އެމްޑީޕީގެ 'ކުއްލި އެއްވުން' މަގުމައްޗަށް، ގޮވަނީ ރައީސްގެ އިސްތިއުފާއަށް
24 އެޕްރީލު 2025 | ބުރާސްފަތި 18:51ހުރިހާ ބާރުތައް އެއްކޮށްގެން ރައީސް މުއިއްޒު ދަނީ ގައުމު ފަސާދަކުރަމުން
އެމްޑީޕީގެ ކުއްލި އެއްވުން 24-04-2025
މޯލްޑިވިއަން ޑިމޮކްރަޓިކް ޕާޓީ (އެމްޑީޕީ) އިންވެސް އިންސާފު ހޯދުމަށް މަގުމައްޗަށް ނިކުމެ އިހްތިޖާޖްކުރަން ފަށައިފިއެވެ.
އެމްޑީޕީން ކުރިއަށްގެންދާ 'ކުއްލި އެއްވުމުގައި' އުމުރުން 21 އަހަރުގެ ހައްވާ ޔުމްނު ރަޝީދަށް އިންސާފު ހޯދައިދިނުމަށާއި ހުރިހާ ބާރުތައް އެއްކޮށްގެން ރައީސް މުއިއްޒު ގައުމު ފަސާދަ ކުރަމުންދާ ކަމަށް ބުނެ ދަނީ އަޑު އުފުލަމުންނެއެވެ.
ރައީސް މުއިއްޒު ވިދާޅުވާހާ ގޮތަކަށް މިގައުމުގެ ކަންކަން ކުރިއަށް ނުގެންދެވޭނެ ކަމަށާއި މިސަރުކާރު މިއޮތީ ފެއިލްވެފައި ކަމަށް ވުމާއިއެކު ރައީސް މުއިއްޒު ވަގުތުން އިސްތިއުފާ ދިނުމަށް މުޒާހަރާގެ ބައިވެރިން ވަނީ ގޮވާލާފައެވެ.
މުޒާހަރާގެ ބައިވެރިން މުލިއާގެ ކައިރީގައި އަޑު އުފުލަމުން ދިޔަ އިރު މުލިއާގެ ވަށައިގެން ހަރަކާތްތެރިވެފައިވަނީ ސިފައިންނެއެވެ.
2025 މާރިޗު 7 ވަނަ ދުވަހުން ފެށިގެން މޯލްޑިވިއަން ޑިމޮކްރަޓިކް ޕާޓީގެ (އެމް.ޑީ.ޕީ) ފަރާތުން މާލޭގައި ކުރިއަށް ގެންދާ ސިލްސިލާ މުޒާހަރާތައް ވެގެން ދިޔައީ ސަރުކާރު ކައްކުވާލި މުޒަހަރާތަކަށެވެ. އެ ހިސާބުން ފުލުހުން މެދުވެރިކޮށް ހާލަތާއި ނުބައްދަލު މިންވަރަށް ބާރުގެ ބޭނުންކޮށް، ޕެޕަރ ސްޕްރޭ ޖެހުން ފަދަ އެތައް ކަމެއް މި މުޒާހަރާތަކުން ފެނުނެވެ. ރޯދަ މަހުގެ ފަހު ދިހައަށް މުޒާހަރާ މެދު ކަނޑާލުމަށްފަހު އަނެއްކާވެސް އެމްޑީޕީގެ މުޒާހަރާތައް ވަނީ ފަށާފައެވެ.
އެމްޑީޕީން މުޒާހަރާއަށް ނުކުމެފައިވަނީ ސަރުކާރުން ރައްޔިތުން ބިކަކުރަމުންދާތީ އެކަމާއި ދެކޮޅަށް އަޑު އުފުލުމަށެވެ. ރައްޔިތުން ނުރުހުން ފާޅުކުރަމުން ދިޔައީ އަސާސީ ހައްގުތަކުން މަހުރޫމް ކުރަމުންދާ ކަމަށް ބުނެއެވެ. މީގެ އިތުރުން ސަރުކާރުގެ ތެރޭގައި ކޮރަޕްޝަން އިތުރުވެ، ރައްޔިތުންނަށް އަނިޔާވެރިވަމުންދާ ކަމަށް އެކި ސިނާއާތްތަކުގައި މަސައްކަތްކުރަމުންދާ އާއްމުން އައީ ބުނަމުންނެވެ.
ގޯތިތަކުގެ މައްސަލަ އާއި ޓެކްސީ ޑްރައިވަރުންގެ ވާހަކަ އާއި ވިޔަފާރިވެރިންގެ ވާހަކައިން ވެސް ފެނުނީ އުދާސްކަމެވެ. މަޖިލިސް މެމްބަރުންނާއި ކުރީގެ މެމްބަރުންގެ ވާހަކަތަކުން ވެސް އިވުނީ ސަރުކާރާއި މެދު މާޔޫސްވެ އުދާސްވެފައިވާ މިންވަރުގެ ވާހަކައެވެ. މުޒާހަރާތަކުގެ އަޑު ހަރުކޮށް މުޅި ރާއްޖޭގައި މުޒާހަރާތައް ކުރާނެ ކަމަށް އެމްޑީޕީން ދަނީ ބުނަމުންނެވެ. އެ ޕާޓީން ބުނާ ގޮތުން ދެން ދާނީ ކުރިއަށް ކުރިއަށް ބާރަށް ކުރިއަށެވެ.
