ރާއްޖޭގެ ޝަރުއީ ދާއިރާގެ މިނިވަންކަމަށް ނުރައްކާ އެބައޮތް - ހިއުމަން ރައިޓްސް ވޮޗް

ސުޕްރީމް ކޯޓުގެ ތިން ފަނޑިޔާރަކު ބޭއިންސާފުން ސަސްޕެންޑްކޮށް، ޝަރުއީ މިނިވަންކަން ގެއްލުވާލުމަށް ކުރާ އެހެނިހެން މަސައްކަތްތައް ހުއްޓާލަން ޖެހޭ ކަމަށް ހިއުމަން ރައިޓްސް ވޮޗުން ބުނެފި އެވެ.

ހިއުމަން ރައިޓްސް ވޮޗުން މިފަދައިން ބުނެފައިވަނީ އެ ޖަމިއްޔާއިން ނެރުނު ނޫސްބަޔާނެއްގައެވެ. އެ ނޫސް ބަޔާނުގައި ބުނެފައިވަނީ ތިން ފަނޑިޔާރުން މަގާމުން ވަކިކުރަން ޖުޑީޝަލް ސާވިސް ކޮމިޝަނުން ނެރުނު ރިޕޯޓަށް ޖަވާބުދާރީވުމަށް 24 އޭޕްރީލް 2025 ގެ ނިޔަލަށް ފުރުސަތު ދިން ކަމަށެވެ.

އަޒްމިރަލްދާ ޒާހިރާއި މަހާޒް އަލީ ޒާހިރާއި ހުސްނުއް ސުއޫދު ސަސްޕެންޑްކޮށް އެ ބޭފުޅުންގެ ސުލޫކީ ފިޔަވަޅު ތައް އަޅަން ފެށީ މިދިޔަ ފެބްރުއަރީ މަހުގެ 26 ވަނަ ދުވަހު ޖުޑީޝަލް ސާވިސް ކޮމިޝަނުންނެވެ. ފަނޑިޔާރުން ސަސްޕެންޑްކުރީ ގާނޫނު އަސާސީއަށް ގެނައި އިސްލާހާ ގުޅިގެން މެމްބަރުން އިންތިހާބުވި ޕާޓީން ވަކިވެއްޖެ ނަމަ ނުވަތަ ވަކިކޮށްފި ނަމަ އެ މެމްބަރުންގެ ގޮނޑި ގެއްލޭނެ ގޮތަށް ހުށަހަޅައިވާ މައްސަލަ ބަލަމުންދަނިކޮށެވެ.

ހިއުމަން ރައިޓްސް ވޮޗްގެ އޭޝިއާ ޑިރެކްޓަރު އެލެއިން ޕިއާސަން ވަނީ ޖުޑީޝަލް ކޮމިޝަންގެ ސުލޫކީ ފިޔަވަޅުތަކުގެ ސަބަބުން ސުޕްރީމް ކޯޓުގެ މަސައްކަތްތަކަށް ރައީސް މުހައްމަދު މުއިއްޒު ނުފޫޒު ފޯރުވާފައިވާތީ ވަރަށް ބޮޑަށް ކަންބޮޑުވުން އުފެދޭ ކަމަށް ވިދާޅުވެފައެވެ. ދުސްތޫރީ ނާޒުކު ކަންކަމުގައި ކޯޓުތަކަށް މިނިވަންކަމާ އެކު ހުކުމް ނުކުރެވޭހާ ހިނދަކު ރާއްޖެއަކީ ހައްގުތަކަށް އިހުތިރާމް ކުރާ ގައުމަކަށް ނުވާނެ ކަމަށް ވެސް އޭނާ ވިދާޅުވިއެވެ.

މިދިޔަ މާޗް މަހު ފަނޑިޔާރުން ނެރުއްވި ބަޔާނެއްގައި ބަންޑާރަ ނައިބު އަހުމަދު އުޝާމަށް ތުހުމަތުތަކެއް ކުަރައްވާ ވިދާޅުވީ، ސުޕްރީމް ކޯޓުގައި ކުރިއަށްދިޔަ ދުސްތޫރީ މައްސަލަ ބޭރުނުކޮށްލައިފިނަމަ ބަންޑާރަ ނައިބު އިންނަވާ ޖޭއެސްސީގައި ފަނޑީޔާރުންގެ މައްސަލަ ކުރިއަށްދާއިރު ކަންކަން ގޯސްކުރާނެކަމަށް ވިދާޅުވެ ބިރުދެއްކުމަށް އެޖެންޓުންތަކެއް ފޮނުވި ކަމަށެވެ.

އަދި ކުރިއަށް އޮތް ސުލޫކީ މަރުހަލާތަކުގައި އެ ތިން ފަނޑިޔާރުންގެ ވަކީލަށް ވާހަކަ ދެއްކުމުގެ ފުރުސަތު ދީފައެއް ނުވާ އިރު، އެއް ފަނޑިޔާރަކު އިސްތިއުފާ ދެއްވީ ރައީސް އާއި ބަންޑާރަ ނައިބު މަގާމުން ވަކިކުރުމަށް ބިރުދެއްކުމުގެ ބޭނުން ކުރައްވާ ކަމަށް ތުހުމަތު ކުރެއްވުމުން ކަމަށް ހިއުމަންރައިޓްސް ވޮޗްގެ ބަޔާނުގައި ބުނެފައިވެއެވެ.

