ޝައްމާން ފްރޭމެއް ނުކުރަން، މާދަމާ ތަފްސީލުތައް ހާމަކުރާނެ: މިނިސްޓަރު އިހުސާން
23 އެޕްރީލު 2025 | ބުދަ 12:00ޝައްމާންއަށް ތުހުމަތު ކުރެވޭ މައްސަލާގައި ސާބިތު ހެކި ފެނިފައިވޭ
ކުރީގެ ކޮންޓްރޯލަރ ޖެނެރަލް އޮފް އިމިގްރޭޝަން، މުޙައްމަދު ޝަމްޢާން ވަހީދު
ހިޔާނާތުގެ ގިނަ ތުހުމަތުތަކެއް ކުރެވިފައިވާ ކުރީގެ ކުރީގެ ކޮންޓްރޯލަރ ޖެނެރަލް އޮފް އިމިގްރޭޝަން، މުހައްމަދު ޝައްމާން ވަހީދު ފްރޭމް ނުކުރާ ކަމަށާއި، ބުރާސްފަތި ދުވަހު ތަފްސީލު ހާމަކުރާނެ ކަމަށް ހޯމް މިނިސްޓަރު އަލީ އިހުސާން ވިދާޅުވެއްޖެއެވެ.
ބުދަ ދުވަހު ރައްޔިތުން މަޖިލީހުގެ ޖަލްސާގައި މެމްބަރުން ކުރެއްވި ސުވާލަށް ޖަވާބު ދެއްވަމުން މިނިސްޓަރު އިހުސާން ވިދާޅުވީ އެއްވެސް ބޭފުޅެއް ފްރޭމް ނުކުރާނެ ކަމަށާއި، މިމައްސަލާގައި ކަންކަން ހިނގާފައިވާ ގޮތް ވަރަށް ގާތުން ބަލާފައިވާ ކަމަށެވެ.
މިނިސްޓަރު އިހުސާން ވިދާޅުވީ ޝައްމާންއަށް ތުހުމަތު ކުރެވޭ މައްސަލާގައި ސާބިތު ހެކި ފެނިފައިވާ ކަމަށާއި، ބުރާސްފަތި ދުވަހު މިމައްސަލައާ ގުޅިގެން ފުލުހުން އެ މައުލޫމާތުތައް ހާމަކުރާނެ ކަމަށެވެ.
ދެ ބޭފުޅުންގެ ގުޅުމާ ގުޅޭގޮތުން މިނިސްޓަރު އިހުސާން ވިދާޅުވީ އެކުގައި މަސައްކަތް ކުރެއްވިއިރު، ދެބޭފުޅުންގެ ގުޅުން ވަރަށް ރަނގަޅު ކަމަށެވެ. ނަމަވެސް، ގާނޫނާ ޚިލާފުވާ ހިސާބުން އެއްވެސް އިސްތިސްނާއެއް ނުގެންގުޅޭ ކަމަށް މިނިސްޓަރު އިހުސާން ވިދާޅުވިއެވެ.
މީގެ އިތުރުން ވައިކަރަދޫ ދާއިރާގެ މެންބަރު ހުސައިން ޒިޔާދު ވަނީ ހިޔާނާތުގެ ގިނަ ތުހުމަތުތެއް ކުރެވިފައިވާ އެޗްޑީސީގެ ކުރީގެ އެމްޑީ ފަޒުލް ރަޝީދުގެ މައްސަލައާއި، ޝައްމާން މައްސަލާގައި އަމަލުކޮށްފައިވާ ގޮތާ ގުޅޭގޮތުން ސުވާލު ކުރައްވާފައެވެ. މި ދެމައްސަލާގައި ތަފާތުކުރުންތައް ގެންގުޅެނީ ކީއްވެތޯ ސުވާލު ކުރައްވާފައިވެއެވެ.
