މަސްތުގެ ހާލަތުގައި ޕާޓީކުރި ކަމުގެ ތުހުމަތު ކުރެވިފައިވާ އިޒްދިޔާން މަގާމުން ވަކިކޮށް، ދާއޫދު ސަސްޕެންޑް ކޮށްފި
ދާއޫދު ސަސްޕެންޑް ކޮށްފައިވަނީ މުސާރަ ނުލިބޭ ގޮތަށް
މަގާމުން ވަކިކުރި، އިޒްދިޔާން މުހައްމަދު މައުމޫން އަދި އަންޑަރ ސެކްރެޓެރީ ފޮރ ޑިޖިޓަލް ސްޓްރެޓެޖީގެ މަގާމުން ސަސްޕެންޑް ކުރި ދާއޫދު އަހުމަދު
މަސްތުގެ ހާލަތުގައި ޕާޓީކުރި ކަމުގެ ތުހުމަތު ކުރެވިފައިވާ ރައީސް އޮފީހުގެ އަންޑާ ސެކެޓްރީ ފޯ ސްޓްރެޓެޖިކް ކޮމިއުނިކޭޝަންގެ މަގާމުން އިޒްދިޔާން މުހައްމަދު މައުމޫން މަގާމުން ވަކިކޮށް، އަންޑަރ ސެކްރެޓެރީ ފޮރ ޑިޖިޓަލް ސްޓްރެޓެޖީގެ މަގާމުން ދާއޫދު އަހުމަދު ސަސްޕެންޑް ކޮށްފިއެވެ.
ބުރާސްފަތި ދުވަހު ރައީސް އޮފީހުގެ ތަރުޖަމާން ހީނާ ވަލީދު ވިދާޅުވީ ރައީސްގެ އޮފީހުގެ އަންޑަރ ސެކްރެޓެރީ ފޮރ ސްޓްރެޓެޖިކް ކޮމިޔުނިކޭޝަން މަގާމުގައި ހުންނެވި އިޒްދިޔާން، އެ މަގާމުން ވަކިކުރައްވާފައިވާ ކަމަށެވެ. ނަމަވެސް ވަކި ކުރެއްވި ސީދާ ސަބަބެއް ހީނާ ވިދާޅެއް ނުވެއެވެ.
މީގެ އިތުރުން ހީނާ ވިދާޅުވީ ރައީސްގެ އޮފީހުގެ އަންޑަރ ސެކްރެޓެރީ ފޮރ ޑިޖިޓަލް ސްޓްރެޓެޖީގެ މަގާމުގައި ހުންނެވި ދާއޫދު މުސާރަ ނުލިބޭ ގޮތަށް އެ މަގާމުން ސަސްޕެންޑް ކުރައްވާފައިވާ ކަމަށެވެ. އަދި "ދިވެހި ޒުވާނުންގެ ގައުމީ ލަފާދޭ ކޮމިޓީ"ގެ ރައީސް ކަމުގެ މަގާމުން ވެސް ދާއޫދު އިސްތިއުފާ ދެއްވުމަށް ހުށަހެޅުއްވުމާއި ގުޅިގެން، އެ ކޮމެޓީން އޭނާ ވަކި ކުރައްވާފައިވާ ކަމަށް ހީނާ ވިދާޅުވިއެވެ.
މަސްތުގެ ހާލަތުގައި ޕާޓީކުރި ކަމުގެ ތުހުމަތު ކުރެވިފައިވާ އިޒްދިޔާން އަދި ދާއޫދަށް ފިޔަވަޅު އަޅާފައިމިވަނީ ހ. ފެންޓެނޯއީ ގޭގެ މަތީ ފްލޯއެއްގެ ފެންލައިޓުން 21 އަހަރުގެ ހައްވާ ޔުމްނު ރަޝީދު ވެއްޓުނު ހާދިސާއަށް ނުފޫޒު ފޯރުވާފައިވާ ކަމަށް ގިނަ ބަޔަކު ތުހުމަތު ކުރަމުންދާ ދަނޑިވަޅެއްގައެވެ.
މި ހާދިސާއާ ގުޅޭ ގިނަ މައުލޫމާތުތަކެއް ހަސަން ކުރުސީ އެކައުންޓުން އެކްސްގައި ހާމަކުރުމާ ގުޅިގެން 22 އޭޕްރީލް 2025 ވީ އަންގާރަ ދުވަހުގެ ރޭ ބޭއްވި ނޫސްވެރިންގެ ބައްދަލުވުމުގައި ފުލުހުން ބުނީ ޔުމްނާއާ އެކު އެރޭ އިތުރު ހަތް މީހަކު އުޅުނު ކަމަށާއި، އެއީ، ޖުމްލަ ތިން އަންހެނުންނާއި ފަސް ފިރިހެނުން ކަމަށެވެ.
އެ މީހުން އެރޭ 12:30 އެހާކަންހާއިރު ގޮސް ވަނީ މާލޭގެ މެދުތެރޭގައި ހުރި ގެއަކަށެވެ. އެ ގެއިން އެ މީހުން ނުކުތީ 3:40 އެހާކަންހާއިރެވެ. އެއަށް ފަހު، އޭގެ ތެރެއިން ހަތަރު މީހަކު 4:00 އެހާކަންހާއިރު ގޮސް އަމީނީ މަގުގައި ހުރި ގެއަކަށް ވަނީ ކަމަށް ފުލުހުން ބުނެއެވެ. މޭދުތެރޭގައި ހުރި ގެއަކީ ޓްރާންސްޕޯޓު މިނިސްޓަރު، މުހައްމަދު އަމީންގެ ގެ، މއ. މާންދޫގޭދެކުނުގެ އެވެ. ނަމަވެސް ފުލުހުން ވަނީ މިކަން ސިއްރުކޮށްފައެވެ.
ޔުމްނު އަމިއްލައަށް ފުންމާލީ ކަމަށް ފުލުހުން ބުނެފައިވާތީ، އެ ވާހަކަތަކަށް ގިނަ ބަޔަކު ދަނީ ފާޑު ކިޔަމުންނެވެ. އަދި މި ހާދިސާގައި ހިމެނޭ އަންހެން ކުއްޖާގެ ނަމާއި އެޑްރެސް ފުލުހުން ހާމަކުރި އިރު، ހާދިސާގައި ޝާމިލުވާ އިތުރު އެއްވެސް މީހެއްގެ ވަނަވަރު ހާމަކޮށްފައެއް ނުވެއެވެ.
ބުދަ ދުވަހުގެ ރޭ ގިނަ އަދަދެއްގެ ޒުވާނުން ވަނީ އާދަމް ހަލީމް ކްރިމިނަލް އިންވެސްޓިގޭޝަން ކައިރީގައި އިންސާފަށް ގޮވާލައި، ބޮޑު މުޒާހަރާއެއް ކޮށްފައެވެ.
