އެކި ދާއިރާތަކުން އެހީތެރިކަން އިތުރު ކުރުމަށް ސައުދީ އާއި އިންޑިއާ އެއްބަސްވެއްޖެ
24 އެޕްރީލު 2025 | ބުރާސްފަތި 09:12އޭގެ ތެރޭގައި ހަކަތައިގެ ދާއިރާގެ އިތުރުން، ދިފާއީ އަދި ސަލާމަތީ ދާއިރާތަކުން އެހީތެރިކަން އިތުރު ކުރުމަށް ވަނީ އެއްބަސްވެފައި.
ސައުދީގެ ވަލީއަހުދު މުޙައްމަދު ބިން ސަލްމާން، އިންޑިއާގެ ބޮޑު ވަޒީރު ނަރެންދްރަ މޯދީއާ ބައްދަލު ކުރައްވަނީ
އެކި ދާއިރާތަކުން އެހީތެރިކަން އިތުރު ކުރުމަށް، ސައުދީ އަރަބިއްޔާ އާއި އިންޑިއާ އިން އެއްބަސްވެއްޖެ އެވެ.
އެފަދަ އެއްބަސްވުމަކަށް ދެ ޤައުމު އައިސްފައި ވަނީ އިންޑިއާގެ ބޮޑު ވަޒީރު ނަރެންދްރަ މޯދީ ސައުދީ އަށް ކުރެއްވި ރަސްމީ ދަތުރުފުޅުގެ ތެރެއިންނެވެ.
ބޮޑު ވަޒީރު މޯދީ އާއި ސައުދީގެ ވަލީއަހުދު މުޙައްމަދު ބިން ސަލްމާންއާ ދެމެދު ކުރިއަށް ގެންދިޔަ މަތީ ފަންތީގެ މަޝްވަރާތަކުގައި ވަނީ ދެ ޤައުމުގެ ގުޅުން އިތުރަށް ބަދަހި ކުރުމަށާއި، އެކި ދާއިރާތަކުން އެހީތެރިކަން އިތުރު ކުރުމަށް އެއްބަސްވެފަ އެވެ.
އޭގެ ތެރޭގައި ހަކަތައިގެ ދާއިރާގެ އިތުރުން، ދިފާއީ އަދި ސަލާމަތީ ދާއިރާތަކުން އެހީތެރިކަން އިތުރު ކުރުމަށް ވަނީ އެއްބަސްވެފަ އެވެ.
ސައުދީ އަރަބިއްޔާ އަށް މޯދީ ކުރައްވާ ތިން ވަނަ ދަތުރުފުޅުގައި ސައުދީގެ ވަލީއަހުދު މުޙައްމަދު ބިން ސަލްމާންއާ ބައްދަލު ކުރައްވާފައި ވަނީ އަންގާރަ ދުވަހު ޖިއްދާގަ އެވެ.
ސަޢޫދީ ޕްރެސް އެޖެންސީ (އެސްޕީއޭ) އިން ޝާއިޢުކުރި ބަޔާނުގައި ބުނެފައިވާ ގޮތުން، ފާއިތުވި އަހަރު ތަކުގައި ދެ ގައުމުގެ ގުޅުން ހުރި ގޮތް މުރާޖާކޮށް، ގުޅުން އިތުރަށް ހަރުދަނާކުރާނެ ގޮތްތަކަށް ދެ ފަރާތުން ވަނީ މަޝްވަރާ ކޮށްފަ އެވެ.
ދެ ގައުމުގެ ސްޓްރެޓެޖިކް، އިގްތިސާދީ އަދި ވިޔަފާރީގެ ގުޅުންތައް ކުރިއަރަމުންދާ ގޮތާމެދު ހިތްހަމަޖެހޭކަން ފާހަގަކޮށް، ތެލާއި އެލްޕީޖީ ފޯރުކޮށްދިނުން ހިމެނޭ ގޮތަށް ހަކަތައިގެ ދާއިރާގައި އެއްބާރުލުން އިތުރު ކުރުމަށް ވެސް އެއްބަސްވެފައިވެ އެވެ.
