ޣައްޒާ އަށް ދޭ ހަމަލާތައް މަޑުޖައްސާލުމުގެ ވިސްނުމެއް ނެތްކަން އަނެއްކާވެސް އިސްރާއީލުން ހާމަކޮށްފިއެވެ.

އިސްރާއީލުގެ ބޮޑުވަޒީރު ބެންޖަމިން ނެތަންޔާހޫ އަނެއްކާ ވެސް ހޮނިހިރު ދުވަހު ބުނީ ޣައްޒާގައި ހަނގުރާމަ ކުރިއަށް ގެންދިއުން ނޫން ގޮތެއް އިސްރާއީލަށް ނެތް ކަމަށާއި ހަމާސް ނައްތާލައި ރަހީނުކުރި މީހުން މިނިވަން ކުރުމުގެ ކުރިން ހަނގުރާމަ ނިންމާނުލާނެ ކަމަށެވެ.

ޣައްޒާގެ ހަނގުރާމަ ހުއްޓާލަން އިސްރާއީލުން އިންކާރުކުރާކަން ހާމަކޮށް އިސްރާއީލުގެ ބޮޑުވަޒީރު ބެންޖަމިން ނެތަންޔާހޫ ބުނެފައި ވަނީ، ޣައްޒާގައި ކުރިއަށްދާ ހަނގުރާމަ ނިންމާލުމުގެ އެއްވެސް ފުރުސަތެއް ނެތްކަމަށެވެ. ހަމާސް ފުނޑާލައި، ހަމާސްގެ ބަންދުގައި ތިބި ރަހީނުން ސަލާމަތްކުރުމަށް ދާންދެން ހަނގުރާމަ ކުރިއަށް ގެންދާނެ ކަމަށް އޭނާ ވަނީ ބުނެފައެވެ.

އޭނާ މިހެން ބުނެފައި ވާއިރު މިދިޔަ 48 ގަޑިއިރުގެ ތެރޭގައި އިޒްރޭލުގެ ހަމަލާތަކުގައި 90 އަށްވުރެ ގިނަ މީހުން ޝަހީދުވެފައިވާ ކަމަށް ޣައްޒާގެ ސިއްހީ ވުޒާރާއިން ބުނެފައިވެއެވެ. މީގެ ތެރޭގައި އަންހެނުންނާއި ކުޑަކުދިން ހިމެނެއެވެ. ހަމާސް އާއި އިސްރާއީލާ ދެމެދު ކުރެވުނު އެންމެ ފަހުގެ މަޝްވަރާތަކުގައި، ހުއްޓުމެއް ނެތި ހިނގަމުންދާ ހަނގުރާމަ ވަގުތީ ގޮތުން މެދުކަނޑާލުމަށް ބަދަލުގައި ރަހީނުންގެ ދެބައިކުޅަ އެއްބައި ދޫކޮށްލުމަށް ހުށަހެޅުނު ނަމަވެސް، ހަމާސްއިން މިކަމަށް އިންކާރުކޮށްފައިވާ ކަމަށް ނަތަންޔާހޫ ވަނީ ބުނެފައެވެ.

އިސްރާއީލުގެ ސިފައިންގެ ބަޔާނެއްގައި ބުނެފައިވާ ގޮތުގައި ވޭތުވެދިޔަ ހަފްތާ ބަންދުގައި އެ ގައުމުގެ 40 އަށްވުރެ ގިނަ ހަނގުރާމަވެރިން މަރާލެވިފައިވެއެވެ. އަދި މާރޗް 18ން ފެށިގެން ފުރަތަމަ ފަހަރަށް އިސްރާއީލުގެ ސިފައިންގެ މީހަކު މަރުވެފައިވާކަންވެސް އެ ބަޔާނުގައި ފާހަގަކޮށްފައިވެއެވެ. ތެލްއަވީވްގައި ހިނގި އިހްތިޖާޖުތަކުގައި ހާސްތަކެއް މީހުން ބައިވެރިވެ، ހަނގުރާމަ ހުއްޓާލައި ރަހީނުން ދޫކޮށްލުމަށް ގޮވާލާފައިވެއެވެ. އެގޮތުން ކުރީގެ ރަހީނެއް ކަމުގައިވާ އޮމަރު ޝެމް ޓޮވް ބުނީ "ހުރިހާ ރަހީނުން އެއްފަހަރާ ސަލާމަތްކުރުމަށް، އެކަމަށްޓަކައި ހަނގުރާމަ ހުއްޓާލަން ޖެހުނު ނަމަވެސް، އެކަން ކުރަންވީ" ކަމަށެވެ.