ފުރާޅެއްގެ މައްޗަށް ވެއްޓިފައި އޮއްވައި ފެނުނު އުމުރުން 21 އަހަރުގެ ހައްވާ ޔުމްނާ ވެއްޓުމުގައި އެހެން މީހެއްގެ އަތެއް ނެތް ކަމަށާއި ފުއްމާލީ އަމިއްލައަށް ކަމަށް ފުލުހުން ބުނެފައިވާއިރު މިކަމަށް އިންސާފު ހޯދުމަށް ފުލުހުންގެ އިދާރާ ކައިރީގައި އިހްތިޖާޖްކުރަމުން އެބަދެއެވެ.

އާދަމް ހަލީމް ކްރިމިނަލް އިންވެސްޓިގޭޝަން ކައިރީގައި ކުރިއަށްދިޔަ އިޙްތިޖާޖުގައި ގޮވާލާފައިވަނީ، ހައްވާ ޔުމްނާ މަރުވާން ދޫކޮށްލި މީހުން ހައްޔަރު ކުރުމަށާއި މިކަމުގައި ޝާމިލްވާ ހުރިހާ ފަރާތްތައް ހައްޔަރުކޮށް އިންސާފް ހޯދައިދިނުމަށެވެ.

އިހްތިޖާޖްގެ ބައިވެރިން ވަނީ މިކަމުގައި ޒިންމާވާނީ ކާކުތޯ އާއި މެދު ސުވާލު އުފައްދާފައެވެ. 'ދުލެއް ނުކުރާނަން' މިނަމުގައި ޔުމްނާއަށް އިންސާފް ހޯދައިދިނުމަށް ކުރިއަށް ގެންދާ އިހްތިޖާޖުގައި ގިނަ އަދަދެއްގެ ޒުވާނުން ބައިވެރިވެފައިވެއެވެ.

ޔުމްނާ އަމިއްލައަށް ފުންމާލީ ކަމަށް ފުލުހުން ބުނެފައިވާ ވާހަކަތަކަށް ގިނަ ބަޔަކު ދަނީ ފާޑު ކިޔަމުންނެއެވެ. މި ހާދިސާގައި ހިމެނޭ އަންހެން ކުއްޖާގެ ނަމާއި އެޑްރެސް ފުލުހުން ހާމަކުރި އިރު، ހާދިސާގައި ޝާމިލުވާ އިތުރު އެއްވެސް މީހެއްގެ ވަނަވަރު ހާމަކޮށްފައެއް ނުވެއެވެ. މިކަމާ ގުޅިގެން ސޯޝަލް މީޑިއާގައި މިހާރު ދަނީ ފުލުހުންނަށް ވަރަށް ގިނަ ފާޑުކިޔުންތަކެއް އަމާޒު ވަމުންނެވެ. އުފައްދާ ސުވާލަކީ ވިކްޓިމްގެ ވަނަވަރު ހާމަކުރިއިރު، ދެންތިބި މީހުން ސިއްރު ކުރަނީ ކީއްވެތޯއެވެ.

ގިނަ ފަރާތްތަކުން ތުހުމަތުކުރާ ގޮތުގައި ދެންތިބި ފަރާތްތަކުގެ މައުލޫމާތު ހިއްސާނުކުރީ މި ހާދިސާގައި ޝާމިލް ވަނީ ސަރުކާރުގެ ނުފޫޒު ގަދަ ބޭބޭފުޅުންގެ ދަރިން ނުވަތަ އާއިލީ މީހުން ކަމަށާއި އެމީހުންގެ ވަނަވަރު ސިއްރު ކޮށް އެމީހުން ހިމާޔަތްކުރަން ފުލުހުން މަސައްކަތްކުރާތީ ކަމަށެވެ.

ފުލުހުން ކިޔައިދިން ގޮތުގައި އެރޭ ޔުމްނާއާ އެކު އިތުރު ހަތް މީހަކު އުޅުނެވެ. އެއީ، ޖުމުލަ ތިން އަންހެނުންނާއި ފަސް ފިރިހެނުންނެވެ.

އެ މީހުން އެރޭ 12:30 އެހާކަންހާއިރު ގޮސް ވަނީ މާލޭގެ މެދުތެރޭގައި ހުރި ގެއަކަށެވެ. އެ ގެއިން އެ މީހުން ނުކުތީ 3:40 އެހާކަންހާއިރެވެ. އެއަށް ފަހު، އޭގެ ތެރެއިން ހަތަރު މީހަކު 4:00 އެހާކަންހާއިރު ގޮސް އަމީނީ މަގުގައި ހުރި ގެއަކަށް ވަނީ ކަމަށް ފުލުހުން ބުންޏެވެ.

މި ހާދިސާއާ ގުޅޭ ގިނަ މައުލޫމާތު ފުލުހުން ހެއްކާއެކު ދައްކާފައިވާއިރު، ހެކީގެ ގޮތުގައި އަޑާއެކު ދެއްކީ ސީސީޓީވީ ފުޓޭޖުތަކެކެވެ.

އެގޮތުން ޔުމްނާއާއި ފިރިހެން މީހާއާ ދެ މީހުން ދެން ވަންނަނީ އެ ހިސާބުގައި ހުރި އެ މީހުންނަށް އެއްވެސް ގުޅުމެއް ނެތް ގެއަކަށް ކަމަށް ފުލުހުން ބުންޏެވެ. އެ މީހުން އެ ގޭގެ ސިޑިގޮޅީގައި ތިބި މަންޒަރު ފެނެއެވެ. އަދި، އެ ތަނުގައި އެ މީހުން ބަދުއަޚުލާގީ އަމަލު ހިންގާ މަންޒަރު ވެސް ވީޑިއޯއިން ފެންނަ ކަމަށް ފުލުހުން ބުނެފައިވެއެވެ. އެ މީހުން އެ ވަގުތު ތިބީ މަސްތުގެ ހާލަތުގައި ކަމަށް ފުލުހުން ބުންޏެވެ. އެ ގޮތުން، އެ ފިރިހެން މީހާ މަސްތުވާތަކެއްޗަށް ޕޮޒިޓިވްވެފައިވާއިރު އަންހެން ކުއްޖާގެ ވަގުތީ ނަތީޖާ ވެސް ޕޮޒިޓިވްވި ކަމަށް ފުލުހުން ބުންޏެވެ.

މި ފިރިހެންމީހާ ޕާސްޕޯޓު ހިފަހައްޓައި ފުރުން މަނާކޮށްފައި ވާއިރު، ހައްޔަރުކޮށްފައެއް ނުވެއެވެ. މިކަމާއި ގުޅިގެން ގިނަ ބަޔަކު ދަނީ ސުވާލު އުފައްދަމުންނެވެ. އަދި ފުލުހުންގެ ތަޙްގީގް ލަސްކަމަށް ބުނެ ގިނަ ބަޔަކު ދަނީ ފުލުހުންގެ އިދާރާއަށް ފާޑުކިޔަމުންނެއެވެ.