަން ފަށާފައެވެ.