''ރޫލް އޮފް ލޯ'' މި ގައުމުގައި ހިންގުމުގައި އެއްވެސް މީހަކު ތަފާތު ނުކުރާނެ ކަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެއެވެ.

ހ. ފެންޓެނޯއީ ގޭގެ މަތިން ވެއްޓުނު 21 އަހަރުގެ ހައްވާ ޔުމްނު ރަޝީދުގެ ކޭސްގައި ސަރުކާރުން ވަރަށް ބޮޑަށް ނުފޫޒު ފޯރުވާފައިވާ ކަމަށް ގިނަ ބަޔަކު ތުހުމަތުކޮށްފައިވަނިކޮށް، ބުރާސްފަތި ދުވަހު އެކްސްގައި ރައީސް މުއިއްޒު ވިދާޅުވީ ގާނޫނު އަސާސީ އާއި ގާނޫނުތައް ތަންފީޒުކުރުމުގައި ގާނޫނުގެ ވެރިކަން (ރޫލް އޮފް ލޯ) މި ގައުމުގައި ހިންގުމުގައި އެއްވެސް މީހަކު ތަފާތު ނުކުރާނެ ކަމަށެވެ. އަދި ނުވެސް ކުރާނެ ކަމަށެވެ.

އެ މީހެއްގެ ހަސަބަކަށް، ނަސަބަކަށް، މަގާމަކަށް، މުއްސަނދިކަަމަކަށް، ރަހަމަތްތެރިކަމަކަށް، އާއިލީ ތިމާގެ ކަމަކަށް، ސިޔާސީ ފިކުރަކަށް، އަދި އެ ނޫންވެސް ކަމަކަށް ބަލާ މިކަމުގައި ކުރާނެ ތަފާތު ކުރުމެއް ނުއޮންނާނެ ކަމަށް އެމަނިކުފާނު ވިދާޅުވިއެވެ.

ޔުމްނު ފުރާޅު މައްޗަށް ވެއްޓިފައި އޮއްވާ ފެނުނީ 18 އޭޕްރީލް 2025 ވަނަ ދުވަހުގެ ހެނދުނުގެ ވަގުތެއްގައެވެ. ފުރަތަމަ މި ހާދިސާ ހިނގުމުން ނޫސްވެރިން ސުވާލު ކުރި ނަމަވެސް ފުލުހުން ވަނީ މި ކޭސްއާ ގުޅުންހުރި މައުލޫމާތުތައް ހާމަނުކޮށް ސިއްރުކޮށްފައެވެ. މި ހާދިސާއާ ގުޅޭ ގިނަ މައުލޫމާތުތަކެއް ހަސަން ކުރުސީ އެކައުންޓުން އެކްސްގައި ހާމަކުރުމާ ގުޅިގެން 22 އޭޕްރީލް 2025 ވީ އަންގާރަ ދުވަހުގެ ރޭ ބޭއްވި ކްލޯސްޑް ނޫސްވެރިންގެ ބައްދަލުވުމުގައި ޔުމްނުގެ މައުލޫމާތުތައް ހާމަކުރިއެވެ. އޭގެފަހުން 23 އޭޕްރީލް ވީ ބުދަ ދުވަހުގެ ޒުވާނުން ރުޅިގަދަވެ، މުޒާހަރާ ކުރުމުން 24 އޭޕްރީލް 2025 ވީ ބުރާސްފަތި ދުވަހު ފުލުހުން ނޫސްވެރިންގެ ބައްދަލުވުމެއް ބާއްވައި، މިކޭސްއާ ގުޅުންހުރި އިތުރު 8 މީހެއްގެ ވަނަވަރު ވަނީ އާއްމުކޮށްފައެވެ.