އެ ސުވާލަކަށް މިނިސްޓަރު އިހުސާން ވިދާޅުވީ ދެ މައްސަލަ ވަރަށް ތަފާތު ކަމަށާއި އާފަލާއި އޮރެންޖު އެއްގޮތް ނުކުރެވޭނެ ކަމަށެވެ.
އެއްވެސް ބޭފުޅަކު ފްރޭމެއް ނުކުރާނަން އަޅުގަނޑުމެންނެއް. އަޅުގަނޑު ކަށަވަރުކޮށްފިން ތިޔަ ވިދާޅުވާ މައްސަލާގައި ކަންކަން ގޮސްފައި އޮތް ގޮތް. އެއީ އަޅުގަނޑު ވަޒީރެއްގެ ހައިސިއްޔަތުން މައްސަލަތައް ހިނގަމުންދާ ގޮތް ބަލަން ގާނޫނުން ތިބޭފުޅުން ލާޒިމް ކުރައްވާފައިވޭ. އަޅުގަނޑު ބަލާފިން. އަޅުގަނޑަށް ކަށަވަރުވޭ އެ މައްސަލާގައި ފްރޭމް ކޮށްފައި ނެތްކަން. އަޅުގަނޑަށް ކަށަވަރުވޭ އެ މައްސަލާގައި މިހާރު ހައްޔަރުގައި އޮތް ބޭފުޅާ އެ އޮތީ އެ މައްސަލާގައި ފުލުހުން ބެލިބެލުމުން ސާބިތު ހެކި ފެނިގެންކަން. އިރާދަކުރެއްވިއްޔާ ދިވެހި ރައްޔިތުންނަށް އެ ދައުވާ ޕީޖީ އޮފީހަށް ފޮނުވާ ހިސާބުން ފުލުހުން ތަފްސީލީ ބްރީފިންގ އެއް ދެއްވާނެ. އަޅުގަނޑަށް ފުލުހުން މައުލޫމާތު ދެއްވާފައިވާ ގޮތުން އިރާދަކުރެއްވިއްޔާ ބުރާސްފަތި ދުވަހު އެއީ މާދަމާ އެ މައުލޫމާތުތައް ދިވެހި ރައްޔިތުންނާ ހިއްސާކުރައްވާނެ.ހޯމް މިނިސްޓަރު އަލީ އިހުސާން
ޝައްމާން ހައްޔަރުކޮށްފައިވަނީ ފުލުހުން ގެންދިޔަ ތަކެތީގެ އިންވެންޓްރީގައި ސޮއިކުރުމަށް 21 މާރޗް 2025 ވީ ހުކުރު ދުވަހުގެ ރޭ ހެންވޭރު ޕޮލިހަށް ހާޒިރުވުމުން ކުއްލި ގޮތަކަށެވެ.
ޝައްމާންއަށް ތުހުމަތު ކުރެވޭ މައްސަލާގައި ސަރުކާރުން ތަފާތު ގޮތަކަށް އަމަލުކުރާ ކަމަށާއި، ޝަރީއަތް ނިމެންދެން ބަންދު ކުރުމަށް ނިންމާފައިވަނީ، މި މައްސަލާގެ ހަގީގަތް ޝައްމާން މީޑިއާތަކަށް ތިލަ ކުރާނެތީ ކަމަށް ބައެއް ފަރާތްތަކުން ދަނީ ތުހުމަތު ކުރަމުންނެވެ. އަދި މި މައްސަލާގައި ސަރުކާރުގެ ވަޒީރެއްގެ ނުފޫޒު ވަރަށް ބޮޑަށް ފޯރުވާފައިވާ ކަމަށް ވެސް ތުހުމަތު ކޮށްފައިވެއެވެ.
ޝައްމާންގެ ބަންދަށް ފުރަތަމަ ދިން 15 ދުވަސް ހަމަވުމާއި ގުޅިގެން ޝަރީއަތް ނިމެންދެން ބަންދުގައި ބެހެއްޓުމަށް ކްރިމިނަލް ކޯޓުން އަމުރުކޮށްފައިވަނީ 6 އޭޕްރީލް 2025 ގައެވެ.
