ޣައްޒާ އަށް ކާނާގެ އެހީ ވެއްދުމަށް ދަތި ކުރާތީ، ކެނެޑާގެ ބޮޑު ވަޒީރު އެކަން ކުށްވެރި ކުރައްވައިފި

ޣައްޒާ އަށް ބޭނުންވާ ކާނާގެ އެހީތެރިކަން ވެއްދުމަށް އިސްރާއީލް އިން ހުރަސް އަޅަމުން ދާތީ، އެކަން ކުށްވެރި ކުރައްވާ ކަމަށް ކެނެޑާގެ ބޮޑު ވަޒީރު މާކް ކާނީ ވިދާޅުވެއްޖެ އެވެ.

ކާނީ ވަނީ، ޣައްޒާ ގައި ވޯލްޑް ފުޑް ޕްރޮގްރާމް (ޑަބްލިއުއެފްޕީ) އަށް މަސައްކަތް ކުރެވޭނެ އިންތިޒާމުތައް ހަމަޖައްސައި ދިނުމަށް ވެސް އިސްރާއީލަށް ގޮވާލައްވާފައި އެވެ. 

ކާނީ މިފަދައިން ގޮވާލައްވާފައި ވަނީ އިސްރާއީލްގެ ދަތި ކުރުންތަކުގެ ސަބަބުން، ވޯލްޑް ފުޑް ޕްރޮގްރާމްގެ ކާނާގެ ސްޓްކޮ ހުސްވުމާ ގުޅިގެންނެވެ.

ހުކުރު ދުވަހު ވޯލްޑް ފުޑް ޕްރޮގްރާމް އިން ބުނެފައިވާ ގޮތުގައި، ޣައްޒާ އަށް ފޯރުކޮށްދެމުން އަންނަ ކާނާގެ އެހީ ހުސްވެފައިވާ ކަމަށާއި، ކުރިއަށް އޮތް ދުވަސްތަކުގައި ކާނާ ހުސްވަމުން ދާނެ ކަމަށެވެ.

ކާނާގެ އެހީތެރިކަން ދިނުމަކީ ސިޔާސީ ކަމެއްގެ ގޮތުގައި ބޭނުން ކުރާ ހަތިޔާރަަކަށް ހަދައިގެން ނުވާނެ ކަމަށް ވެސް އެކްސްގައި ކުރެއްވި ޕޯސްޓުގައި ކާނީ ވަނީ ވިދާޅުވެފަ އެވެ.

ހަތް ހަފްތާ އަށް ވުރެ ގިނަ ދުވަސް ވަންދެން އިންސާނީ އަދި ވިޔަފާރީގެ އެއްވެސް އެހީއެއް ޣައްޒާއަށް ނުވަދެވޭ ކަމަށް އދ. އިން ބުނެފައިވެ އެވެ. މިއީ ޣައްޒާގެ ތާރީޚުގައި އެންމެ ދިގު މުއްދަތަށް ބޯޑަރު ބަންދުވެފައި އޮތް ދުވަސްވަރެވެ.