ޖުޑީޝަލް ސަރވިސް ކޮމިޝަނަކީ 2008 ވަނަ އަހަރު ވުޖޫދުވި ދިވެހިރާއްޖޭގެ ފެހި ގާނޫނު އަސާސީގެ ދަށުން ޝަރުއީ ދާއިރާއާ ގުޅޭ ޝަކުވާތައް ބެލުމަށާއި އެ ފަރާތްތައް ވަޒީފާއިން ވަކިކުރުން ފަދަ ސުލޫކީ ފިޔަވަޅު އެޅުމުގެ ބާރު ލިބިފައިވާ މިނިވަން އަދި އިންސާފުވެރި މުއައްސަސާއެކެވެ. ގާނޫނު އަސާސީގެ 154 ވަނަ މާއްދާގައި ބުނެފައި ވަނީ ފަނޑިޔާރަކު މަގާމުން ދުރުކުރެވޭނީ "އެ ފަނޑިޔާރަކީ ވަރަށް ނާގާބިލު މީހެއް ކަމަށް ކޮމިޝަނަށް ފެނިއްޖެ ނަމަ، ނުވަތަ ފަނޑިޔާރަކީ ބޮޑެތި ކުށްސާބިތުވާ ފަނޑިޔާރެއް ކަމަށް" ކޮމިޝަނަށް ފެނިއްޖެ ނަމަ ކަމަށެވެ.

ހިއުމަންރައިޓްސް ވޮޗްގެ ބަޔާނުގައި ބުނެފައި ވަނީ އެ ކޮމިޝަނަކީ ސިޔާސީ ކުރުމުގެ ތާރީހެއް އޮތް ކޮމިޝަނަކަށް ވާއިރު، ފަހުން އައި ސަރުކާރުތަކުން އެ ކޮމިޝަނުގެ ބޭނުން ކޮށްގެން ފަނޑިޔާރުން ވަކިކުރަނީ ސިޔާސީ ސަބަބުތަކަށްޓަކަ އެވެ. 2018 ވަނަ އަހަރު އޭރުގެ ރައީސް އަބްދުﷲ ޔާމީން ތިން ފަނޑިޔާރަކު ހައްޔަރުކޮށް ޖަލަށް ލުމަށް އަމުރު ކުރެއްވިކަން ފާހަގަކޮށްފައިވެއެވެ. އަދި ހިއުމަން ރައިޓްސް ވޮޗުން ބުނީ ސަރުކާރުތަކުން އިސްލާހީ ވައުދުތައް ވެފައިވާ އިރު، އެއްވެސް ފަރާތަކުން އެކަން ކޮށްފައި ނުވާ ކަމަށެވެ.

ޝަރުއީ ދާއިރާގެ މިނިވަންކަމާ ބެހޭ އދ.ގެ އަސާސީ އުސޫލުތަކުގައި ބުނެފައި ވަނީ "ފަނޑިޔާރުން ސަސްޕެންޑް ކުރުން ނުވަތަ ވަކިކުރަން ޖެހޭނީ ހަމައެކަނި ނުކުޅެދުންތެރިކަން ނުވަތަ އަހުލާގުގެ ސަބަބުން އެ މީހުންގެ މަސްއޫލިއްޔަތު އަދާކުރުމުގައި ނުކުޅެދުންތެރިކަން ހުންނަ ސަބަބުތަކަށްޓަކައި" ކަމަށެވެ. ފަނޑިޔާރެއްގެ މައްޗަށް އުފުލާފައިވާ ދަޢުވާތައް "އެކަށީގެންވާ އިޖުރާޢަތެއްގެ ދަށުން އަވަހަށް އަދި އިންސާފުވެރިކަމާއެކު ކުރިއަށް ގެންދަންވާނެއެވެ. އިންސާފުވެރި އަޑުއެހުމެއް ބޭއްވުމުގެ އިހްތިޔާރު ފަނޑިޔާރަށް އޮންނާނެ ކަމަށެވެ.

ހިއުމަން ރައިޓްސް ވޮޗުން ބުނެފައިވަނީ ރާއްޖޭގެ ޝަރުއީ މިނިވަންކަމާއި އިންސާނީ ހައްގުތަކަށް އިހުތިރާމް ކުރުމަށް ރައީސް ޑރ. މުހައްމަދު މުއިއްޒު އަވަސް ފިޔަވަޅުތަކެއް އަޅުއްވަން ޖެހޭ ކަމަށް ޕިއާސަން ވިދާޅުވި އެވެ. ޝަރުއީ ދާއިރާއަށާއި ގައުމުގެ ޑިމޮކްރެޓިކް މުއައްސަސާތަކަށް ކުރިމަތިވެފައިވާ މި ނުރައްކާތައް ނިމުމަކަށް ގެނައުމަށް އެހީދޭ ފަރާތްތަކާއި ކަންބޮޑުވާ ގައުމުތަކުން، ޝަރުއީ ދާއިރާއާއި ރާއްޖޭގެ ޑިމޮކްރެޓިކް މުއައްސަސާތަކަށް ދެމުންދާ އިންޒާރުތަކާއި ގުޅިގެން ރައީސަށް ސާފު މެސެޖެއް ދޭން ޖެހޭ ކަމަށެވެ.